Read Car_Nicobarese YÔSUĀ 18 Bible Online

YÔSUĀ 18 - Car_Nicobarese bible

YÔSUĀ 18

¹Ngaich keuheūtlöre yik tömaṙôngö kūön Israĕl nö hamūlöre nö i Sailō, ngaich asöklö nuk rūkui manūlö nö umuh: ngaich ngam panam nö elkatòh cha.

²Ngaich ōtren in yik kūön Israĕl sat miyöngö yik tö-öl nö michöḵö tö aminre.

³Ngaich ngö ṙô Yôsuā tö yik kūön Israĕl, Iṙôktöre hanā-aṅ alaha öi yī-ö kē ngam aminre panam ngam kahëtö ngam Mā Tēv nö in yīö, ngam Tēv yik muvöhngö yīö?

⁴Lūöi tak vahīlö yin tö tarik i töhĕng miyöngö: hòṅ chu tīnngen cha, hòṅ cha nö hōklöre nö kiröön nö lök el ngam panam, ngaich mikahang e asā amin cha ngaich yih cha-a min nö in chu.

⁵Ngaich cha-a min nö sat tit tī nö michööḵngö e: höng köpen an min Yūtā nö im kūöngöre lā lòhngö, ngam patī Yôsĕf inrē min nö köp nö im kūöngö cha lā kapā.

⁶Ngaich yī-ö min mikahngö ngam panam nö sat tit, ngaich kētö öp minkahngö ihih in chu: ngaich chū-ö min kalah taneūngen yīö ihih i kūö ngam Tēv hī ngam Mā Tēv.

⁷Tön rö-ö yin vē Lēvī nö minchöḵövö nö in yīö; pò ngam la-en kūönṙô ngam Mā Tēv nö angū-ö amin cha: Kāt, Rūpön, ròngti miyöngö inrē Manāsē nö ngaich nö teūngen tö aminre nö lāmuh tö Yôtön lā chūhöt, nuk kahëtö Môsös nö in cha ök tarik ngam Mā Tēv.

⁸Ngaich yik tarik nö choholre, ngaich kiröönngöre: ngaich tölṙô cha ang Yôsuā yik kumröönngöre nö mikahangkūö öp panam, nö ngö ṙô, Kuṙòh kiröön lök el ngam panam, mikahngö e inrē, ngaich yih hēk in chu, hòṅ chu kalah taneūngen yīö ihih i kūö ngam Mā Tēv i Sailō.

⁹Ngaich kiröönngöre yik tarik nö lök el ngam panam, ngaich mikahang e nö sat tit nö i mat līpöre nö lökngö kūö nup elpanam, yihtöre cha-a ngaich nö in Yôsuā nö ik elyöngö i Sailō.

¹⁰Ngaich Yôsuā nö kalah taneūngen cha nö i Sailō i kūö ngam Mā Tēv: umuh inrē Yôsuā nö michööḵ yik kūön Israĕl tö ngam panam asā kamnāchö cha.

¹¹Ngaich ök kintölö ök miyöngö yik kūön Penyamin nö kē-ĕlre sā mupīhö cha; ngaich ök kūöngö ök kintölö cha nö kunyī lök hôi yip kūön Yūtā tö yik kūön Yôsĕf.

¹²Ngaich ök kūöngö cha nö lā kapā löktökūö Yôtön; ngam kūöngö inrē löklö kaha Yerikō nö lā kapā ngaich löklö ip rung panam lā sūng; ngaich ngam löknyö e nö ip tönyalnyi i Petaven.

¹³Ṙeū-eung umuh ngam kūöngö nö kū-ö tö Lus, nö i kaha Lus (angū-ö an Pētĕl) lā lòhngö; ngaich peūtöre ngam kūöngö nö kū-ö tö Ataròt Atār, nö lök ip rôngö öp lā lòhngö tö Pethòròn öp lātaṙeū.

¹⁴Hateūti ngam kūöngö ngaich chuvēri nö kū-ö tö lòhngö sūng, nö reū-eungrit öp rôngö lā kūö Pethòròn lā lòhngö; ngaich ngam löknyö e nö i Kiriātpĕ-āl (angū-ö an Kiriātyēarim), elpanam yip kūön Yūtā: angū-ö ök lā sūng elyöngö.

¹⁵Ngaich ök lā lòhngö elyöngö nö löktökūö manā-ang kūö Kiriātyēarim, löknyö lā sūng ngaich ngam kūöngö, ngaich löknyö nup töhëmlö mak i Neftoā:

¹⁶Peūtöre ngaich ngam kūöngö nö kū-ö tö manā-angkūö öp rôngö öp lākūö öp achāṙö öp kikōnyö kūön Hinôm, öp më-el achāṙö Rifēm lā kapā; ngaich angū-ö nö lökngö kaha Yepus lā lòhngö, peūtöre ngaich nö i Enrōköl;

¹⁷Hateūti angū-ö nö lā kāpa, ngaich meutnyi nö i Ensimes, ngaich kunyī nö kū-ötö Kelilot, öp tökamlö nö ip paneūlö Atummim, ngaich angū-ö nö peūtöre nö ip ihong Pohan ök kikōnyö kūön Rūpön;

¹⁸Ngaich angū-ö nö löknyö kaha Arapā lā kapā, ngaich peūtöre nö i Arapā:

¹⁹Lökngö kaha Pethòklā ngam kūöngö nö lā kapa: ngaich löknyö ngam kūöngö nö ip tökichulnyöre aṅ ip Sālmai, ip lòhngö manā-angkūö Yôtön angū-ö an kūöngö lā lòhngö.

²⁰Ngaich kūöngö e Yôtön nö lā chuhöt. Angū-ö an ngih amin yip kūön Peyamin, lök i minë kūöngö nö havīṙi, sā mupīhö cha.

²¹Në nun elpanam öp miyöngö yip kūön Penyamin i mupīhö cha, Yerikō, Pēthòklā, Emekkesis inrē,

²²Petarapā, Sīmarēm, Pētĕl inrē;

²³Avim, Pārah, Ôfrā inrē;

²⁴Kīfāramônī, Ofni, Kipā inrē; nët sīön nup elpanam holre tö nup tuhēt u:

²⁵Kīpīön, Ramā, Piròt inrē,

²⁶Mispeh, Kifīrah, Môsā inrē;

²⁷Rikem, Irpīl, Taralā inrē;

²⁸Sēlā, Ha-elef, Yepus (angū-ö an Yērusalem), Kīpīā, Kiriātyēarim inrē; fën sīön nup elpanam holre tö nup tuhēt u. Angū-ö ön amin yik kūön Penyamin sā mupīhö cha.