Read Car_Nicobarese FILIPĪ 2 Bible Online

FILIPĪ 2 - Car_Nicobarese bible

FILIPĪ 2

¹Lökten yĕn ingëḵkuvö in Kristū, yĕn inṙāmulōn aṅ im hanāngenlōn, yĕn innôluvö aṅ im Töhet Fanöinylö, yĕn neūkölōnvö, miṙēlōn inrē,

²Hateungngö ngam ṙanāmölōn chu, hòṅ yīö hĕng re ellōn, īnu töm angū-ö hanāngenlōn;

³Un lökten inmūltö i tötlöök, hēk tötöl kanôlò, im inyāichngö ellōn pöri, kö taṙeūḵ tölōnre tö yip tahëng.

⁴Un kö höngkö nup in re yī-ö, kö ngëichkö nup i yip holre pöri yī-ö inrē.

⁵Aṅ ellōn tö ngih yin ngam mi-in Kristū Yēsū.

⁶Ngam nehngenre nö öt sā ngam Tēv, öt kaheuktö e nö raneushö töt ṙanāngen, nö hĕngren töm Tēv;

⁷Kēḵngöre pöri Anga-aṅ, ngaich kēḵ inlaha mahalanṙen, fötnyuvö nö sā tarik.

⁸Ngaich hē Ò nö meūkö nö sā tarik, hayāichngöre ngaich, hökngenre nö im kinpaha, ngam kinpaha im töhakālö.

⁹Lökten ngam Tēv nö hapōilen Ò, ngaich kētö Minë-eny Ò töp lamātulöng tö në minë-eny nö ṙòkhöre;

¹⁰Hòn i Mine-eny Yēsū në kui kinmônö nö simngöre, nö ṙòkhöre, nup aṅ elhalīöngö, aṅ el tumlat, aṅ lātaṙeūḵ töng tumlat inrē:

¹¹Hòṅ në taṙòkhöre litāk nö vë-eny tö Yēsū Kristū nö Mā, i kanôlò ngam Tēv Yöng.

¹²Lökten, kahōlö, sā yīö ngaich öt ahôngen, öt höng yē chu in, tön möthë yē chu rö-ö, vīlö inyöökenre yin, holtö pinhe-eṅkūö, kinchëyöre inrē;

¹³Tön ngam Tēv An töla-evṙen nö in yīö, hĕnghöre hōtö tö la-evṙen inrē, im tölöök lōn Ò.

¹⁴La-evṙen tö taṙòkhöre un uyëkuvö, un kil ṙô,

¹⁵Hòṅ yīö öt vinëkuvö, öt chökhu inrē, kūön ngam Tēv töt mirūnu, ellōn ngih tökuròk töminôṙô tūmö in cha yin meūkö sā ëāṅvö ngih panam,

¹⁶Kiṙapkö ngam ṙô ngam nômö; hòṅ chu löknyuvö ineū-euṅ hē ngam sakāmö Kristū, öich öt töchök alaha röön fal, öt töchök alaha la-evṙen inrē.

¹⁷Hôṅ, yē chu kētu im tökētu ane inrē mineukṙen ngam mikah yīö, ṙāmölōn chu-ö, ṙāmölōn hòṅ hol yīö ṙòkhöre:

¹⁸Ngatī yī-ö inrē ṙāmölōn, hol chu inrē ṙāmölōn.

¹⁹Meūka pöri chu-ö im Mā Yēsū tö tinīntö Timòtī nö in yīö öt ṙòktörevö, hòṅ chu chu-ö inrē ṙāmölōn yē chu akahalōn tö inlahen yīö,

²⁰Pò chu öt īnu tö tarik tö sā ellōnre, öp tökô-en chumkūökṙen tö inlahen yīö.

²¹Pò cha nö ṙòkhöre nö lukkenre, tö nup töt aṅ in Kristū.

²²Akahalōn pöri yī-ö tö ò, tö ò nö sā nyīö nö meukṙen yöngre, ngatī anga-aṅ nö hol chu nö meukṙen i ṙinūönyö ngam tölöök inhānga.

²³Lökten chin meūkkenre tīnten ò, ilööṙen, yē chu min ngaich meuk öp inlahenre:

²⁴Hayönglenre chinri im Mā tö chu min yih chu-ö inrē öt ṙòktörevö.

²⁵Öt ṙanāngen pöri tölōn chu ngam tinīntö Epafròtitös nö in yīö, ngam kisānö chu, hol chu tö la-evṙen, hol chu kumyung, ma-aṅhangken yīö inrē, mameukṙen chu inrē tö nup töhāṅten;

²⁶Pò ò nö paṙūtalōn tö yīö ṙòkhöre, haṙīvölōn takô, pò yīö hāngan nö vahavö:

²⁷Pòn kô anga-aṅ nö vahavö, öhta nö im kinpaha: aheūkölōn pöri ngam Tēv tö ò; öt höng in ò, tön in chu inrē, hòṅ chu öt haṙömö tö miṙivlōn,

²⁸Lökten chin mötlö ṙanāmölōn tīnten ò, hòṅ yīö ṙāmölōn yē yīö meukkūö ò hēk, hòṅ chu chu-ö inrē, höhlö tö miṙivlōn.

²⁹Lökten hōḵen ò im Mā holtö ṙanāmölōn, ṙapkö töngatī i milēḵṙen:

³⁰Pò ò nö öhta nö im kinpaha tökūö la-en Kristū, hakihten ngam nômöre nö meukṙen nup töhāṅten im mineukṙen chu tö yīö.