Read Car_Nicobarese KALATĪ 3 Bible Online

KALATĪ 3 - Car_Nicobarese bible

KALATĪ 3

¹Ō töt akaha aṅ Kalatī, achīö öp vamīngen yīö? I kūö chīö ök Kristū nö ngāṅlnyi nö harātu?

²Hòṅ akahalōn chin tö ngih in yīö. Teūngen öi tö ngam Töhet Fanöinylö lökten i tī ngam chöngö, hēk lökten i hināngö ngam mikah?

³Yahngö öt mikah öyih? Ngaich yih rĕhlöre im Töhet Fanöinylö, ngaich töngamuh hòng hateungngö ngam alaha?

⁴Chök alaha öi, ngih ṙôken kanihngen? Yē e nö kô-òngrit nö chanök alaha.

⁵Lökten Anga-aṅ ngam mameukṙen yīö tö ngam Töhet Fanöinylö, la-en tö nup pinngangkūö inrē nö in yīö, lökten i tī ngam chöngö ang, hēk, lökten i hināngö ngam chöngö ṙöng?

⁶Sā Aprahām nö ṙātö ellōnre nö im Tēv, ngaich kaheuktu angū-ö nö lanöökö nö in ò.

⁷Akahalōn yin lökten tö cha vē aṅ im mikah, cha-a yin kūön Aprahām.

⁸Ngaich ngam töhet līpöre nö urĕh tö mat, tö ngam Tēv nö halööklö vē Tahëng mihëṅṙö tarik nö lökten im mikah, urĕh nö ahangkö ngam tölöök inhānga nö in Aprahām, nö ngö ṙô, In meh yin min vē taṙòkhöre tarik nö tökôlò.

⁹Lökten cha vē aṅ im mikah nö tökôlò nö hol ngam tökô-en Aprahām.

¹⁰Iṙôngö yip aṅ vinī-iṅ ngam chöngö, elkatòh ngam öt inkôlò cha-a; pòn ngö kinūichngö, Tötkôlò yin nö ṙòkhöre vē töt iṙuhen nö i nup tö kūichi i mat ngam līpöre chöngö, nö la-evṙen tö u.

¹¹Akaha an nö ngaich, tö tarik nö öt inlööklu nö i kūö ngam Tēv nö lökten im chöngö: pò, Vē tölöök nö lökten im mikah nö aṅ;

¹²Öt aṅ im chöngö an ngam mikah: ngòh tö la-evṙen tö u aṅ min nö in u.

¹³Ṙānyu in tö Kristū ṙā-ang im ötinkôlò aṅ im chöngö; vītöre Anga-aṅ nö pòkūö hī nö ötkôlò: pòn ngö kinūichngö, Tötkôlò yin vē tökilölhak nö irōi chōn:

¹⁴Hòn löö i kui yip Tahëng mihëṅṙö tarik nö yih ngam inkôlò Aprahām, in Kristū Yēsū; hòṅ hī teūngen tö ngam kinlēḵngô ngam Töhet Fanöinylö, lökten im mikah.

¹⁵Kahōlö, sā ṙô tarik chin ṙô-òv: Pòrô öre angū-ö nöng kinlēḵngô tarik, ngaich yē e pöri nö haköpiyö öt hĕng tak tö kô nö hachökngö alaha e hēk, tapnyö e.

¹⁶Löö in Aprahām min minë kinlēḵngô, ip lamökngörit ò inrē. Öt ngö ṙô Anga-aṅ, Löö i yip lamökngörit, nö sā tömaṙôngö; sā tö hĕng tak pöri, Löö ip lamökngörit meh, Anga-aṅ ang Kristū.

¹⁷Angū-ö an ṙô chu, Ngam kinlēḵngô ngam Tēv nö urĕh nö haköpiyö, ötkô ngam chöngö nö fingö e, ngam chöngö tökētu unôichrit töfënòng lūöi anāi samyeūheu, nö rāinyngö ngam kinlēḵngô.

¹⁸Yē ngam amin nö aṅ im chöngö, ngaich öt aṅ im kinlēḵngô angū-ö. Löö in Aprahām tī pöri ngam Tēv nö kētöre, lökten im kinlēḵngô.

¹⁹Asuh öng pökeh ngam chöngö? Kētu an kūö tökööl, hanöng saha ngam lamökngörit nö yih, ngam lööṙö ngam kinlēḵngô; lökten i ma-ahānga angū-ö nö kētuvö, nö eltī ngam aṅhôi.

²⁰Öt höng mī-i hôi tö hĕng tak an ngam ma-ahôitöre; hĕng tak pöri ngam Tēv.

²¹Lökten öng ngam chöngö nö lā-al ngam kinlēḵngô ngam Tēv? Ötkô nö ngatī. Yē ngam chöngö nö ngaich nö kētu nö mahaṅaṅ, ngaich ngam lanöökö öre, nö lökten im chöngö.

²²Ngam ṙô ngam töhet līpöre nö vë-eny nup taṙòkhöre nö elkatòh ngam tökööl, ngaich ngam kinlēḵngô, lökten im mikah in Kristū, nö kô-òren nö kētu nö in cha yip ṙamātö ellōnre.

²³Urĕhēkūö yanihih ngam mikah pöri, ngaich haköpiyö ayī-ö latuhēt el katòh ngam chöngö, Öpikūö im mikah, ngam tö hameuktu nö unôich.

²⁴Lökten an ngam chöngö misī nöng mahaköpten hī, nö kēten hī in Kristū, pò hī hōtu halööklöngö in Kristū.

²⁵Ngaich panchö ngam mikah nö yih, ngaich öt ngöhören ayī-ö elkatòh ngam mahaköphöti.

²⁶Pò yīö ṙòkhöre kūön ngam Tēv, lökten im mikah in Yēsū Kristū.

²⁷Pòn i tumtak yip tövōkö nö in Kristū, ngaich nö īnu tö Kristū.

²⁸Ötkô nö Yahūtivö, ötrēhĕn nö Krīkuvö, ötkô nö töhakövuvö, öt rēhĕn nö töt hakövuvö, ötkô nö kikōnyuvö, ötrēhĕn nö kikānuvö: pò yīö ṙòkhöre höng hĕng tak in Kristū Yēsū.

²⁹Ngaich yē yīö aṅ in Kristū, ngaich yī-ö kūön Aprahām, tö-amīnu sā ngam kinlēḵngô.