Read Car_Nicobarese KALATĪ 5 Bible Online

KALATĪ 5 - Car_Nicobarese bible

KALATĪ 5

¹Aṅtītö ṙinānyö an Kristū nö ṙānyen yīö, lökten yin haköpöre sökhaka, ui hēk vönta im kaneun ngam inkövö.

²Yĕh meuk, Pôl chin chu-ö töṙô-òv tö yīö, yē yīö öi tunyīnyi, öt kanôluṙô tī An min Kristū tö yīö.

³Hôṅ, hēk chin kö i tarik hameukhötī, tö ngòh tötūnyīnyi, tö ò nö tö hötṙehevö nö keuheūtlöre kūö töm chöngö.

⁴Tököhngen yin ngaich tö Kristū, yī-ö tö hòṅ halööklöngö lökten im chöngö, sukngöre yin ngaich ṙā-ang im inlōnti.

⁵Pò hī lökten im Töhet Fanöinylö, i ngam mikah hökkö ngam mineūka ngam inlöökö.

⁶Pòn öt kanôluṙô nö in Kristū nö rēhĕn ngam tunnyinyngö, ötrēhĕn ngam töt tunnyinyngö mikah pöri tö tī-iv lökten im hanāngenlōn.

⁷Löököröön yin ngaich fal; achiāp ma-asānngen yīö öi hōtu ahôngen ngam kanô-en?

⁸Öt lökten ngam mahavëten yīö an ngih linīpö nö yih.

⁹Rahëichyen öp inföhlö, keuheūtlöre fanöhlö tī töm tö hĕng mumūlö.

¹⁰Lā in yīö nyanatlö chin im Mā, tö yīö öt tahëngulōn: keun ngam kinṙôka an min aṅ in Ò, ap mahakihten yīö, achīö nö pòrô anga-aṅ.

¹¹Kahōlö, yē chu pöri ṙòngmö ahangkö ngam tunnyinyngö, kūöyòh öich ṙòngmö öthakôlòngṙô? Ngaich panchö ngam insātö ngam töhakālö nö kē-ĕyö.

¹²Yik chin tö yip kumtöngken yīö nöng lūk nö rökngenre nö ṙā-angre nö in yīö.

¹³Pò yīö, kahōlö, havëtu im ṙinānyö; un kēka ngam ṙinānyö yīö nö i lōn ngam alaha, lökten im hanāngenlōn, kö kamūönkūö höö.

¹⁴Tön keuheūtlöre an ngam chöngö nö in ngih tö hĕng ṙô, ingih; Hāngenlōn man tö holre sāre töre,

¹⁵Yē yīö pöri kāpöhöö, kö kā-a höö inrē, haṙēmngenre hòṅ yīö öt keuheūt tö kūö höö.

¹⁶Ngih ön ṙô chu, Talöökö tö ngam Töhet Fanöinylö, hòṅ yīö min öt hateungngö lōn ngam alaha.

¹⁷Pò ngam lōn ngam alaha nö lā-alkūö ngam Töhet Fanöinylö, ane inrē ngam Töhet Fanöinylö nö lā-alkūö ngam alaha; pò u nö kö harīkngöre tö höö; lökten yīö ötkô öi la-evṙen tö nup lōnre.

¹⁸Yē yīö pöri hachōḵo tö ngam Töhet Fanöinylö, ngaich öt elkatòh ngam kui yī-ö.

¹⁹Hameuktu nun në la-en ngam alaha, në nun yih: Chinô-òṅkānö, chanôichö, ötmiṙē-ĕv,

²⁰Vinë-eṅkūö insātēv, milūönö, kumnyahelmat, lanīnö, minūötngö, tanāinyö, linā-alkūö, inköhngen, inrēvngöre.

²¹Kumnyahlōn, hinyōiyö, inpōho, nup tö ngatī inrē. Ngāichô chin hatūinyôre tö yīö, tö vē töngatī la-en: nö ötkô min nö aminuvö tö ngam pūlngö ngam Tēv.

²²Në pöri ṙòng ngam Töhet Fanöinylö. Hanāngenlōn, ṙanāmölōn, lanāmö, manöiyö, miṙēlōn, lanöökö, kanô-en.

²³Ṙanëmen, inyöngöre; öt lāḵlu nun anū-ö tö chöngö.

²⁴Ngaich cha-a yip aṅ in Kristū Yēsū nö ngaich nö fëlngö ngam alaha, tö nup töchōich lōn e inrē.

²⁵Yē hī iyöng im Töhet Fanöinylö, ta-a töi lök im Töhet Fanöinylö inrē.

²⁶Ta-a, uh in im tötöl ineū-euṅ, öi harunnyö lanīnö höö, kunyahaṅ elmat tö höö inrē.