Read Car_Nicobarese EFISÖS 2 Bible Online

EFISÖS 2 - Car_Nicobarese bible

EFISÖS 2

¹Ngaich yī-ö ha-aṅhaṅ, hē yīö ngaich kapah, kūö tinölngenre, tökööl inrē,

²Lahök yīö sin lā-urĕh, asā inlahen ngih panam, asā ngam mā ngam minhôiṅyö ngam kuföt, ngam sī-ö töla-evṙen töngamuh i yip kūön minôṙô;

³In cha in misī ayī-ö iyöng, i lōn alahare, la-evṙen tö nup lōn ngam alaha, lōn ngam ellōn inrē, ngaich nehngenre kūö ngam lanīnö, sā yip inrēngöre:

⁴Pōyen kanôlò pöri ngam Tēv tö neūkölōn, pò ngam yöng hanāngenlōn, ngam hanāngenlōn Ò tö hī,

⁵Pòrô hē hī ngaich kapah kūö tököölre, ha-aṅhaṅ hī Anga-aṅ hol Kristū lökten inlōnti yin ngaich hayöökaṙen,

⁶Ngaich hachohlen hī hol Ò, ngaich ha-ūichlen hī hol Ò el halīöngö, in Kristū Yēsū:

⁷Hòn ip ṙētak Anga-aṅ nö hameuktö ṙôkö kanôlò ngam inlōnti aṅ in Ò, i miṙēlōn tö hī, in Kristū Yēsū:

⁸Pò yīö kūö inlōnti ngaich hayöökaṙen lökten mikah; rö-ö nö aṅ in yīö angū-ö: aṅ im Tēv an inlōnti:

⁹Öt aṅ i la-en, hòṅ tarik nö öt eū-eure.

¹⁰Pò hī ayī-ö, aṅ vanī-iṅ Ò, vīlöngö in Kristū Yēsū kūö tölöök la-en, minë halēnngö ngam Tēv misī, pò hī hōtu lök in u.

¹¹Lökten yin köpölōn, tö yīö misī, Tahëng mihëṅṙö im alaha, öi töt tunyīnyi tö ṙô yip tö Tunyīnyi, i alaha, vahī kuntī:

¹²Tö yīö inrē hē e köhngen tö Kristū, tumhëngi töm kui Israĕl, öt aṅ im kinlēḵngô, öt maheūṅkku, öt Tēvu inrē ing panam.

¹³Ngaich pöri töngamuh in Yēsū Kristū, yī-ö tömarôvat sin misī, ngaich öi haröhtu im mahām Kristū.

¹⁴Pòn Anga-aṅ inlöök hī, vamīngö tö nët nö hĕng, ngaich tiṙōlngö ngam lāṙat tanangkūö,

¹⁵Keuheūtngö ngam kumnyah elmat im alaha, ngam fālen minë chöngö, aṅ im inchöngten; pòn hòṅ in re tī nö vī-il tö nët nö hĕng, tufömngöre tarik, ngaich halöök;

¹⁶Ngaich halāmten cha nö nëtre nö hēngö alaha nö im Tēv lökten ngam töhakālö, tö kinheūṅtenre nö fëlngö ngam kumnyah elmat, nö aṅtīten tö Ò:

¹⁷Ngaich yih Anga-aṅ nö ahangkö lanāmö in yīö, yī-ö tömarôvat, lanāmö inrē in cha yip töröhta:

¹⁸Pò hī lökten in Ò, lökhötvö, im Yöng, im Töhet Fanöinylö.

¹⁹Rö-ö yin aṅ tahëng, yamih inrē; hamòl pöri yī-ö, öi i yip töhet, aṅ patī ngam Tēv inrē.

²⁰Pòi mānlöngö sā patī, i kui chūökrööntö machööḵlö yik tanīnöṙô, pròfĕt inrē: ihong ang Kristū Yēsū nö yöngkūö sinkeukngö:

²¹In ò an ngam patī nö lööken tināpö, ṙuhölre ngaich nö töhet chūök ngam Mā Tēv.

²²In ò yī-ö inrē vīlöng öi elyöngö ngam Tēv, im Töhet Fanöinylö.