Read Car_Nicobarese KALATĪ 6 Bible Online

KALATĪ 6 - Car_Nicobarese bible

KALATĪ 6

¹Kahōlö, yē öp hĕng tak tö kôti nö i tökööl fālen, halööktö töngatī, hol tö inyāichngö ellōn, ngëichköre me-eṅ, hòṅ meh inrē tö kalaha.

²Keunhökūö höö yin tö lumnganre, ngaich ngatī hateungngö chöngö Kristū.

³Yĕn hĕng tak tarik tö kiröng tö lōnre, yē ò nöng tö rö-ö, hachīlöre an anga-aṅ

⁴Kö hameuktö la-enre pöri yēḵ vē tarik, ngaich anga-aṅ min nö ineū-euṅvö nö in re nöng hĕng taka, rö-ö nö ineū-euṅvö tö aṅ i yip holre.

⁵Pòn höng kö keun kumre ngòh tö hĕng tak.

⁶Hökngen ngam tö haköptuvö pöri yēḵ nö meukṙen ngam mahaköptöre.

⁷Un hachīlöre; töt hanyëḵngen an ngam Tēv: hamūl ṙòng taneūichre ön min ngòh tarik.

⁸Pò ngòh tameūichhöti nö i alahare nö hamūl nup tötkôlò aṅ i alaha: ngòh tameūichhöti pöri nö im Töhet Fanöinylö, hamūl ngam tö örheūheu-aṅ nômö aṅ im Töhet Fanöinylö.

⁹Ta-a inrē, ui uhā-en i tölöök vahīṙen: tön ip tölöök ṙētak in min hamūl, yē hī öt cheingö.

¹⁰Ta-a lökten, töi lök i tölöök i taṙòkhöre tarik, isaha hī löktuṙen, möthë lōn tö vē aṅ patī ngam mikah.

¹¹Yĕh meuk ṙôkö mat ngih līpöre kahūichtö chu in yīö, aṅtī tö në kuntīre takô.

¹²I tumtaka yip tö hòṅ ineū-euṅv nö im alaha, cha-a yip hamôten yīö tunyīnyi; pòn höng sōḵ cha-a nö öthakôlöng ṙô tö pôkūö ngam töhakālö Kristū.

¹³Pò cha cha-a, yip tö tunyīnyiyö nö ötrēhĕn nö haköp ngam chöngö; hōten yīö pöri cha-a öi tunyīnyi, pòn hòṅ ineū-euṅv cha-a nö i alaha yīö.

¹⁴Uh chin yēḵ chū-ö eū-eure, höng im töhakālö ngam Mā hī, Yēsū Kristū; ngam lökngen ngih panam nö kapah nö in chu, kapah chu-ö inrē ing panam.

¹⁵Tunnyinyngö, öttunnyinyngö inrē, höng öt harīkngöre; tufömngöre pöri nö tarik.

¹⁶I tum tak yip lamök i ngih chöngö, kumchikṙen yēḵ in cha, neūkölōn inrē, cha-a yip tökô-en Israĕl ngam Tēv.

¹⁷Töngamuhangen un hĕng tak mahacheiken chu, tön aṅhaṅv alaha chin tö në minkahngö Yēsū.

¹⁸Kahōlö ngam inkôlò aṅ im Mā hī, Yēsū Kristū, holtöṙah ngam ma-alaha yīö yēḵ Āmen.