Read Car_Nicobarese KÒLÒSĪ 2 Bible Online

KÒLÒSĪ 2 - Car_Nicobarese bible

KÒLÒSĪ 2

¹Hòṅ mikahtölōn yīö chin tö ṙôkö panītnyö chu tö pòkūö yīö, cha-a yip i La-otisiā inrē, pòkūö cha inrē yip tötkôtamat nö meukkūö chu hol tö alahare:

²Hòṅ cha nö haṙamkalōn, ngaich mūlhenhöö cha-a im hanāngenlōn, i nup kanôlò ngam nyanatlö ngam mikah, hòṅ cha nö akahakūö tö ngam öt mikahkūö sin aṅ im Tēv in Kristū,

³Ngam chūök nup taṙòkhöre kanôlò aṅ im mikah nö hanyāti ngam inkaha inrē.

⁴Ṙô chu an angū-ö, hòn öt hĕng tak mahachīlö yīö nö hol tö mileūchen ṙôre.

⁵Tön pòrô chin rö-ö ing alaha, ṙāmölōn, hatīönkö lanënö yīö inrē, ngam kanöpö ngam mikah yīö inrē in Kristū.

⁶Sā yīö ngaich kē-ĕ Kristū Yēsū ngam Mā, ngatī lök in Ò,

⁷Ṙĕhtöre, mānlöre, inrē in Ò, ngaich haköptöre im mikah yīö sā inköptö yīö ngaich, pōilöre im nöinyö.

⁸Haṙēmngenre yin, hòn öt hĕng tak tö pôten yīö nö löktö i huneū-euṅṙôre nö halō-ongkūö nö im tötöl, nö sā kui tarik, sā nup ranehlö ing panam, ngaich öt sā Kristū:

⁹Pòn in Ò nö ṙòkhöre nup tanööḵlö ngam Tēv nö keuheūtlöre

¹⁰Ngaich in Ò yī-ö öi hatööḵlöngö, ngam kui taṙòkhöre minā-aṅ, minhôiṅyö inrē:

¹¹In Ò yin yī-ö ngaich ṙòkhöre tunyīnyi, tö ngam tunnyinyngö töt vahīṙen kuntī, i ṙinòngngö ngam alaha i tunnyinyngö Kristū;

¹²Ngaich ultu hol Ò im vinôkö, in e yī-ö inrē hachohlöngö hol Ò lökten i mikah i tī ngam Tēv, ngam mahachohlen Ò nö ṙā-ang i yip tökapah.

¹³Ngaich yī-ö tö kapah lökngökūö nuk tökööl yīö i öt tunnyinyngö ngam alaha yīö, ha-aṅhaṅ yīö ngaich Anga-aṅ öi hol Ò, pòn ngaichtī nö aṙēlen hī tö nuk tökööl hī nö ṙòkhöre;

¹⁴Ngaichtī nö sichngö nuk tökūchi höteh nö im chöngö, ök lamā-al hī, töharīkngöre inrē tö hī, ngaich Anga-aṅ nö kē-ĕng e nö ṙā-ang el talöökö, harātö e ngaich nö i rōi ök töhakālö;

¹⁵Ṙā-ang nup minā-aṅ, chöngö inrē nö ṙā-ang in re, hangāṅlnyö inmeuktö u Anga-aṅ, mihôiṅ ngaich tö u nö in e.

¹⁶Uh yin lökten akaha tö tarik, i nyinā-aṅ, inôkö, hēk i tökiröng sakāmö, hēk salnūvö chingëṅt, hēk sinat sumkam:

¹⁷Minë töng nyat nup yamih, alaha Kristū pöri ngam alaha.

¹⁸Un tarīku yēḵ mu-ulāingen yīö tö ngam raneushö yīö nö i inlöngngenre nö im inyāichngö i sinlāmö yip ma-ahānga inrē, haköpngöre öi i nup maheuṅkre yī-ö, chök alaha linfööṙö tö kūö alaha ellōnre,

¹⁹Ngaich öt kapta nö im Kui, ngam lökten ngam alaha nö ṙòkhöre nö ha-aṅlöng, ngaich taptu lökten i nup tanāpökūö, sīöplöre nö holtö sanīöpö nup aṅ im Tēv.

²⁰Yē yīö kapah hol Kristū ṙā-ang i nup ranehlö ing panam, kūöyòh öi yī-ö elkatòh nup chöngö, öi sā mi-iyöng ing panam,

²¹Un ṙāpa, un kalah kumchik, un rēhĕn lūöla;

²²(Nup tötkôlò tö kūö linūölköre), nö tö sā talöökö chöngö inköphöti, aṅ i tarik inrē?

²³Minë töng kô-òngrit nöng inmeuknyö mikah sinlāmölōn, inyāichngö inrē, inköpngö im alaha, ngaich rö-ö nö tö kanô-òṅvö höng mahakô-ònglōn ngam alaha.