Read Car_Nicobarese KÒLÒSĪ 4 Bible Online

KÒLÒSĪ 4 - Car_Nicobarese bible

KÒLÒSĪ 4

¹Yī-ö yöngṙen, kētö öp tölöök yin, tö ṙong inrē i yip kūön yīö töhakövö; akahalōn tö yīö inrē hĕng tak Mā el halīöngö.

²Iṙuhen haköpöre im vinë-eṅkūötēv, hönga in e hol tö nöinyö;

³Ṙòkhöre holre vë-elkui ih inrē, hòṅ ngam Tēv nö löpnyökūö inkūp ih nö lökhöt ngam ṙô, hòṅ ih ṙô-òv tö ngam öt mikahkūö aṅ in Kristū, ngam tö pô-òvkūö tö chu chu-ö inrē hakövö;

⁴Hòṅ chu hameuktö e, sā hinônyô, chu.

⁵Lök i mikah yin in cha yip töt akaha, haṙënngö ngam ṙētak.

⁶Hökngen nup ṙô yīö nö örheūheu nö holtö lanöökö, kumchiklöng tö sāl, hòṅ yīö huveū sapṙô cha nö kökö hĕng tak.

⁷Mikahtulōn yin min tö Tikikös tö nup inlaha chu nö ṙòkhöre ap hanāngen nö hol, tökô-en inrē nö mameukṙen, hamòl alaha nö kūön nö im Mā;

⁸Ap tahīntö chu in yīö nö kūö e angū-ö, hòṅ yīö akahalōn tö inlaha ih, hòṅ yīö öi ṙāmölōn;

⁹Nö holre tö Ònisimös, tökô-en ane inrē hanāngen nö hol, öp tö hĕng tak nö aṅ in yīö. Cha-a nap min mumkahtölōn yīö tö nup taṙòkhöre mi-ihih.

¹⁰Salāmö yin tö Aristakös ngòh hol chu nö hakövö, tö Mākös inrē, ngòh kūön kanānö Parnöpas, (ngam hinôtö yīö tö chu, höngan yē ò nö yih nö in yīö),

¹¹Yēsū inrē ngam tö Yustös invëka, ngam aṅ i yip tötunyīnyi: höng cha-a yin vē hol alaha chu im pūlngö ngam Tēv, mahaṙamkölōn chu nö tarik.

¹²Salāmö yin tö Epafaras, ngam aṅ in yīö, kūön Kristū töhakövö, örheūheu panītnyi nö im vinë-eṅkūötēv töpòkūö yīö, hòṅ yīö teungta sanöklö, ngaich keuheūttöre minkahtölōn i nuplōn ngam Tēv.

¹³Eūken ò chin tö Ò nö pōyen la-en tö pòkūö yīö, pòkūö yip aṅ La-otisiā inrē, pòkūö yip aṅ Hirapolis inrē.

¹⁴Salāmö yin tö Lūkös, ngam hanāngen lamë-eṅ tövahavö, tö Temas inrē.

¹⁵Salām yip hol hī i La-otisiā, i Nimfa inrē, yip māṅ inrē i patī cha.

¹⁶Yĕn ngaich pöchö ngih līpöre nö vë-evkūö nö in yīö, hōtö e pöchö inrē nö vë-evkūö nö ip māṅ yip aṅ La-otisiā; hòṅ yīö yī-ö inrē vë-ekūö ngam līpöre yip aṅ La-otisiā.

¹⁷Ngö ṙô pöchö tö Arkipas, Haṙēmngenre man tö ngam taneūngen meh aṅ im Mā mineukṙen, öm hateungngö e.

¹⁸Ngam sinlāmö aṅ in chu chu-ö Pôl, holtö ngih eltī chu takô. Köpölōn tö töng inkövö chu. Inlōnti yēḵ in yīö.