Read Car_Nicobarese YÔSUĀ 14 Bible Online

YÔSUĀ 14 - Car_Nicobarese bible

YÔSUĀ 14

¹Anū-ö nun në amin në kahë yik kūön Israel nö im panam Kanā-an, tömichööḵtu nö in cha, tö Eliēsör ök kūönṙô Yôsuā inrē ök kikōnyö kūön Nön, tö yik yöngkūö mitī-i miyöngö yik kūön Israel inrē.

²I kintölö amin cha sā chöngö ngam Mā Tēv nö lök tö eltī Môsös, yik tö machūötör miyöngö, töp töròngti miyöngö inrē.

³Pò Môsös nö ngaich nö kētö amin yik tönët miyöngö ròngti lāmuh tö Yôtön: hö-ö pöri anga-aṅ nö kētö amin Lēvī nö in cha.

⁴Pò yik kūön Yôsĕf nö nët miyöngö, Manasē, Ifrēm inrē: ngaich cha-a nö öt kētö minchööḵö Lēvī nö im panam, höng nup chūök cha elpanam nö iyöng, holre tö nup tökiyôpu kūö panam nya-aṅkūö nup nuā cha tö nup chehen cha inrē.

⁵Sā tinöönô Môsös tö ngam Mā Tēv, ngaich ngatī yik kūön Israel, ngaich cha-a nö michööḵ ngam panam.

⁶Ngaich yik kūön Yūtā nö i Kilkāl nö ṙūötöre nö in Yôsuā; ngaich Kalip nö ngö ṙô tö ò, ök kikōnyö kūön Yefūneh aṅ Kenīs, Akahalōn man tö ṙô ngam Mā Tēvnö in Môsös ök tarik ngam Tēv tö inlahen chu inlahen meh inrē i Katespörnīa.

⁷Fën anāi samyeūheu chin misī hē Môsös ök tarik ngam Mā Tēv nö tīnngen chu ṙā-ang Katespörnīa öich hayuntö matre töm panam; ngaich chū-ö vë-eny nang ò hēk tö nuk ṙô ellōn chu.

⁸Ngaich pöri yik hol chu yik mī-in chu nö vīngö ellōn yik tarik nö paṙööyi: höng heumeng tak pöri chū-ö tökeuheūtlöre tömrit ngam Tēv chu ngam Mā Tēv.

⁹Ngaich chūökuṙô Môsös nö kilēḵngôre nö ngö ṙô, Kô-en an min ngam panam töröönka ël töröön meh nö ngaich nö amin meh min tö yip kūön meh inrē nöng örheūheu, pò meh keuheūtlöre tömrit ngam Tēv re ngam Mā Tēv.

¹⁰Yĕh meuk aṅ chin tö tī ngam Mā Tēv töngamuh, sā ṙô ò, i ël në töfën anāi taneūi samyeūheu, löktökūö ik hē ngam Mā Tēv nö vë-ekūö Môsös tö ngih ṙô, hē Israel nö ṙòngmöng kiröön el tönyalnyi: yĕh meuk, ngaich chip töngamuh köiny hëvhör anāi taneūi samyeūheu i ngih sakāmö.

¹¹Sön pöri öich höng sā kumlēḵre misī ik sakāmö hē Môsös nö tīnngen chu: sā ök kumlēḵ chu misī, ngatī öp kumlēḵ chu töngamuh, i kinyūngö, i invötköre kunyī kuhēt inrē.

¹²Yĕh ngaich lökten töngamuh kētö ngih rôngö in chu, ngih ṙô ngam Mā Tēv ik sakāmö angū-ö; pò meh hang yik Anakim nö umuh ik sakāmö angū-ö, elpanam nup inrē tökiröng tökalonglöng: lohten an min yēḵ ngam Mā Tēv nö in chu, ngaich chū-ö min ahōnyen cha, sā ṙô ngam Mā Tēv.

¹³Ngaich hakôlò ò ang Yôsuā; ngaich kēten Hepròn nö in Kalip ök kikōnyö kūön Yëfuneh nö amin ò.

¹⁴Lökten Hepròn nö amin Kalip ök kikōnyö kūön Yefuneh aṅ Kenis söl in ngih sakāmö, pò ò nö keuheūtlöre nö tömrit ngam Mā Tēv, ngam Tēv Israel.

¹⁵Kirīatrapā ap sin misī minënyi Hepròn nö lā urĕh; Arpā öp misī tökiröng kūö tarik nö i yik Aanakim. Heūheure ngaich ngam panam tö kinyūngö.