Read Car_Nicobarese YÔSUĀ 13 Bible Online

YÔSUĀ 13 - Car_Nicobarese bible

YÔSUĀ 13

¹Köiny ngaich ang Yôsuā sööḵngö tö ṙētöre inrē; ngaich ngö ṙô ngam Mā Tēv tö ò, Ngaich man köiny sööḵngö inrē tö ṙētöre, ngaich ōttit nup panam töhòṅ kē-ĕ.

²Ngih ön yih panam tö-ōttit: ṙòkhöre nuk kūöngö Filistain, ṙòkhöre inrē Kessurī;

³Löktökūö Sihōr, ap lākūö Aikup, söl i kūöngö Ĕkròn kū-ö tö lā kapā, öp tökaheuktu nö panam aṅ Kanā-an: yik tötaneui tak mā aṅ Filistain; aṅ Kasā, aṅ Astòt, aṅ Askēlòn, aṅ Kitti, aṅ Ekròn: inrē; yik aṅ Avim inrē,

⁴Lālòhngö: ṙòkhöre panam yik aṅ Kanā-aṅ, Mīrā, inrē ök panam aṅ Sītōn, söl Afek, söl kūöngö panam yik aṅ Amôr:

⁵Panam yik aṅ kēpôl inrē ṙòkhöre Lëpenön, kū-ö tö lā löklö ngam tavūöi, löktökūö Pē-alkāt lātaṙeū töp rôngö Harmòn söl ip lökhöt i Hamat.

⁶Ṙòkhöre yip aṅ ngam rung panam löktökūö Lëpenön söl Mesapotamīa, ṙòklöre yip aṅ Sitōn; acha-a min ahōngö chu ṙā-ang i kūö yip kūön Israĕl: höng michöö-öng e pöri më-eṅ ngaich in Israĕl nö amin ò sā tinöölô meh tö chu.

⁷Lökten man ngaich michöngö ngih panam nö amin yip tömachūötör miyöngö, yip töròngti miyöngö Manāsē inrē.

⁸Hol ò yip aṅ in Rūpön aṅ in Kāt inrē nö ngaich nö teūngen tö-aminre, nup kahëtö Môsös nö in cha, lāmuh tö Yôtön lā chuhöt, höng sātī Môsös ök tarik ngam Mā Tēv nö kē-ĕkūö cha;

⁹Löktökūö Arō-er, ök lā taseū ök achārö Arnòn, töp elpanam inrē öp ellōn öp achāṙö, ṙòkhöre inrē öp töṙā-akūö panam Metepā söl Tīpön;

¹⁰Ṙòkhöre nup elpanam Sīhòn rācha aṅ Amôr, ök mahayöng nö i Hespòn, söl i kūöngö kūön Amön;

¹¹Kilīöt inrē, öp kūöngö Kessūr inrē tö Mākah inrē, keuheūtlöre öp rôngö Hörmòn, keuheūtlöre inrē Pasān, söl Salëka;

¹²Ṙòkhöre ök pūlngö Ôk i Pasān, ök mahayöng nö i Astaròt Etrei inrē (ngam tö-ōtren chööḵṙen Refaim;) pò u anū-ö në nö tökiyūngö tö Môsös, ngaich ahōnyuvö cha-a.

¹³Hö-ö pöri yik kūön Israĕl nö ahōnyö yik aṅ Kessūr, öt rēhĕn tö yik aṅ Mākah: höng iyöng ellōn Israĕl pöri Kessūr Ma-akat, söl i ngih sakāmö.

¹⁴Höng öp miyöngö Lēvī pöri töt kētu amin tö ò; nuk tökētu nö im Mā Tēv, ngam Tēv Israĕl, nö lökten i kūö tameūyö anū-ö amin ò, sā ṙô Ò nö in ò.

¹⁵Ngaich Môsös nö kē-ĕkūö ök miyöngö yik kūön Rūpön sā tum mupīhö cha.

¹⁶Löktökūö Arō-er ngaich ngam kūöngö cha, ök mi-i taseū achāṙö Arnòn, tök elpanam inrē ök mi-i ellōn ök achāṙö, ṙòkhöre inrē öp töṙā-akūö panam ranghö Metepā;

¹⁷Hespòn, ṙòkhöre nup elpanam e nuk mi-im töṙā-akūö panam; Tīpön, Pamòtpē-al inrē tö Petpē-alme-òn;

¹⁸Yēhas inrē, Ketēmòt, Mefa-āt inrē;

¹⁹Kirīattēn inrē, Sipmah, Sëratsahār inrē ip rôngö ngam achāṙö;

²⁰Petpīôr inrē, tö nup paneūti Piskē, Petyasimòt inrē;

²¹Keuheūtlöre nup elpanam ngam töṙā-akūö panam, keuheūtlöre inrē öp pūlngö Sīhòn rācha aṅ Amôr, öp mahayög nö i Hespòn, ök tö kiyūngö tö Môsös nö anòngngen yik mā aṅ Mitia, Evī, Rikem, Sūr, Hör, Rēpā, yik kūön rācha Sīhòn ök mi-iyöng im panam.

²²Pēlām inrē ök kikōnyö kūön Pīōr, ök chamòng alaha, yik töfëli tö yik kūön Israel nö nyaha tö sanët nö anòngngen cha yik töfëli.

²³Yōtön ök kūöngö yik kūön Rūpön, tök kūöngö e inrē angū-ö an ngih amin yik kūön Rūpön i tum mupīhö cha, tö nup elpanam in e tuhēt inrē.

²⁴Ngaich Môsös nö kē-ĕkūö ök miyöngö Kāt, in yip kūön Kāt, sā mupīhö cha.

²⁵Kūöngö cha ngaich Yēsör, keuheūtlöre inrē nup elpanam Kilīöt, ròngti ap panam yik kūön Amön inrē, söl Arōer ap lākūö Rappa;

²⁶Löktökūö Hespòn inrē söl Rāmatmispeh, Petōnim inrē; lötktökūö Mehanēm inrē söl kūöngö Lōtipör;

²⁷El achāṙö inrē, Pētharam Petnimrah, Sukòt, Safòn, keuheūtlöre ngam pūlngö Sīhòn rācha aṅ Hespòn, nö kūöngöten tö Yôtön; söl manā-angkūö ap mai Kinëret lamuh tö Yôtön lāchuhöt.

²⁸Angū-ö ön ngih amin yik kūö Kāt sā tum mupīhö cha, nup elpanam e inrē tö nup tuhēt.

²⁹Kētö amin yip töròngti miyöngö Manāsē ang Môsös: ngaich angū-ö nö lamöö in öp töròngti miyöngö kūön Manasē sā tum mupīhö cha.

³⁰Lök tökūö Mahanēm ngam kūöngö cha keuheūtlöre Pasān, keuheūtlöre ök pūlngö Ôk rācha aṅ Pasān, keuheūtlöre inrē nuk elpanam Yēir, nuk mi-i Pasān, tafūöl anāi nuk elpanam;

³¹Ròngti inrē Kilīöt, Astaròt, Etrēi, tö nuk elpanam i pūlngö Ôk i Pasān, anū-ö lumnööṙö yik kūön Makīr ök kikōnyö kūön Manāsē,nö lumnööṙö yip töròngti kūön Makīr sātum mupīhö cha.

³²Anū-ö nun në amin cha ip töṙā-akūö panam Mô-āp nö tömichööḵtu tö Môsös, lā muh tö Yerikō, lā chuhöt,

³³Öt kētu amin pöri öp miyöngö Lēvī tö Môsös; ngam Mā Tēv an, ngam Tēv Israel amin cha cha-a, sā ṙô ò tö cha.