Read Car_Nicobarese EFISÖS 4 Bible Online

EFISÖS 4 - Car_Nicobarese bible

EFISÖS 4

¹Lökten chin chu-ö, tökē-ĕ töpôkūö ngam Mā, vë-ekūö yīö, öi löökö inlaha, lök im invëkö yīö, ngam invëkö yīö ngaich.

²Holtö inyāichngö, ṙanëmen, manöinyö, ṙināpö höö im hanāngenlōn,

³Kalah haköp ngam hinëngö aṅ im Töhet Fanöinylö, nö nyanëkngö tö lanāmö.

⁴Höng hĕng an ngam alaha; hĕng ngam Töhet Fanöinylö; höng sā invëkö yīö inrē, im tö hĕng mineūka ngam invëkö yīö.

⁵Hĕng tak Mā: hĕng mikah, hĕng vinôkö.

⁶Hĕng tak Tēv, Yöng taṙòkhöre inrē, ngam mi-ikui taṙòkhöre, lamök i taṙòkhöre, mi-i taṙòkhöre inrē.

⁷Kö kahĕng tak in ayī-ö kē-ĕvkūö tö ngam inlōnti, sā ṙôken tī Kristū nö kētö e nö in hī.

⁸Lökten e nö ngö ṙô, Hē Ò nö yônlö nö lātulöng, hachōḵ yip tökē-ĕ Anga-aṅ; ngaich kētö inlōnti nö i tarik.

⁹Yônlö Anga-aṅ, asuh öng angū-ö, tön kūö Ò ngaich nö yônti nö lātaṙeūḵ töng panam?

¹⁰Ngam yamônti, Anga-aṅ An, ngam yamônlö inrē nö lātulöng töm halīöngö, hòṅ Ò nö hatööḵöl në taṙòkhöre töre.

¹¹Anga-aṅ inrē kamëtö tanīnöṙô, pròfĕt, mumkahten, yōm, mahaköphöti inrē;

¹²Nö inteungten yip töhet, nö im la-en mineukṙen; nö minānlö ngam alaha Kristū inrē.

¹³Tö iṙūöhen an angū-ö, hanöng saha hī sölta im hinëngö ngam mikahkūö tö ngam Kūön ngam Tēv inrē; hanöng saha sanölta hī im tölngö ṙôkö tarik, i rôlòng sanööḵngö Kristū.

¹⁴Hòṅ hī öt sā nyīö, öi hëmngö, heuingö inrē, i inköphöti inchīlö tö tarik, i huneū-en inchōḵngö im tö vaich.

¹⁵Hòṅ hī inrē öt michūṙen im hanāngenlōn, ngaich sīöplöre i nup taṙòkhöre in Ò, ngam kui hī, Ang Kristū;

¹⁶Lökngörit in Ò an ngam alaha nö lööken tinapti nö hamūlö, lökten i nup taṙòkhöre tanap, sātölngö la-en ngih töhĕng, ṙūöhlö ngam alaha i minānlö e im hanāngenlōn.

¹⁷Lökten chin ngö ṙô tö ngih, ane inrē ve-ekūö yīö, i minë-eny ngam Mā, hòṅ yīö öt ngöhören, sā lahök yip Tahëng Minhëṅṙö, im lōn cha chanök alaha;

¹⁸Sangulköti nup mikah cha, ngaich tangngöre nö im nômö aṅ im Tēv, kūö ötmikah cha, ingëḵeng ellōn cha inrē,

¹⁹Yip töngaich nö öt sinrōngukūö, kēḵngöre nö im ötmiṙē-ĕv, nö la-evṙen tö nup taṙòkhöre töchōich, holtö yinikhanga.

²⁰Öt ngatī haköp pöri yī-ö in Kristū;

²¹Yē yīö ngaich hang ṙô Ò; haköptu in Ò inrē, sā ngam kanô-en nö aṅ in Yēsū.

²²Hòṅ yīö ṙāngö nup mu-urĕh inlahen yīö ngam höteh tarik, ngam tötkôlò i nup tötlöök lōn inchīlö;

²³Hòṅ yīö tumfömlöngö im inyöngö ellōnre;

²⁴Hòṅ yīö kēḵ ngam tufömngöre tarik, ngam tövīlöngö nö sā ngam Tēv, im lanöökö, hanëtö inrē, aṅ im kanô-en.

²⁵Lökten ṙāngö minyôinyaṅ, kö kô-òṙô in höö, tön töhēngö alaha in ayī-ö.

²⁶Līn yin, uh pöri köölö fālen; un meutti ngam tavūöi tö rôta lanīnö yīö.

²⁷Un rēhĕn nö kētu chūök ngam sī-ö.

²⁸Hökngen ngam mu-ulāiya nö un ulāiya nö hēk; hökngen ò pöri lahëḵ nö la-evṙen, hakôtö tīre tö tölöök, hòṅ ò nö huveū-en nö kē-ĕkūö ngam tötkôlò.

²⁹Un töchōichu ṙô, löknyö elvāng yīö; öp tölöök pöri, hòṅ e nö hinòlṙen, kanôlò cha inrē yip hamang.

³⁰Un miṙīvilōn ngam Töhet Fanöinylö ngam Tēv; tön Anga-aṅ An mumkahngen yīö hanöng saha ngam sakāmö ṙinānyö.

³¹Hökngen nup taṙòkhöre kumnyahlōn, tanānyö, lanīnö inrē, hinūkö öt linëkö, holtö nup taṙòkhöre tötlöök, nö ṙā-ayö nö in yīö.

³²Kö aheuk tö höö, aṙē-ĕlōn, kö aṙēlen höö, sā ngam Tēv inrē nö aṙēlen yīö lökten in Kristū.