Read Car_Nicobarese YÔSUĀ 17 Bible Online

YÔSUĀ 17 - Car_Nicobarese bible

YÔSUĀ 17

¹Ngaich angū-ö ngih minchöḵö ök miyöngö Manāsē; pòn lanòh Yôsĕf anga-aṅ. Ngaich pöri Makir ök lanòh Manāsē, ök kikōnyö yöng Kilīöt, pò ò nö kumyung nö tarik, lökten Kilīöt, Pasān inrē nö minchöḵö ò.

²Ngam minchöḵö yik tö ōtngöre pöri kūön Manāsē sā mupīhö cha; minchöḵö yik kūön Apī-ēsār, kūön Helek, kūön Asrī-el, kūön Sikem, kūön Hīför, kūön Semita: cha-a yin vē kikōnyö kūön Manāsē ök kikōnyö kūön Yôsĕf sā mupīhö cha.

³Öt kūönu pöri tö kikōnyö, ang Sëlofehat, ök kikōnyö kūön Hīför, ök kikōnyö kūön Kīlīöt ök kikōnyö kūön Makīr, ök kikōnyö kūön Manāsē, höng kikānö: në nun minënyö yip kūön ò kikānö, Mahlah, Nō-a, Hòklā, Milkah, Tirsah inrē.

⁴Ngaich yihtöre cha-a nö haröhtöre nö i kūö Elīesör ök kūönṙô, i kūö Yôsuā inrē ök kikōnyö kūö Nön, i kūö yik kūön rācha inrē, nö ngö ṙô, Tölṙô Môsös an ngam Mā Tēv nö kētö amin ih in yip mak alaha ih: lökten sā ngam chöngö ngam Mā Tēv anga-aṅ nö kētö amin cha in yip mak alaha yik yöng cha kikōnyö.

⁵Sömö minchöḵö an Manāsē, nö hol nup panam Kilīöt Pasān inrē, nup lāmuh tö Yôtön;

⁶Kūö yip kikānö kūön Manāsē nö amīnu nö holkūö yip kikōnyö kūön ò: ngaich ngam panam Kilīöt nö minë-eny yip tö ōtngöre kikōnyö kūön Manāsē.

⁷Ngaich ngam kūöngö Manāsē nö löklö Āsēr söl Mikmitat, öp lā kūö Sīkem; ngaich ngam kūöngö nö lök lā hāmö nö tölngö yip aṅ Entapuā.

⁸Minë-eny Manāsē an ngam panam Tapuā: ngam Tapuā pöri i kūöngö Manāsē nö minë-eny yip kūön Ifrēm.

⁹Ngaich ngam kūöngö nö peūtöre nö im kun töhëm mak Kāna, lā lòhngö tö ngam kun töhëm mak: minë-eny Ifrēm nun në elpanam nö mi-i nup elpanam Manāsē: lā kapā ngam kun töhëm mak nö kūöngö Manāsē, im mai ngam maneutnyö e:

¹⁰Lā lòhngö angū-ö nö minë-eny Ifrēm, ngaich lā kapā angū-ö nö minë-eny Manāsē, ngaich kū-ötö ngam mai anga-aṅ; ngaich sölta anū-ö i Āsēr nö lā kapā, ngaich lā chuhöt nö in Isākar.

¹¹Ngaich Isākar, Asēr inrē minë-eny Manāsē Petsīn nup elpanam e inrē, Iplēm nup elpanam e inrē, tö yip aṅ Tòr inrē tö nup elpanam e inrē, tö yip aṅ Entòr tö nup elpanam e inrē, tö yip aṅ Tana-ak tö nup elpanam e inrē, tö yip aṅ Mekitō tö nup elpanam e inrē nup tölūöi tömarô-òl kui.

¹²Sönngenre pöri nö ötkô yik kūön Manāsē nö ahōngen yik aṅ nuk elpanam; ngaich pöri yik aṅ Kanā-an nöng iyöng nö im panam.

¹³Ngaich ngö inlahen angū-ö, hē yik kūön Israĕl nö kalēḵlöre, ngaich cha-a nö kētö la-en yik aṅ Kanā-an, ngaich rö-ö nö keuheūtngen cha nö ahōnyuvö.

¹⁴Ngaich yik kūön Yôsĕf nö vë-ekūö Yôsuā nö ngö ṙô, Kūöyòh ömeh höng hĕng hata tö minchöḵö chu höng hĕng tāk inrē nö amīn chu, öm öt meūkö chu tökiröng tarik, pò ngam Mā Tēv nö hakôlò chu?

¹⁵Ngaich ngö ṙô Yôsuā tö cha, Yē meh öm tökiröng tarik, peūlöre man kuṙòh el ngam chūölchōn, öm hakōnnyö chūökre in e im panam yip Përis yip Rifēm inrē; sā ngam rung panam Ifrēm nö cheūkti nö chūök meh.

¹⁶Ngaich ngö ṙô yik kūön Yôsĕf, Öt kô-òre an ngam rung panam nö chūök ih: ngaich yip aṅ Kanā-an yip mī-iyöng im panam el achāṙö nö inröl tö vët tö cha inrē yip aṅ Petsīn nup elpanam e inrē, tö yip aṅ el achāṙö inrē i Yesrīl.

¹⁷Ngaich Yôsuā nö vë-ekūö yik aṅ patī Yôsĕf, Ifrēm, Manāsē inrē nö ngö ṙô, Tökiröng man më-eṅ öm tarik kiröngö kumlēḵ inrē: ötkô man höng hēngö minchöḵö.

¹⁸Ngaich pöri ngam rung panam min nö më-eṅ meh; pòrô an nöng el chūölchōn, ngaich hakōnnyö e më-eṅ; më-eṅ min inrē ngam maneutnyö e: pò meh min ahōnyö yip kanā-an, pòrô cha-a nö tö inröl tö vët, pòrô inrē nö tökalēḵ.