Read Car_Nicobarese FILIPĪ 1 Bible Online

FILIPĪ 1 - Car_Nicobarese bible

FILIPĪ 1

¹Pôl Timòtī inrē, töhakövö in Kristū Yēsū, yip taṙòkhöre i Filipī, töhet in Kristū Yēsū, holtö yip Pisköp, Tīkön inrē:

²Inlōnti yēḵ in yīö, lanāmö inrē aṅ im Tēv Yöng hī, aṅ im Mā inrē Yēsū Kristū.

³Ha-öiny ngam Tēv chin, yē chu afēken yīö,

⁴Örheūheu i nup ṙô chu vë-elkui yīö ṙòkhöre, holtö ṙanāmölōnre vë-elkui yīö;

⁵Pò ngam innôltö yīö i ṙinūönyö ngam tölöök inhānga, hē tök raneh sakāmö yīö kē-ĕ e, söl ing töngamuh.

⁶Ngaich chin nyātölōn takô, tö ngam ramehlö tölöök la-en nö in yīö, ngaich hateungngö e min hanöng saha ngam sakāmö Yēsū Kristū.

⁷Töhuveū-en an angū-ö nö in chu, öich ngatī lōn tö yīö ṙòkhöre, pò yīö ellōn chu; i nyinëkö chu, ane inrē i linaklö, inköpngö ngam tölöök inhānga; ṙòkhöre yin yī-ö hamòl chu, im inlōnti aṅ im Tēv.

⁸Ngam Tēv An ameūken chu, töṙôken lōn chu tö yīö, sā hanāngenlōn Kristū Yēsū.

⁹Ngih ön vahë-elkui chu, hòṅ ngam hanāngenlōn yīö nö ṙūölöre, im mikah, i nup taṙòkhöre inkaha inrē.

¹⁰Hòṅ yīö hameuktö nup tölöök; hòṅ yīö kô-en, öt īnu inrē tö töchōich, söl im sakāmö Kristū;

¹¹Tööḵlö tö ṙòng lanöökö, nup lamökten Yēsū Kristū, i kanôlò, nöinyö ngam Tēv.

¹²Hōten yīö chin töngamuh akahalōn, Kahōlö, tö nup taṙòkhöre famuk in chu, nö ṙinūölö ngam tölöök inhānga;

¹³Hòṅ ngam inkövö chu nö hameuktu nö in Kristū, ṙòkhöre chūök i yip amahtö kamhòṅka, i yip taṙòkhöre tahëng inrē;

¹⁴Pōyen yip kisānö im Mā inrē, nö hayönglenre lökten im inkövö chu, nö ṙūöhölre öttinrūṙuṙen, nö ṙô-òv tö ngam ṙô ngam Tēv holtö ötpinhë-eṅkūö.

¹⁵Rīkre yip ma-ahangken Kristū nöng kūö kumnyah elmat inrāinyngö inrē; rīkre inrē tölöökö ellōn:

¹⁶Hĕng ngam aṅ im hanāngenlōn pòn akahalōn tö chu lanaklö ngam tölöök inhānga:

¹⁷Ahangken Kristū pöri ngam tahëng nö hapungtöre, öt kô-en, lōn tö inchohlö inkihten chu pöri ing inkövö chu.

¹⁸Sitih pökeh? Höng angū-ö, nö kö löktöre inhangka Kristū, yĕn innyatkö elmat; hēk kanô-en: ṙāmölōn chu-ö in e, hôṅ; hòṅ ṙāmölōn chin.

¹⁹Pò chu akahalōn tö e min nö vītöre nö inyööken chu, i ṙô yīö vë-elkui, i mineukṙen inrē tö ngam Töhet Fanöinylö Yēsū Kristū,

²⁰Sā ngam tökô maheūṅkkö chu, mineūka inrē, hòṅ chu öt sinrōnguvökūö i tö hĕng, öt tinrūṙuṙen pöri, sā tö-örheūheu, hameuktu An töngamuh inrē Kristū nö ing alaha, chu, yĕn im unhôṅmö chu hēk im kinpaha chu.

²¹Pòn in Kristū ngam anāhaṅ chu, taneūngen, yē chu kapah.

²²Yēre pöri hòṅ aṅ ing alaha, yĕn angū-ö ngaich ṙòng ngam la-en, ngaich rö-ö chu-ö akahalōn tö atöllöre min.

²³El ngam töcheūkti chin i hôi minë tö nët, hòṅ lōnu tö ngināichö ngaich in Kristū; pò e angū-ö nö tö saṙaklöng anehten:

²⁴Hēk ötṙanāngen tal ing alaha ngöh tö pòkūö yīö.

²⁵Īnu chin tö e angū-ö inyönglen, akahalōn chin töre min ngöh, hôṅ, ngöh in yīö ṙòkhöre nö ṙanūölö yīö, ṙanāmölōn im mikah inrē:

²⁶Hòṅ ngam ineū-euṅ yīö nö pōyen im nganöhöh chu in yīö hēk.

²⁷Höng hökngen nup inlahen yīö nö töhōḵov, ngam aṅ im tölöök inhangkö Kristū: yē chu pöri pòrô in yīö, hēk rö-ö höng hòṅ hang inlahen yīö chu-ö, hòṅ yīö köp hēngö ellōn, hĕngrelōn pītnyöre tö kūö ngam tölöök inhānga,

²⁸Ui pinhe-eṅvkūö tö yip tökunyahaṅ elmat: ngam in cha minkahngö ötkanôlò, inyööken yīö pöri nö aṅ im Tēv;

²⁹Pòn kētu nö in yīö, nö pòkūö Kristū, öt höng ngam ṙinātö ellōn in Ò, tön kihngen inrē töpòkūö Ò:

³⁰Ngam maheuṅk yīö kanihngen in chu, ngaich hāngö töngamuh nö in chu.