Read Car_Nicobarese 1 TÖSALÒNIKĒ 1 Bible Online

1 TÖSALÒNIKĒ 1 - Car_Nicobarese bible

1 TÖSALÒNIKĒ 1

¹Pôl, Silvanös Timòtī inrē, löö ip māṅ i yip aṅ Tösalònikē, im Tēv Yöng, im Mā inrē Yēsū Kristū: Inlōnti yēḵ in yīö lanāmö inrē.

²Örheūheu in ha-öiny ngam Tēv pòkūö yīö ṙòkhöre, kônyô tö yīö im ṙô ih vinë-eṅkūötēv;

³Öt ṙākö kanöpölōnre töm la-en yīö aṅ im mikah, ngam vahīken yīö inrē aṅ im mikah, ngam manöiyö inrē aṅ im mineūka, im Mā hī Yēsū Kristū, i kūö ngam Tēv hī, Yöng inrē;

⁴Kahōlö, hanāngen ngam Tēv, akahalōn tö ngam kintöllö yīö,

⁵Pò ngam tölöök inhānga kum ih nö öt yih nö in yīö im ṙô, tön im minhôiṅyö inrē im Töhet Fanöinylö, im töpōyen nyanatlö inrē; sā mikahlōn yīö ngaich, tö inlahen ih öi tarik, öi hameuktöre in yīö tö pòkūö yīö.

⁶Ngaich yī-ö ma-asīnken ih, ngam Mā inrē, öi teūngen ngaich tö ngam ṙô holtö inkôlò, holtö ṙanāmölōn inrē aṅ im Töhet Fanöinylö;

⁷Lökten yīö ngaich inchōten yip ṙamātö ellōnre aṅ Makētònī, Akāya inrē.

⁸Pòn löknyö in yīö ngam Mā nö ahangnyu, öt höng i Makētòni, Akāya inrē, tön ngaich nö keuheūtngöre chūök ngam mikah yīö im Tēv, nö tānyöre lökten īhö öt kusīknyôre ṙô-òv.

⁹Pòn anū-ö ngaich vamënyen ih tö inlahen lökhöt ih in yīö, tö inlahen yīö inrē havöötökūöre im Tēv öi ṙā-ang nup insātēv; öi lök la-en ngam tö-aṅ Tēv, tökô-en inrē,

¹⁰Hökkö ngam Kūön Ò nö ṙā-ang elhalīöngö, ngam hachohlö Ò nö ṙā-ang i yip tökapah, Ang Yēsū, ngam ṙamānyen hī nö ṙā-ang im yamih lanīnö.