Read Car_Nicobarese 2 KÒRIN 8 Bible Online

2 KÒRIN 8 - Car_Nicobarese bible

2 KÒRIN 8

¹Kahōlö mikahtölōn yīö in tö ngam inlōnti aṅ im Tēv, ngam tökētu nö i nup māṅ i Makētòni;

²Tö e nö pōyen inmeuktö nö im kanihngen, ngam töpōyen ṙanāmölōn chu, ngam tö maṙū-uti inrē öt kanôlò chu, nö pōyen nö im kanôlò ngam inlōn tö cha.

³Hameukhöti chin pòn sā öp tölngö kanô-òṅ cha, hòṅ saṙaklöng tö kanô-òṅ cha inrē nö kē-ĕti nöng kanahanglōnre,

⁴Vë-ekūö ih nö līpöre tö ngih inlōnti, ngam innôlti inrē nö i mineukṙen yip töhet:

⁵Ngaich angū-ö, öt sā lōn ih meūka sin, tön urĕh cha-a nö kētöre nö im Mā, in ih inrē, kūö lōn ngam Tēv.

⁶Lökten in ṙuhöl alaha Taitös, nö sā ò nö ngaich nö urĕh nö rultöre, ngatī anga-aṅ inrē nö keuheūtngenre nö in yīö, ngih inlōnti inrē.

⁷Sā yīö pöri ngaich pōyen in i tökeuheūttöre, i mikah, i inlaha ëlô yīö inrē, inkaha inrē, i nup taṙòkhöre kumlēḵlōn inrē, i hanāngenlōn yīö tö ih inrē, yĕh meuk, i ngih yin inlōnti inrē öi hòṅ pōihölö.

⁸Öt i chöngö ṙô chin, sā inmeukhöti pöri lökten i kumlēḵlōn yip tahëng, tö kanô-en ngam hanāngenlōn yīö.

⁹Pò yīö akahalōn tö ngam inlōnti aṅ im Mā hī Yēsū Kristū, tö Ò nö pòrô nö tö kôlò, ngaich pò kūö hī nö vīngöre nö tötkôlò, hòṅ yīö lökten im ötkanôlò Ò vītuṙen kôlò.

¹⁰Ihih chin kētö ngam akahre; pòn tölöök nö in yīö, yī-ö ramneh rultöre, hĕng hang samyeūheu ngaich, öt höng la-evṙen, tön lōnu inrē.

¹¹Ngaich pöchö töngamuh keuheūtngen ngam vinī-iṅ inrē; sā ngam lanënö lōn, ngatī inrē ngam kinheūtngen aṅ im mikah yīö.

¹²Yē ngam lanënen nö umuh, töhōḵovö an nö sā öp in ò, öt sā öp töt in ò.

¹³Tön rö-ö chin ngö ṙô, tö tahëng nö un kihngen, ngaich kihngen yī-ö:

¹⁴Tön haṙōngö pöri, ngam ṙôken aṅ in yīö töngamuh, öi meukṙen hanāten cha, hòṅ öp ṙôken aṅ in cha inrē nö meukṙen hanāten yīö: hòn höng hĕngren;

¹⁵Sā kinūich ngö e nö ngö, Ngòh töpōyen hamūl öt ṙanā-alrevö; ngòh tö kūöṅnen hamūl öt hanātuṙen.

¹⁶Ha-öiny ngam Tēv pöri, ngam kamëhöt tö ngatī kumlēḵ, chumkūöṙen tö yīö nö ellōn Taitös.

¹⁷Pòn kô anga-aṅ nö hōḵo inlēnöre tö ih; ngaich kalēḵĕlōn inrē anga-aṅ, kahanglōnre ngaich anga-aṅ nö chuh in yīö.

¹⁸Ngaich ihö inrē tintö hol Ò, tö hol, ngam tö-eūnyu nö im tölöök inhāṅga, keuheūtngöre chūök i në māṅ;

¹⁹Röön höng ngatī tön ngam tö vīlöngö tö minë māṅ nö holröön ih kiröönngöre i ngih inlōnti, ngam la-en ih i kanôlò ngam Mā, ngaich hameuktö ngam lanënen ih:

²⁰Lakngö ngih, hòṅ ih öt hachökö tö tarik i ngih inlōnti maheuṅkṙen ih:

²¹Pò ih lōn tö tölöök, öt höng i kūö ngam Tēv, tön i kūö tarik inrē.

²²Ngaich tīntö ngam hol cha ihö, ngam kalahten ih ṙōl heuh ngaich, nö tökalēḵĕlōn i tökeuheūttöre, mötlö kumlēḵlōn pöri töngamuh, tö kūö yöng nyanatlö ò nö in yīö,

²³Yĕn hatönka Taitös, holkūö ih ap anga-aṅ, hol alaha inrē nö in yīö, hēk yip hol ih, tanīnöṙô nup māṅ yip cha-a, ineū-euṅ Kristū yip.

²⁴Lökten hameuktö hanāngenlōnre tö cha i kūö nup māṅ ngam ineū-euṅ ih inrē tö pòkūö yīö.