Read Car_Nicobarese 1 TÖSALÒNIKĒ 5 Bible Online

1 TÖSALÒNIKĒ 5 - Car_Nicobarese bible

1 TÖSALÒNIKĒ 5

¹Kahōlö, i nup ṙētak pöri, hē inrē, rö-ö yin kusiktö kinūchhöti nö in yīö.

²Pò yīö yī-ö akahalōn takô tö ngam sakāmö ngam Mā nö sā yanīhih ngòh mū-ulāya tö hatööm.

³Hē cha nö ngö ṙô, Lām, öt pinlānguṙen inrē, ngaich nönglūk nö teunghökui cha ap inlëlngö, sā ngòh kikānö kamyôḵnyö nyīö; ngaich cha-a nö öt löktu nö öt kô-òngvah.

⁴Kahōlö, rö-ö pöri yī-ö el sinngūlö, töp lökten öp sakāmö angū-ö nö kô-òngvah tī min tö yīö, nö sā mū-ulāya:

⁵Pò yīö ṙòkhöre kūön ngam hanātö, kūön ngam sakāmö inrē: rö-ö in ayī-ö aṅ im hatööm, öt rēhĕn aṅ im sinngūlö:

⁶Lökten tā-a ui haṙòh, öi sā yip tahëng, höngöre pöri, ui hiyōi inrē.

⁷Pò vē mahaṙòh nö haṙòh tö hatööm; vē mihiyōi inrē nö hiyōi tö hatööm.

⁸Tā-a pöri töi ui hiyōi, sā hī aṅ im sakāmö, hayutlö ngam mikah nö lanak elngòh, töm hanāngenlōn inrē; ngam mineūka aṅ im inyööken inrē, nö sapīöv lanak elkui.

⁹Pò ngam Tēv nö öt halöngten hī im lanīnö, tön im taneūngen tö inyööken lökten im Mā Yēsū Kristū,

¹⁰Ngam pòkūö hī nö kapah, hòṅ hī yĕi pòrô aṅhen, hēk haṙòh, holre min ayī-ö in Ò.

¹¹Lökten kö hangëken höö, kö haruklen höö, höng sā tī yīö ngaich.

¹²Kahōlö, vë-ekūö yīö pöri īhö, hòṅ yīö akahakūö tö cha yip töla-evṙen nö in yīö, yip yöngṙen yīö im Mā, yip vamëken yīö inrē;

¹³Tulöng lōn tö cha im hanāngenlōn, chöḵöiny tö nup im hanāngenlōn, chöḵöiny tö nup la-en cha. Lām yī-ö in höö.

¹⁴Kahōlö, halēnö yīö in inrē, vëkö yip tötlēn yin, ṙuhöl alaha töt kalēḵen ellōn, holṙen yip töt kalēḵen, möi i taṙòkhöre.

¹⁵Ngëicha hòn öt hĕng tak tö tītö tötlöök nö invahal tötlöök; örheūheu pöri tömkö ngam tölöök in höö, i taṙòkhöre inrē.

¹⁶Örheūheu ṙāmölōn;

¹⁷Un ṙākôre vë-ekūötēv;

¹⁸Kētö nöinyö i tökeuheūttöre: tön lōn ngam Tēv an angū-ö in Kristū Yēsū nö in yīö.

¹⁹Un hanyāngi ngam Töhet Fanöinylö,

²⁰Un minônngö minkahten;

²¹Kalah tökeuheūttöre; ṙapngötīre köptī im tölöök;

²²Ṙā-angre i nup tökeuheūttöre tötlöök.

²³Hòṅ ngam Tēv lanāmö nö keuheūtlöre tī nö ahetlen yīö: haköpka nup inrē yēḵ nö tumre ma-alaha, nômö, alaha yīö inrē, nö öt vinëku ip yanihih ngam Mā hī Yēsū Kristū:

²⁴Tökô-en An ngam mahavëten yīö, ngam tö tī-iv min inrē tö e.

²⁵Kahōlö, vë-elkui ih.

²⁶Aṅtī tö töhet hināmö kūö, salām yip hol nö ṙòkhöre.

²⁷Chūöku ṙô chin tö yīö, im Mā, tö ngih tökūchö līpöre nö vë-evkūö nö i hol nö ṙòkhöre.

²⁸In yīö an yēḵ ngam inkôlò aṅ im Mā hī Yēsū Kristū.