Read Car_Nicobarese KÒLÒSĪ 3 Bible Online

KÒLÒSĪ 3 - Car_Nicobarese bible

KÒLÒSĪ 3

¹Yē yīö ngaich hachohlöngö hol Kristū, chöh nup lamātulöng yin, i chūök Kristū nö ūichhaka, nö lahāmö ngam Tēv.

²I nup lamātulöng ellōn yin; un i nup më-el tumlat.

³Tön kapah yin ngaich; ngaich hayūni nup nômö yīö, nö hol Kristū, nö im Tēv.

⁴Hē Kristū min nö hameuktu, ngam nômö hī; hameuktu yī-ö min inrē hol Ò, im kanôlò.

⁵Lökten kumpahngö nup tūmö alahare më-el tumlat, Chinô-òṅkānö, töchōich, sinṙakngölōn, tötlöök lōn, ngam yinikhanga inrē, ngam vinë-ekūö insātēv.

⁶Minë lökten yanīhih lanīnö ngam Tēv, nö i vē töthamang,

⁷Lahök yīö misī urĕh, hē yīö iyöng in u.

⁸Ngaich pöri yī-ö töngamuh ṙāngö në inrē nö ṙòkhöre nö ṙā-ang elvāng yīö; tanāinyö, lanīnö, ötlanöökölōn, chanökhuṙô, sinrōngkūö inrē.

⁹Ui minyôinyaṅ in höö, tön ngaich öi ṙòngngö ngam hötṙeh tarik nö anòngngen nuk la-en Ò:

¹⁰Ngaich öi hayutlöre tö ngam tufömngöre tarik, ngam tö tumfömlöng nö i mikah nö sā ngam insā Ò, ngam vamīlen Ò;

¹¹In e nö ötkô nö Krīku, Yahūtivö inrē; tötunyīnyi, töt tunyīnyi inrē; tarik aṅ elinchōn, aṅ töng Sitīh inrē, tö hakövö, töt hakövö inrē: ṙòkhöre nö in Kristū, i taṙòkhöre inrē.

¹²Sā takatöllöng töm Tēv, töhet, töhanghuṙen inrē; lökten yin hayutlöre tö miṙēlōn, neūkölōn, yanāichö: ṙanëmen, manöiyö:

¹³Kö ṙāpö höö, kö aṙēlen höö, yĕn tarīku tö miṙivulōn nö i töng holre; sā tī ngam Tēv nö aṙēlen yīö, ngatī yin yēḵ yī-ö inrē:

¹⁴Hayutlöre tö hanāngenlōn nö lātulöng tö taṙòkhöre, ngam tanaptö taneungten.

¹⁵Hökngen ngam lanāmen ngam Tēv nö hayöng nö ellōn yīö, ngam chūök invëtö yīö im tö hĕng alaha.

¹⁶Hökngen ngam ṙô Kristū nö pōilöreṙen nö in yīö, nö i nup mikah, haköpten höö, halēnö höö, i nup salmai, nöinyö ngam Tēv, töhet tinkökö inrē, havaiṙôre tikökṙôre i ngam Tēv ellōn yīö.

¹⁷Ngaich yē nup töng vahīṙen yīö, i ṙô, i la-en inrē, vīken u nö ṙòkhöre nö i minë-eny ngam Mā Yēsū, ha-öiny ngam Tēv Yöng lökten in Ò.

¹⁸Yī-ö kikānö töpihövö, uh yin ahôngen më pihöre sā e nö tölöök nö im Mā.

¹⁹Yī-ö kikōnyö töpihövö, hāngenlōn yin tö pihöre, ui lā-alkūö cha.

²⁰Yī-ö nyīö hang chöngö yöngre yin, i tökeuheūttöre, tön tölöök an angū-ö nö im Mā.

²¹Yī-ö inyöngö, un harun lanīnö i yip nyīö, hòṅ cha nö öt kayūmi.

²²Yī-ö töhakövö mahalanṙen, i tökeuheūttöre yin, hang chöngö yip māre öi tarik; un töng hòṅ meūkö, sā töng hòṅ ineū-euṅv, ngam kanô-en ellōn pöri, pine-eṅkūö tö ngam Mā:

²³Nup töng vahīken yīö, la-evṙen yī-ö hol tö ellōnre, sā mi-im Mā, rö-ö nö mi-i tarik,

²⁴Akahalōn tö yīö min teūngen im Mā, tö raneushö aṅ im amin: lök la-en ngam Mā yin Kristū.

²⁵Pò ngòh tö vahīkuṙen tö tövaich, nö teūngen min nö hēk tö ṙehe nup tövaich vahīkenre: öt tarīku min tö atöltuṙen.