Read Car_Nicobarese KALATĪ 4 Bible Online

KALATĪ 4 - Car_Nicobarese bible

KALATĪ 4

¹Ngih ön ṙô chu, I saha ngòh tö amīnuvö nö ṙòngmö nyīö, öt harīkngöre anga-aṅ tö yip mahalanṙen; pòrô anga-aṅ nö töchehevṙen tö taṙòkhöre.

²Elkatòh yip amahtöre pöri, yip yōm chehen inrē, hanöng saha ap hē tī ngam yöng,

³Ngatī in ayī-ö inrē, hē hī misī ṙòngmö nyīö, ngaich haköviyö elkatòh në aṅ ngih panam.

⁴Hē sanölta ngam ṙētak pöri, tīntö ngam Kūönre ngam Tēv, kayôḵnyu tö kikānö, kayôknyu nö elkatòh ngam chöngö;

⁵Pòn hōtu Anga-aṅ nö havaha cha yip më-elkatòh ngam chöngö; pò hī hōtu teūngen lālö öi kūön.

⁶Pò yīö ngaich kūön, ngaich ngam Tēv nö tīntö ngam Töhet Fanöinylö ngam Kūönre nö ellōn yīö; lökten yīö ngö ṙô, Appa, Kayöngö.

⁷Lökten meh öt ngöhören mahalanṙen, kūön pöri, ngaich yē meh kūön, ngaich tö-amīnu lökten im Tēv.

⁸Hē e pöri yī-ö hakövö tö u nup nehngenre nö öt Tēv, öt akahakūö tö ngam Tēv:

⁹Ngaich pöchö yin akahakūö tö ngam Tēv, hēk, akaha tö ngam Tēv, sitih öi hēk havantöre im töt kalēḵen tötkôlò öt mikah, ngam chūök lōn yīö hòṅ hakövö hēk?

¹⁰Haköpkö nup sakāmö yin yih, chingëṅt, ṙētak, samyeūheu inrē.

¹¹Pa-ekūö chin tö yīö, öich höng lökngö yô-òv min chök alaha tī la-evṙen in yīö.

¹²Kahōlö, vë-ekūö yīö chin, sā chu yin, tö sā yīö chin chū-ö, rö-ö yin chōichö tī in chu:

¹³Akahalōn yin, tön kūö öt kumlēḵen ngam alaha, öich ahangkö ngam tölöök inhānga in yīö la-eurĕh:

¹⁴Ngam kinlaha yīö i alaha chu, rö-ö yin öt chumkūöṙen tö chu, ötrēhĕn öi sōḵanga; hōḵen chu pöri yī-ö ngaich, sā ma-ahānga aṅ im Tēv, sā Kristū Yēsū.

¹⁵Isuh öp pökeh nöinyö yīö? Tön eūken yīö chin chu-ö, tö yīö kô-òren peôknyö matre ngaich kētö u nö in chu.

¹⁶Ngaich tö kunyahaṅ elmat hòng chu-ö tö yīö, pò chu vë-enynang yīö tö tökô-en?

¹⁷Öt i tölöök talöökö cha-a nö kalēḵĕlōn nö chöhö yīö; hö-ö, hòṅ öpngökūö yīö yip, pò yīö hōtu chöhö cha.

¹⁸Tölöök pöri ngam kumlēḵlōn, chinöhö, örheūheu i nup tölöökö inlahen, öt höng hē chu ngöh in yīö.

¹⁹Yī-ö kun kūön chu, kayôḵòiny chu hēk, hanöng saha Kristū nö vītöre nö in yīö.

²⁰Hôṅ, yik chin hòṅ in yīö töngamuh, öich haṙīngö ṙôre, pò chu kihngen ellōn tö yīö,

²¹Vë-enynang chu yin yī-ö, tö hòṅ elkatòh ngam chöngö, Kūöyòh öi öt hang ṙô ngam chöngö?

²²Pò e nö ngö kinūichngö, tö Aprahām nö nët tak kūön; hĕng tak lamökten ik mahalanṙen kikānö, hĕng tak lökten ik töt hakövö kikānö.

²³Tö sā finötnyö tarik pöri, ngam kūön ngam mahalanṙen, lökten im kinlēḵngô finötnyö pöri ngam kūön ngam töt hakövö.

²⁴Inchōḵoṙô an angū-ö, pò nā kikānö nö tö nët nö kinlēḵngô, hĕng tak ngam ṙāma-ang kui ngam rôngö Sīnai, kūön tö töhakövö, ang Hakār,

²⁵Pò Sīnai nö rôngö nö i Arēpiā. Ngaich lā-al Yerūsalem töngamuh; pò ò nö im inkövö tö yip kūön ò.

²⁶Ngam lamātulöng pöri Yerūsalem nö töthakövö, ngam kikānö yöng hī.

²⁷Lökten nö ngö kinūichngö, Ṙāmölōn man me-eṅ tötmikūönlö, kaknyöre tikökṙôre, me-eṅ tötkamyôḵ; tön mööḵlö yip kūön ngam töṙā-ai, tö yip kūön ngam töpīhövö.

²⁸Kahōlö; ayī-ö in, tö sā Isak, öi kūö ngam kinlēḵngô.

²⁹Ngaich sā ngam töfötnyu tö tarik, nö öthakôlò ò ngam töfötnyu tö ngam ma-alaha, ngatī an töngamuh.

³⁰Sitih ṙô pöri ngam töhet līpöre, Ahōngö ngam mahalanṙen kikānö, töm kūön ò inrē. Pòn ötkô ngam kūon ngam mahalanṙen, nö amīnu nö hol ngam kūön ngam töt hakövö.

³¹Lökten, kahōlö, rö-ö in ayī-ö kūön ngam mahalanṙen, kūön ngam töthakövö pöri.