Read Car_Nicobarese YÔSUĀ 10 Bible Online

YÔSUĀ 10 - Car_Nicobarese bible

YÔSUĀ 10

¹Ngaich ngö inlahen angū-ö hē Atōnisētök ök rācha aṅ Yerūsalem nö hang tī Yôsuā nö kē-ĕ Ai; nö sā tīre tö Yerikō tök rācha e inrē, ngati tī anga-aṅ tö Aitök rācha e inrē nö vī lanāmö nö in Israĕl ngaich mūlhöt nö in cha;

²Tö cha ngaich nö kiröngö pinhë-eṅkūö kūö Kipīön nö tökiröng nö elpanam, sā töhĕng i nup elpanam rācha, kūö e inrē nö tökiröng tö Ai, ṙòkhöre inrē yik tarik aṅ e nö tökalēḵ.

³Lökten Atōnisētök ök rācha aṅ Yērusalem nö söömtö ṙô nö in Hōham ök rācha aṅ Hepròn, in Pīram inrē ök rācha an Yarmut, in Yafiā inrē ök rācha aṅ Lakis in Tīpir inrē ök rācha aṅ Ĕklòn, nö ngö ṙô.

⁴Yihtöre in chu, holṙen chu, tā-a töi kiyūngö Kipīön tön vī lanāmö ap nö in Yôsuā in yip kūön Israĕl inrē.

⁵Lökten yik tötaneui tak rācha aṅ Amôr, rācha aṅ Yērusalem, rācha an Hepròn, rācha aṅ Lakis, rācha aṅ Ĕklòn, nö hamūlöre, ngaich kiröönngöre, cha-a tö yik kumyung in cha, ngaich iyöngtöre nö lā-al Kipīön ngaich kiyung nö lā-al cha.

⁶Ngaich yik tarik aṅ Kipīön nö tīnngö chamuh in Yôsuā nö ik elyöngö Kilkāl, nö ngö ṙô, Uh man ha-aṅtī i vē tarikre; tā-a ka-eūyen yih in ih, hayöölen ih, holṙen ih inrē: tön ṙòkhöre yip rācha aṅ Amôr nö hamūlöre nö lā-al ih yip mi-iyöng kui rung panam.

⁷Lökten Yôsuā nö kiröönngöre nö ṙā-ang Kilkāl, anga-aṅ tö yik tarik kumyung hol ò, ṙòkhöre inrē yik tökalēḵ tarik töt pa-ekūö.

⁸Ngaich ngö ṙô ngam Mā Tēv tö Yôsuā, Uh man pa-ekūö tö cha: tön kēten cha chin nö eltī meh; öt hĕng tak min tarik aṅ-in cha tösökhak nö i kūö meh.

⁹Lökten Yôsuā nö öt akahtu yīhih nö in cha; pò ò nö hĕng mitööm röön nö ṙā-ang Kilkāl.

¹⁰Ngaich ngam Mā Tēv nö öt kô-òtī tö cha nö i kūö Israĕl, pōi hang vah tī anga-aṅ nö fëlngen cha nö i Kipīön, lū-u cha inrē nö lök el talöökö paneūlö Pethòram, ngaich fëlö cha nö söl Asakā, söl Makkatā inrē.

¹¹Ngaich ngö inlahen angū-ö, hē yik Amôr nö falngöre nö i kūö Israĕl, hē cha nö ṙòngmö ip paneūti i Pethòram, ngaich ngam Mā Tēv nö suktö tökiröng ihong nö ṙā-ang el halīöngö nö i kui cha i Asakā, ngaich kapah cha-a: mötlö ṙôken yik tökapah tökūö ök tökënngöre kumṙah mötlö tö yip töfëli tö yip kūön Israĕl nö aṅtī tö sanët.

¹²Ngaich Yôsuā nö vë-ekūö ngam Mā Tēv tö sakāmö hē ngam Mā Tēv nö kēten yik aṅ Amôr nö in yik kūön Israĕl; ngaich ngö ṙô anga-aṅ nö i kūö yik kūön Israĕl, Tavūöi, um halöinyköre sökhak i kui Kipīön; Më-eṅ inrē chingëṅt, el achāṙö Ayalòn.

¹³Öthalöinyköre ngaich ngam tavūöi nö sökhak, sökngöre inrē ngam chingëṅt, hanöng saha yik tarik nö havahalre tö yik lā-alre. Röh öng angū-ö nö kūichi nö mat i ap līpöre Yaser? Sökngöre inrē ngam tavūöi nö elmilūkö ngam halīöngö, öt ka-eūyen inrē nö meutti nö hĕng sumkam hö-ö.

¹⁴Öt sakāmuvö tösā e nö lā-urĕh tö e hēk lā-unôich tö e, tö ngam Mā Tēv nö hang ṙô tarik: pò ngam Mā Tēv nö kiyunglen Israĕl.

¹⁵Havantöre ngaich Yôsuā, ṙòkhöre inrē yik Israĕl nö hol ò, nö ik elyöngö i Kilkāl.

¹⁶Falngöre ngaich yik tötaneui tak rācha, ngaich hayunngöre nö el kinluhu i Makkatā.

¹⁷Ngaich vënyu nang Yôsuā, tö yip rācha tötaneui tak, nö hayunngöre nö el kinluhu i Makkatā.

¹⁸Ngaich ngö ṙô Yôsuā, Pilöntö tökiröng ihong i kūö ap kinluhu, ṙātö tarik in e inrē nö aṅten cha:

¹⁹Uh pöri yī-ö höngngöh, lūḵ yip lā-alre yin, fël yip la-unôich cha inrē; un halöngtuṙen cha-a nö kuhēthötre nö el nup elpanam cha: tön kēten cha an ngam Tēv yīö ngam Mā Tēv nö eltī yīö.

²⁰Ngaich ngö inlahen angū-ö, hē Yôsuā tö yik kūön Israĕl inrē nö keuheūtngöre tī nö fëlngen cha nö pōihang vahtī, hanöng saha cha nö hatngö, ngaich yik chööḵṙen yik tö-ōtre aṅ in cha nö kuhēthötre nö el nup tökinlōngu elpanam,

²¹Ngaich lökten yik tarik nö havantöre nö i elyöngö re nö in Yôsuā i Makkatā nö lām: öt hĕng tak mahalöinykö litākre nö lā-al yik kūön Israĕl.

²²Ngaich ngö ṙô Yôsuā, Löpnyökūö ap kinluhu, Kēnyö yip tötaneui tak rācha in chu ṙā-ang el ap kinluhu.

²³Ngaich ngatī cha-a, ngaich kēnyu yik tötaneui tak rācha nö in ò nö ṙā-ang el kinluhu, ök rācha aṅ Yērusalem, rācha aṅ Hepròn rācha aṅ Yarmut, rācha aṅ Lakis, rācha aṅ Ĕklòn.

²⁴Ngaich angū-ö nö ngö inlahen, hē cha nö kēnyö yik rācha nö in Yôsuā, havëtö yik tarik aṅ Israĕl ang Yôsuā nö ṙòkhöre, ngaich ngö ṙô tö yik yöngkūö kumyung tarik, Haröhtöre, röönlö röönre i likeun më rācha. Yihtöre cha-a ngaich nö haröhtöre ngaich röönlö röön re nö i likeun cha.

²⁵Ngaich ngö ṙô Yôsuā tö cha, Un pa-ekūö, unrēhĕn ngāng alaha; Ngëṅtöheich hangëṅ alahare inrē: tön ngatī tī an ngam Mā Tēv min tö yip lā-al yīö nö ṙòkhöre yip kiyung yīö.

²⁶Fāngö cha ngaich Yôsuā nö unôich, kumpahang vah cha inrē: seūlen cha nö i ṙōi nuk tötaneui māṅ chōn: kilölhaka cha-a nö i rōi nuk chōn söl harap,

²⁷Ngaich ngö inlahen angū-ö hē maneuttö ngam tavūöi, tö Yôsuā nö ngaich nö chöngu, ngaich cha-a nö hôten cha nö ṙā-ang rōi chōn, ngaich kavalhötnen cha nö el kinluhu ök chūök cha nö hayunngöre, ngaich ṙātö tökiröng ihong i kūö ök kinluhu, söl i ngih sakamö.

²⁸Ik sakamö angū-ö Yôsuā nö kē-ē Makkatā, ngaich fangngö e nö aṅtī tö kūö sanët, tök rācha e inrē; keuheūtngöre vah tī anga-aṅ tö cha yik tö unhômu ël e, öt hēng tit tak ṙahāti anga-aṅ tö tö-ōtre: ngaich sā tīre anga-aṅ tök rācha aṅ Yerikō ngatī tī tök rācha aṅ Makkatā.

²⁹Ngaich ang Yôsuā nö kiröngöre nö ṙā-ang Makkatā tö yik Israĕl inrē nö hol ò nö chuh Lipnā ngaich kiyūngö Lipnā:

³⁰Kēten e inrē ngam Mā Tēv, tök rācha e inrē; nö eltī Israĕl; ngaich fangngö e anga-aṅ nö aṅtītö kūö sanët, ṙòkhöre inrē yik tö unhômu ël e; öt hĕng tit tak ṙahāngö anga-aṅ tö tö-ōtre nö in e; ngaich sā tīre anga-aṅ tök rācha Yerikō ngati tī tök rācha e.

³¹Kiröönngöre ngaich Yôsuā nö ṙā-ang Lipnā, ṙòkhöre inrē yik Israĕl nö hol ò, nö chuh Lakis, iyöngtöre ngaich nö lā ël e, ngaich kiyūngö e:

³²Ngaich kētu Lakis nö eltī Israĕl tö ngam Mā Tēv, kē-ĕ ngaich anga-aṅ im innëtö sakāmö, ngaich fangngö e nö aṅtī tö kūö sanët, ṙòkhöre yip tö unhômu ël e, sā nuk tī ò nö ngaich tö Lipnā.

³³Ngaich Hōram ök rācha Kēsör nö yih nö holṙen Lakis; ngaich fëlan ang Yôsuā tö yik tarik ò inrē, hanöng saha tī ò nö öt hĕng tit tak ṙahāti tö tö ōtre.

³⁴Ngaich kiröönngöre Yôsuā nö ṙā-ang Lakis, ṙòkhöre inrē Israĕl nö hol ò, nö chuh Ĕklòn; ngaich iyöngtöre nö lā-al e, ngaich kiyūngö e;

³⁵Kē-ĕ e cha-a ngaich im sakāmö angū-ö, fangngö e inrē nö aṅtī tö kūö sanët ṙòkhöre yip tö unhômu ël e nö keuheūtngöre nö ahāti ik sakāmö angū-ö, sā nuk tö ngaich ti ò tö Lakis.

³⁶Ngaich kiröönngöre Yôsuā nö ṙā-ang Ĕklòn, ṙòkhöre inrē yik kūön Israĕl nö hol ò, nö chuh Hepròn; kiyūngö e ngaich cha-a;

³⁷Kē-ĕ e cha-a ngaich, ngaich fangngö e nö aṅtī tö kūö sanët, tök rācha e inrē, ṙòkhöre inrē nuk elpanam umuh, ṙòkhöre inrē yik tö unhômu ël u; öthĕng tit tak ṙahāti anga-aṅ tö tö-ōtre;: sā tī ò nö ngaich tö Ĕklòn; keuheūtngöre vahtī pöri anga-aṅ nö ahatngö e, tö yik tö unhômu inrē ël e.

³⁸Havantöre ngaich Yôsuā, hol ò inrē yik Israĕl nö ṙòkhöre nö i Tēpir; kiyūngö e ngaich:

³⁹Kē-ĕ e ngaich anga-aṅ, tök rācha e, tö nuk el panam e inrē; aṅtī tö kūö sanët cha-a inrē nö fangngen cha, keuheūtngöre vah tī tö yik tö unhômu ël e; öt hĕng tit tak ṙahāti anga-aṅ tö tö-ōtre; sā tī ò tö Hepròn, ngati tī anga-aṅ tö Tēpir, tök rācha e inrē; sā tī ò inrē tö Lipnā, tök rācha e inrē.

⁴⁰Keuheūtngörevahtī ngaich Yôsua tö ngam panam, ngam rung panam, i lòhngö inrē, tö ṙā-akūö panam inrē, tö nup paneūti inrē, ṙòkhöre inrē yik rācha cha nö öt hĕng tit ṙahāti anga-aṅ tö tö-ōtre; keuheūtngörevahtī pöri anga-aṅ tö yik tö-unhômu, sā tinöölô ò tö ngam Mā Tēv, ngam Tēv Israĕl.

⁴¹Löktökūö Katesparneā söl Kāsa tī ang Yôsūa nö fëlö cha, ṙòkhöre nup panam Kōsen inrē, söl Kipīön.

⁴²Kē-ĕ yik rācha nö ṙòkhöre tö nuk panam cha inrē tö Yôsuā nöng hĕngtumtī, pò ngam Mā Tēv, ngam Tēv Israĕl, nö kiyunglen Israĕl.

⁴³Havantöre ngaich Yôsuā nö ik elyöngö Kilkāl, ṙòkhöre inrē yik Israĕl nö hol ò.