Read Car_Nicobarese EFISÖS 6 Bible Online

EFISÖS 6 - Car_Nicobarese bible

EFISÖS 6

¹Yī-ö nyīö, un ahôngen më inyöngö im Mā: tön töhuveū an angū-ö.

²Milēḵṙen man tö minā yöngre (ngam raneh chöngö, holtö kinlēḵngô),

³Hòṅ meh lööken, ngaich marô-òten me-eṅ ing panam.

⁴Yī-ö inrē inyöngö kikōnyö, uh yin harunnyö lanīnö më kūönre: harūkö cha pöri im chinökṙen, inlēnö inrē aṅ im Mā.

⁵Yī-ö mahalanṙen, hang ṙô cha yip fehngenre nö ing alaha nö yöngṙen yīö, holtö pinhe-eṅkūö, kinchëiyöre inrē, kô-en i ellōn yīö, sāre in Kristū;

⁶Un höng tö hòṅ meūkö nö la-evṙen, sā mahaṙamlōn tarik; sā mahalanṙen Kristū pöri, la-evṙen tö lōn ngam Tēv, löknyö ellōn yīö;

⁷Holtö tölöök ellōnre la-evṙen, sā mī-im Mā. Öt i tarik:

⁸Akah töheichlōn tö nup töng löök la-en ngòh tö hĕng tak, anū-ö taneūngen ò min nö im Mā, yē ò nö pòrô nö töhakövö hēk kamahngenre.

⁹Yī-ö inrē yöngṙen, ngatī tī in cha, ṙap nup pinë-elkūö: akahtöheichlōn tö ngam yöngṙen yīö nyöre nö el halīöngö, öt tö atöltuṙen An tö tarik.

¹⁰Ngëḵ yin yĕh im Mā, töngamuhöten, im kumlēḵ ngam minhôiṅyö Ò inrē,

¹¹Kē nup taṙòkhöre aṅtī aṅ im Tēv, hòṅ yīö kô haköpöre lā-al nup huneū-en ngam sī-ö.

¹²Tön rö-ö in lā-al alaha, mahām inrē, öi tirīp; lā-al tö yip taṙòkhöre pöri sī-ö, yip mahayöng ngih sinngūlö lā-al yip tömaṙôngö tötlöök sī-ö lātulöng.

¹³Lökten keuheūtlöretī, kēḵ minë aṅtī aṅ im Tēv; hòṅ yīö kô lā-al, ip tötlöök sakāmö, keuheūthëṙen pöichö ngaich haköpöre.

¹⁴Lökten söklöre, nyëkṙatre tö ngam kanô-en, lanak elngòh tö ngam lanöökö;

¹⁵Kunröplöre tö ngam lanënen aṅ im inhangkö lanāmö.

¹⁶I nup tökeuheūttöre, kēḵ ngam mikah, nö lanaklö; hòṅ yīö kô hanyangngö kūö nup töhūkūö vöi ngam tötlöök sī-ö.

¹⁷Kēḵ ngam inyööken nö sapīöv; ngam sanët ngam Töhet Fanöinylö inrē, ngam ṙô ngam Tēv.

¹⁸Holtö vinë-eṅkūötēv, vinë-eṅlkui inrē, örheūheu vë-ekūötēv; īnu tö ngam Töhet Fanöinylö; hīnöre inrē, pītnyöre, vë-elkui taṙòkhöre inrē vē töhet;

¹⁹Vë-elkui chu inrē, hòṅ chu kēhötvö elvāng tö ṙô, hòṅ chu öt pinhë-eṅvkūö mikahtölōn tö ngam öt mikahkūö sin, aṅ im, tölöök inhānga,

²⁰Chu-ö, tanīnöṙô pòkūö e öich halöki. Vë-elkui chu, hòṅ chu öt pinhë-eṅvkūö in e, öich ṙô-òv, sā hinôtö chu.

²¹Hòṅ yīö pöri inrē akahalōn tö inlaha chu, Tikikös ap min mumkahtölōn yīö tö taṙòkhöre, ap hanāngenlōn nö hol, tökô-en inrē mameukṙen nö im Mā:

²²Ap tahīntö chu nö in yīö nö töchööḵnyö tö e, hòṅ yīö akahalōn tö inlahen ih, hòṅ ò inrē nö hangëkö ellōn yīö

²³Kunchikṙen yēḵ i yip kisānö, hanāngenlōn, holtö mikah, aṅ im Tēv Yöng, aṅ im Mā inrē Yēsū Kristū.

²⁴In cha an yēḵ nö ṙòkhöre ngam inlōntī, yip töhāngenlōn tö ngam Mā Yēsū Kristū nö im tötchinhūngö.