Read Car_Nicobarese EFISÖS 3 Bible Online

EFISÖS 3 - Car_Nicobarese bible

EFISÖS 3

¹Angū-ö an lökten chu chu-ö Pôl, öich tökē-ĕ tö Kristū Yēsū, pòkūö yīö yī-ö Tahëng mihëṅṙö,

²Yē yīö kô ngaich ngam min chööḵngö lökten ngam inlōnti aṅ im Tēv, nö kētu nö in chu, nö kanôlò yīö;

³Sā ṙô chu ngaich rahëichyen ṙô tö yīö urĕh, tö e nö lökten inmeuktö, öich mikahtulōn tö ngam ötmikahkūö sin.

⁴Kô-òren yin akahalōn, yē yīö ve-ekūö nup tökūichö, tö tölngö mikahlōn chu tö nup ötmikahkūö sin in Kristū.

⁵Ngam tötkeuheūttöre nö mikahlōn yik mu-urĕh tumkölchap kūön tarik, nö sā inmeuktö e töngamuh nö i yip töhet tanīnöṙô Ò, pròfĕt inrē, lökten im Töhet Fanöinylö;

⁶Tö vē Tahëng mihëṅṙö nö hol nö tö-amīnuvö, hol nö tūmö ngam alaha hol nö michöḵö tö ngam kinlēḵngô in Kristū Yēsū, lökten im tölöök inhānga.

⁷Angū-ö lökten chu vītu mameukṙen, sā ngam inlōnti inlöngten aṅ im Tēv, ngam kine-ekūö chu, sā la-en ngam minhôiṅyö Ò.

⁸In chu chu-ö manā-angkūö yip tökūöṅnö i yip taṙòkhöre töhet, ngih inlōnti nö kētu nö in chu, öich mikahten vē tahëng mihëṅṙö tö nup tötkanṙeūken kanôlò Kristū,

⁹Ane inrē halööktömat mameuk ngam minchöḵö ngam ötmikahkūö sin, ngam töha-ehelen nö ngaich nö hayunngöre nö im Tēv, ngam vamīlö taṙòkhöre.

¹⁰Pòn hōtu töngamuh nö mikahtulōn yip yöngṙen tömihôiṅ inrē el halīöngö nö lökten ngam Māṅ, tö ngam töṙōlkangen mikah ngam Tēv,

¹¹Sā ngam töha-ehelen lōn Ò, ngam mi-in Kristū ngam Mā hī tī Ò.

¹²Ngam chūök hī ötpinhe-eṅvkūö, ane inrē yih im inyönglen, lökten ngam mikah hī in Ò.

¹³Sōten yīö chin uha-en i në kanihngen chu tö pòkūö, në kanôlö yīö.

¹⁴Angū-ö an lökten chu, simtö kui kinmônöre im Yöng,

¹⁵Ngam töminënyu tö nët taṙòkhöre miyöngö, el halīöngö, el tumlat inrē;

¹⁶Hòṅ Ò nö kē-ĕkūö yīö sā ṙôken nup kanôlò Ò, hòṅ yīö hangëka tö ngam kanô-òṅ, lökten im Töhet Fanöinylö, im latuhēt nômö;

¹⁷Hòṅ Kristū, lökten im mikah yīö, nö iyöng ellōn yīö; hòṅ yīö ṙĕhtöre, ultöre im hanāngenlōn.

¹⁸Hòṅ yīö kalēḵ ṙapngötīre hol yip taṙòkhöre töhet, akahalōn tö ngam ṙôktāk, rôta, rôlòng, ṙū-uti,

¹⁹Ane inrē akahalōn tö ngam hanāngenlōn Kristū, ngam chamööḵngö mikah, hòṅ yīö tööḵlö tö nup taṙòkhöre tanööḵlö ngam Tēv.

²⁰In ngam tökô nö mötlötī tö nup taṙòkhöre havëkö hī, afēkö hī inrē, sā ngam kanô-òṅ ngam töla-evṙen nö in hī.

²¹Kanôlò Ò yēḵ, ing Māṅ, in Kristū Yēsū inrē, söl môkö örheūheu Āmen.