Read Car_Nicobarese KALATĪ 1 Bible Online

KALATĪ 1 - Car_Nicobarese bible

KALATĪ 1

¹Pôl, tanīnöṙô öt ṙā-ang i tarik, öt rēhĕn nö lökten tarik, lökten in Yēsū Kristū pöri, ngam Tēv Yöng inrē, ngammahachohlen ò nö ṙā-ang i tökapah,

²Ṙòkhöre vē hol mi-in chu, löö in nup māṅ i Kalatī:

³Inlōnti yēḵ in yīö lanāmö inrē, ṙā-ang im Tēv Yöng, ngam Mā inrē, Yēsū Kristū,

⁴Ngam kamëḵngöre kūö tökööl hī, pòn hòṅ ṙānyen hī Anga-aṅ nö ṙā-ang in ngih tötlöök panam töngamuh, sā lōn ngam Tēv hī, Yöng hī inrē;

⁵Kanôlò Ò yēḵ örheūheu. Āmen.

⁶Uṙeh chin tö kineuingö yīö kē-ĕngre ṙā-ang in Ò ngam mahavëten yīö im inlōnti aṅ in Kristū, öi im tahëng tölöök inhānga;

⁷Ngam töt tahëng tölöök inhānga: pòn rēvre yip mahakihten yīö, ngaich hòṅ halō-ongkūö yīö töm tölöök inhangkö Kristū.

⁸Pòrô in öre ihö, hēk ma-ahānga, nö ṙā-ang el halīöngö, öi ahangken yīö tö tölöök inhānga, öp tahëng tö öp ahangkö ih in yīö, hökngen ò yēḵ nö Anatamā.

⁹Sā ṙô ih urĕh, hēk chin ngatī ṙô töngamuh, yĕn tarīku ma-ahangken yīö tö tölöök inhānga, tö tahëng tö ngam kahëḵ yīö ngaich, hökngen ò yēḵ nö Anatamā.

¹⁰Līp tarik ṙöng öich töngamuh, hēk, ngam Tēv? Hēk, lukkenre öchu haṙamlōn tarik? Yē chu ṙòngmöng haṙamlōn tarik, ngaich öt tö hakövö öre chu-ö tö Kristū.

¹¹Kahōlö, pò chu mikahtölōn yīö, i inlahen ngam tölöök inhānga, ngam ahangkö chu, tö e nö öt aṅ i tarik.

¹²Pò chu öt teūngen tö e ṙā-ang i tarik, öt rēhĕn öich haköptu tö e, yih pöri angū-ö nö in chu lökten i inmeuktö tö Yēsū Kristū.

¹³Pò yīö ngaich akahalōn tö inlahen chu misī, i falngen yip Yahūti nö im Tēv, tö chu yahlö fālen öt hakôlò ngam māṅ ngam Tēv, öich piyāingö e:

¹⁴Saṙaklöng huneū-eu chu-ö i falngen yip Yahūti nö im Tēv, tö yip tö sā ṙētöre, i yip aṅ panam chu, mötlö kumlēḵlōn i kui yik muvöhngö ih.

¹⁵Hē e pöri nö tölöök nö lōn ngam Tēv, ngam mahaköhngen chu el chūök kanūönö ök yöng chu, ngaich havëten chu lökten im inlōnti aṅ in ò,

¹⁶Nö hameuktö ngam Kūönre nö in chu, pò chu hōtu ahangken Ò i Tahëng mihëṅṙö tarik; iṙūö hatöntöre chu-ö, öt i alaha, mahām inrē:

¹⁷Öt rēhĕn chin chuh Yerūsalem in cha, yip tanīnöṙô mū-urĕh tö chu: tön marô-òlkūö öich chuh Arēpīa; ngaich hēk havantöre i Tamāskös.

¹⁸Ngaich unôichrit tö lūöi samyeūheu chu-ö, chuh Yerūsalem chöhken Kīfas, ngaich ngöh in ò taneusīön sumkam.

¹⁹Hö-ö pöri chu-ö meuk yip tahëng tanīnöṙô, höng Yāköp ök kisānö ngam Mā.

²⁰I inlahen nup kahūich tö chu ngaich in yīö, yĕh meuk, i kūö ngam Tēv, öt minyôinyaṅ chin.

²¹Ngaich yih chu-ö i chīṙö Sirīa, Silisīa inrē.

²²Ngaich ṙòngmöng öl chu-ö akaha arëkūö tö yip māṅ i Yūtā yip aṅ in Kristū.

²³Höng hāngö pöri cha-a nö ngö, Ngòh tö hĕng heuh ngòh nö öt hakôlò hī, ngaich an töngamuh nö ahangkö ngam mikah, ngam piyāingö ò sin;

²⁴Ngaich ha-öiny ngam Tēv cha-a tö pòkūö chu.