Read Car_Nicobarese EFISÖS 5 Bible Online

EFISÖS 5 - Car_Nicobarese bible

EFISÖS 5

¹Lökten yin yĕh asīnken ngam Tēv, sā yip kūön töhanghuṙen.

²Lök im hanāngenlōn, sā Kristū nö hāngenlōn tö hī inrē, ngaich kēḵngöre töpòkūö hī, tökētuvö nö im Tēv, nö tö tahūsa, töhōḵov inrē.

³Sā yīö töhet, un minënyuvö nö in yīö, insĕhha, taṙòkhöre töchōich, yinikhanga inrē;

⁴Unrēhĕn chanôichö, un rēhĕn nup töng yô-òv ṙô, nup tö-öt lööken, lahëḵ pöri ngam nöinyö,

⁵Akahalōn takô yin tö ma-asĕhha, tö chōich tarik, yamikhanga ngòh vamë-ekūö insā tēv nö öt amīnuvö tö ngam pūlngö Kristū, ngam Tēv inrē.

⁶Un tarīkuvö mahachīlö yīö, i minyôinyaṅ ṙô; tön kūö u an ngam lanīnö ngam Tēv nö yih nö i yip kūön töminôṙô.

⁷Lökten yin yī-ö, ui hanôltöre in cha;

⁸Tön më-el sinngūlö yin misī; ngaich pöri töngamuh el hanātö, im Mā: lök talöökö yip kūön hanātö yin.

⁹(Pò nup ṙòng aṅ ngam hanātö, nup taṙòkhöre, nö tölöök, ötmichūṙen, kanô-en inrē),

¹⁰Kalah nup ṙanāmölōn ngam Mā.

¹¹Uh pöri hanôltöre i nup tötṙôngu la-en ngam sinngūlö; lahëḵ pöri vëkö u.

¹²Pò nup la-en u nö ulāikenre, nö pinyū-u ṙô kamhôṅka.

¹³Ṙòkhöre nun në tövëka nö hameuktu nö el hanātö. Ngam hanātö an mahameuktö u.

¹⁴Lökten e nö ngö ṙô, Aṅhen man, me-eṅ mahaṙòh. Choholre ṙā-ang i yip tökapah, ngaich Kristū min nö yang nö i kui meh.

¹⁵Haṙēmngenre yin i nup inlaha yīö; ui sā töt akaha, sā tö akaha pöri.

¹⁶Haṙënngö ṙētak; tön tötlöök nun në sakāmö.

¹⁷Lökten ui höng kulō-ov; akahalōn pöri tö lōn ngam Mā.

¹⁸Ui hiyōi tökūö vāin, ngam löknyö ötlanöökö. Tööḵlö pöri tö ngam Töhet Fanöinylö.

¹⁹Vë-ekūö höö i nup salmai, töhet tinkökö inrē; tikökṙôre, tikökhökūö ngam Mā, ellōn yīö.

²⁰Ha-öiny ngam Tēv ngam Yöng örheūheu, pòkūö nup taṙòkhöre, i Mine-eny ngam Mā hī, Yēsū Kristū.

²¹Kö ṙāpö höö, i pinhë-eṅkūö tö ngam Tēv.

²²Yī-ö kikānö töpihövö, un ahôngen më pihöre, sā mi-im Mā.

²³Pò ngam kikōnyö nö kui ngam kikānö, sā Kristū inrē nö kui ngih Māṅ; Anga-aṅ mahayööken ngam alaha.

²⁴Sā ngam Māṅ pöri nö elkatòh Kristū, ngatī yī-ö kikānö töpihövö elkatòh më pihöre i tökeuheūttöre.

²⁵Yī-ö kikōnyö töpihövö, hāngenlōn yin tö më pihöre, sā Kristū nö hāngen töng Māṅ, ngaich kēḵngöre tö pòkūö e;

²⁶Pòn hòṅ ahetlö e, ngaich nö ahëtö e nö husöich tö ngam mak holtö ngam ṙô,

²⁷Pòn hòṅ kētö ngam Māṅ nö in re, nö tövai, öt pintohov, öt nyichköre, hēk nup yô-òv töngatī: hòṅ e pöri nö töhet, öt pinṙôku.

²⁸Hòṅ ngatī hanāngenlōn yin yī-ö kikōnyö tö pīhövö tö më pihöre, sāre tö alahare. Ngòh töhāngenlōn tö pihöre hāngenlōn töre;

²⁹Pòn öt tarīku tösumrīk tö alahare; haṙūötken e pöri, lākö e, sā Kristū töng Māṅ;

³⁰Pò hī tūmö ngam alaha Ò.

³¹Angū-ö an lökten ngòh kikōnyö nö ṙāngö minā yöngre ngaich haköpngöre nö im pihöre; ngaich minā tö nët nö vīngöre nö hēngö alaha.

³²Yöng öt mikahkūö an angū-ö: ṙôten Kristū chinri tö ngam Māṅ inrē.

³³Kö hāngenlōn pöri yī-ö tö më pihöre, sāre töre; ngëicha ngam kikānö töpihövö inrē hòṅ ò nö pahë-e ngam pihöre.