Read Car_Nicobarese YÔSUĀ 11 Bible Online

YÔSUĀ 11 - Car_Nicobarese bible

YÔSUĀ 11

¹Ngaich ngö inlahen angū-ö, hē Yāpin ök rācha aṅ Hasör nö hāngö e, tīnhanga anga-aṅ ngaich nö in Yōpap rācha aṅ Mētòn, ik rācha inrē aṅ Simròn, ik rācha inrē aṅ Aksaf,

²I yik rācha inrē yik lā kapā, ip rung panam, i Arapā inrē lā lòhngö Kinneròt, im töṙā-akūö panam, i kui Nafotòre inrē lā chuhöt lā sūng.

³In yik Kanā-an lā chuhöt lā sūng inrē, in yik aṅ Amôr, aṅ Hitait, aṅ Përis, aṅ Yëpus in öp rung panam, in yip Hivait lā taṙeū tö Harmòn im panam Mispah.

⁴Kunyī-inyre ngaich, ṙòkhöre inrē yik kumyung in cha, pōyen tarik, höng sā kuyāyö i kuö mai tö ṙôkenre, nö kōravö inröluvö inrē nö pōyen.

⁵Ṙòkhöre vē rācha nö meukkūö höö; yihtöre cha-a ngaich nö vītö chūökre nö in nup mak i Merōm nö kiyung nö lā-al Israĕl.

⁶Ngaich ngö ṙô ngam Mā Tēv tö Yôsūa, Um pa-ekūö cha: tön huṙöich chin in ngih ṙētak kēten cha nö fëli i kūö Israĕl: likölngö kalröön minë kōra cha yī-ö min, föngngö minë inröl cha inrē tö tameūyö.

⁷Yih ngaich Yôsuā nöng harötlen cha tö yik tarik kumyung hol ò nö ṙòkhöre, nö lā-al cha i nup mak Merōm, nöng piṙāplöre nö i kui cha.

⁸Ngaich ngam Mā Tēv nö kēten cha nö eltī Israĕl, fëlö cha ngaich acha-a, lū-u cha inrē nö söl ip tökiröng Sitōn söl Misrefòtmēm, söl ip achāṙö Mispa lā chuhöt; fëlö cha ngaich cha-a, hanöng saha cha nö öt ṙātö töhĕng tak tö ōtre.

⁹Sā tinöölôre Yôsuā tö ngam Mā Tēv ngati tī tö cha likölngö kalröön kōra cha anga-aṅ, föngngö nuk inröl cha inrē tö tameūyö.

¹⁰Havantöre ngaich Yôsuā hē e, ngaich kē-ĕ Hasör nö, fëlngö ök rācha e inrē nö aṅtī tö sanët: pò Hasör nö lā urĕh misī nö yöngkūö nuk pūlngö.

¹¹Ngaich keuheūtngöre vah tī cha-a tö yik tarik in e nö aṅtī tö kūö sanët, keuheutngöre vah tī tö cha: öt hĕng tit tak mu-uhôm tö ṙātu; föngtökūö Hasör anga-aṅ inrē tö tameūyö.

¹²Ṙòkhöre nuk elpanam yik rācha; ṙòkhöre yik rācha u inrē, nö kē-ĕ tö Yôsuā, fëlngen cha anga-aṅ inrē nö aṅtī tö kūö sanët, nö keuheūtngöre vahtī tö cha: sā tinöölôre tö Môsös ök tarik ngam Mā Tēv.

¹³Nup elpanam pöri tösökhakaṙen nö i törunglöre, öt hĕng anū-ö tö föngtu kūö tö yik Israĕl, höng Hasör; angū-ö töföngtukūö tö Yôsuā.

¹⁴Ṙòkhöre nuk tökē-ĕ aṅ el në elpanam, nuk nuā inrē, kē-ĕ tö yik kūön Israĕl nö pôḵ cha nö kanahngen cha; ṙòkhöre pöri tarik nö fëli tö cha nö aṅtī tö kūö fël, hanöng saha cha nö hatngö tö tī cha, öt rĕhĕn cha-a nö ṙātö mu-uhôm.

¹⁵Sā tinöölô Môsös tö ngam Mā Tēv ngam tarik ò, ngatī ṙô Môsös nö tölrô Yôsuā; ngaich ngatī inlahen Yôsuā öthēngö ṙahāti anga-aṅ tö töt keuheūten tö nuk taṙòkhöre tinöölô Môsös tö ngam Mā Tēv.

¹⁶Lökten Yôsuā nö keuheūtlöretī nö kē ök panam, tök rung panam, ṙòkhöre nuk lā lòhngö, ṙòkhöre panam Kōsen, tök töṙā-akūö panam, tö Arapā töp rung panam Israĕl, töp töṙā-akūö panam in e inrē;

¹⁷Löktökūö öp rôngö Halak, öp tö peūlöre kūö nö i Sēir, söl Pē-alkāt ip achāṙö Lëpanön, lataṙeū töp rôngö Hörmòn: ṙòkngöre yik rācha cha nö kē-ĕ tö ò, nyahaṅvti inrē anga-aṅ tö cha, kumpahangvah cha inrē.

¹⁸Marô-òten Yôsuā nö kiyung yik rācha.

¹⁹Öt hĕng elpanam mahalöököre nö i kūö yik kūön Israel, höng yik Hivait yik aṅ Kipīön: ṙòkngöre vah ngaich yik muh nö kē-ĕ tö cha ik kinyūngö.

²⁰Pòn ngam Mā Tēv mahangëṅngö ellōn cha, nö yihtöre nö lā-al Israĕl i kinyūngö pòn hòṅ ahatngen cha anga-aṅ, hòṅ cha nö öt inṙētuvö, hòṅ ò pöri nö hatngö tī tö cha, sā tinöölô Môsös tö ngam Ma Tēv.

²¹Ngaich yih Yôsuā hē e, ngaich rökngen yik Anakim nö ṙā-ang im rung panam, ṙā-ang Hepròn, ṙā-ang Tipir, ṙa-ang Anap, ṙā-ang nup rung panam Yūtā, ṙā-ang nup rung panam Israel inrē: ahāti cha-a tö Yôsuā nö hol tö nuk elpanam cha.

²²Öt hĕng tit tak yik Anakim töṙālöng nö panam yik Israel höng i Kāsa, i Kāt, i Asòt inrē, yik tö ōt tit.

²³Keuhēutlöre tī ngaich Yôsuā töm panam, sā nuk ṙô ngam mā Tēv nö in Môsös; ngaich Yôsuā nö kētö e nö amin yik Israel sā minchööḵngö e nö i miyöngö cha, Heūheure ngaich ngam panam tö kinyūngö.