Read Car_Nicobarese KALATĪ 2 Bible Online

KALATĪ 2 - Car_Nicobarese bible

KALATĪ 2

¹Ngaich unôichrit tö fën sīön samyeūheu chu-ö hēk chuh Yerūsalem holten Parnöpās, ngô-òṅ Taitös inrē nö hol chu.

²Kiröönngöre chu-ö löktö i inmeuktö; ngaich ṙātö ngam tölöök inhānga nö ikūö cha, ngam ahangkö chu i yip Tahëng mihëṅṙö tarik, höng ulāikenre pöri i kūö cha yip tö akaha, hôiṅch öt lökngö yô-òv röön fal, hēk chök alaha röön ngaich fal.

³Öt rēhĕn pöri Taitös, ök mi-in ih, nö līptu tunnyinyngö, pò ò nö Krīk:

⁴Ngaich kūö yip tökô-en pöri hol, tö ulāihötvö, yip yamih nö ulāikenre nö hayun chunhëṅṙen ih in Kristū Yēsū, pòn kēten ih nö im inkövö:

⁵Yip töt halöngtu chūök nö in ih, hö-ö, ötrēhĕn, nö hĕng köinyṙô rô-òten; hòṅ ngam kanô-en ngam tölöök inhānga nö iṙuhöröön nö in yīö.

⁶In cha pöri yip tö-eūnyu nö tö akaha öp tö sitih tö cha misī, öt tö-uroh angū-ö nö in chu: öt atöltu kūö an ngam Tēv cha-a yip ṙô chu, yip tö-akaha, öt kahëtu nö in chu:

⁷Harīkngöre pöri, hē cha nö meūkö chu hakëmtu im tölöök inhangkö yip töt tunyīnyi, sā Pītör nö i yip tö tunyīnyi.

⁸(Pòn anga-aṅ tötī-iv nö in Pītör tö ngam tinīnngö i yip tö tunyīnyi, tī-iv nö in chu inrē i yip Tahëng minhëṅṙö tarik:)

⁹Ngaich hē cha nö meuk ngam tökētu inlōnti nö in chu, ngaich hēḵ Yāköp, Kīfas, Yôhan inrē, yik tö-eūka nö machööḵlö, nö kē-ĕkūö chu tö Parnöpas, nö hamòlṙen; hòṅ ih ihö chuh i yip Tahëng mihëṅṙö tarik, ngaich cha-a nö i yip tö tunyīnyi;

¹⁰Höng hōten ih cha-a köpölōn tö yip yāich; ngam katakô kumlēḵlōn chu chu-ö inrē.

¹¹Chalô Kīfas nö i Anti-òk, ngaich lā-alkūö ò chu-ö, pò ò nö kôtī fālen.

¹²Pòn urĕh sin tö yik yamih nö rā-ang in Yāköp, nya-aṅvkūö sin anga-aṅ nö hol kūö yik Tahëng mihënṙö tarik; chalôhë pöri cha-a, heūlngöre ngaich anga-aṅ, ngaich haköhngenre, nö pa-ekūö tö yik aṅ i yik tötunyīnyi.

¹³Ngaich asīnken ang Parnöpas inrē nö halō-oi kūö nö in e angū-ö tö ngatī innyatkö elmat.

¹⁴Ngaich hē chu meūkö cha nö öt chīpö talöökö nö i kanô-en ngam tölöök inhānga, ngaich ngö ṙô chu-ö tö Pītör, i kūö cha nö ṙòkhöre, Yē meh me-eṅ öm Yāhūti, öm asīntö re i vē Tahëng mihëṅṙö tarik, ngaich rö-ö öm sā Yahūti, sitih öm līpten yip Tahëng mihëṅṙö nö asīntöre nö i Yāhūti?

¹⁵Nehngenre in ayī-ö Yahūti, öt aṅ i yip tököölö fālen Tahëng mihëṅṙö tarik,

¹⁶Tö-akahlōn tö tarik nö öt lööklö tö kūö tī ngam chöngö, höng lökten im mikah in Yēsū Kristū, ṙātö ellōnre in in Kristū Yēsū, tö hī min halööklöngö lökten im mikah in Kristū, öt tī ngam chöngö: pòn öt lööklö tarik min tö tī ngam chöngö.

¹⁷Ngaich yē hī pöri ayī-ö kôti tököölö fālen, i saha hī lukkenre halööklöngö in Kristū, mameukṙen kanöölö ang Kristū? Öt halöng An ngam Tēv.

¹⁸Yē chu öre hēk mānlö nup tiṙōlngöre, hameuktöre chū-ö ngaich töfāluṙen

¹⁹Pò chu lökten im chöngö kapah im chöngö, pò chu hòṅ aṅ im Tēv.

²⁰Ngaich chin harātu hol Kristū; sön chu-ö aṅ: rö-ö pöri ōtre öich chū-ö, tön Kristū tö aṅ nö in chu: ngaich ngam anaha chu töngamuh ing alaha, aṅ chū-ö im mikah, ngam mikah im Kūön ngam Tēv, ngam töhāngenlōn tö chu, kēngöre inrē töpôkūö chu.

²¹Rö-ö chin hachökngö alaha ngam inlōnti aṅ im Tēv; yē ngam lanöökö öre nö lamökten im chöngö, ngaich Kristū nö chök alaha nö kapah.