Read Car_Nicobarese 1 TÖSALÒNIKĒ 2 Bible Online

1 TÖSALÒNIKĒ 2 - Car_Nicobarese bible

1 TÖSALÒNIKĒ 2

¹Kahōlö, pò yīö yī-ö akahalōn tö lökhöt ih in yīö, tö e nö rö-ö nö chanök alaha:

²Tön urĕh kihngen sin, miṙē-ĕyö i Filipī, sā mikahlōn yīö, ṙuhölre öt pinhë-eṅkūö im Tēv, öi ahangken yīö tö ngam tölöök inhānga öi pōyen kanihngen.

³Pò ap inlēnö tö ih nö öt vanāchö, ötrēhĕn nö sin-òkkūö, öt rēhĕn nö inchīlö:

⁴Pò ih ngaich tö hōḵov tö ngam Tēv öi hayöngtu im tölöök inhānga, ngaich ngatī ṙô īhö; öt haṙamlōn tarik, tön ngam Tēv ngam kamlah ellōn ih.

⁵Sā inkahngen yīö, pò ih öt hēṙu kôti, ṙô tö inrōyö, ötrēhĕn nö innyatngö yinikhanga, ngam Tēv an mameuk;

⁶Öt rēhĕn lukken ineū-euṅ aṅ i tarik, öt rēhĕn tö yīö, öt rēhĕn tö tahëng, öi höng lumngan öre, öi tanīnöṙô Kristū.

⁷El ṙôngö yīö pöri ihö öi ṙēm sā maharuk nyīö tö aheuk tö kūönre:

⁸Ngatī ihö ṙāmölōn kē-ĕkūö yīö, öt höng ngam tölöök inhangkö ngam Tēv, tön në nômö ih inrē, pò yīö ngaich hanghuṙen tö ih, öi aheuk hòṅ īnu tö yīö.

⁹Pò yīö köpölōn, kahōlö, tö ngam la-en ih, ranëtnyö alaha inrē: peuheū harap alaha öi la-evṙen, pò ih sōḵ höng lumngan yīö, ngaich ahangken yīö ihö tö ngam tölöök inhangkö ngam Tēv.

¹⁰Yī-ö yin, ngam Tēv inrē, mameuk hanëtö, lanöökö, tötvanëken inlaha ih in yīö öi ṙamātö ellōnre:

¹¹Sā mikahlōn yīö tö tī ih kö in yīö nyöre, sā inyöngö tö kūönre, halēnö yīö, ṙuhöl alaha yīö, hameukhöti inrē,

¹²Hòṅ yīö lök im töhōḵov tö ngam Tēv, ngam mahavëten yīö im pūlngö Ò, kanôlò Ò inrē.

¹³Angū-ö an chööḵnyö ih öt ṙākôre ha-öiny ngam Tēv, pò yīö hē yīö kēḵ ngam ṙô inhānga in ih, ngam ṙô ngam Tēv, ngaich hōḵo e yī-ö, nö öt ṙô tarik, sā ṙô ngam Tēv pöri, nö im kanô-en, ngam mahalöinyköre nö in yīö öi ṙamātö ellōnre.

¹⁴Kahōlö, pò yīö ngaich asīnken nup māṅ ngam Tēv, mi-i Yūtā öi in Kristū Yēsū: pò yīö yī-ö inrē kihngen ngatī tö tī yip aṅ panamre, sā cha cha-a tö tī yip Yahūti;

¹⁵Yip tö hĕnghöre fëlngö ngam Mā Yēsū, tö yik pròfĕt inrē, ngaich ahōnyen hī, ngaich öt ṙāmölōn tī tö ngam Tēv, harīkngenre tö taṙòkhöre tarik;

¹⁶Tahngô ih ṙô-òv i vē Tahëng mihëṅṙö tarik, hòṅ cha nö hayöökaṙen; nö hatöḵlö nup tököölre nö örheūheu. Ngaich pöri ngam lanīnö ngam Tēv nö kiröngen nö teunghökui cha!

¹⁷Ngaich pöri sin ihö, kahōlö, öi miṙīvilōn tö yīö rahëichhangkūö, im lanāta, öt im ellōn, ngaich holre kiröngö panītnyi hòṅ meukkūö yīö:

¹⁸Pò ih hāngenlōn lang hòṅ yih in yīö, öich höng hĕngtörevan hēk chu-ö Pôl, asāni pöri ihö tö ngam Sātān.

¹⁹Asuh ṙöng ap, maheūṅkkö ih, ṙanāmölōn, sapīöv ineū-euṅ? Röh öi yī-ö, i kūö ngam Mā Yēsū ip yanihih Ò?

²⁰Pò yīö ineū-euṅ ih, ṙanāmölōn ih inrē.