Read Car_Nicobarese YÔSUĀ 2 Bible Online

YÔSUĀ 2 - Car_Nicobarese bible

YÔSUĀ 2

¹Ngaich Yôsuā ök kikōnyö kūön Nön nö tīnngö tarik nët tak ṙā-ang Sitim nö ulaikö matre nö ngëicha, nö ngö ṙô, Kuṙòh ngëichkö ngam panam, Yerikō inrē. Kiröönngöre cha-a ngaich, ngaich yihtöre nö i patī Rāhap ök mi-inyihköre kikānö, ngaich höngngöh nö umuh.

²Vënyu ngaich angū-ö nö ik rācha aṅ Yerikō, nö ngö vine-eny, Yĕh meuk, yih yip tarik nö ihih i ngih hatööm aṅ i yip kūön Israĕl nö chöh ngih panam.

³Tīnhanga ngaich ök rācha aṅ Yerikö nö in Rāhap, nö ngö ṙô, Kētö yip tarik yip yamih nö in meh, yip tö ngaich nö el patī meh: tön yamih yip nö chöh ngih panam.

⁴Ngaich ök kikānö nö kē nak tarik, ngaich hayunngen cha; ngaich ngö ṙô anga-aṅ, Hòṅ, yih nak taheui tarik nö in cha, hö-ö pöri chū-ö akahalōn tö ṙeūngö cha:

⁵Ngaich ngö inlahen angū-ö i rētak linöptökūö inkūp kinlōngö, hē e nö ngaich nö sangūla, kunyī-inyre ngaich nak tarik: öt akahalōn chū-ö tö kū-ö cha: lū-u cha ka-eūyen; kôlö yin min in cha.

⁶Kēlen cha pöri anga-aṅ nö i kui patī, ngaich hayunngen cha nö i nuk rōi chōn tövī-i nö linen, nup töhaṙākö tö ò nö i kui patī.

⁷Ngaich yik tarik nö lū-u cha nö kū-ö tö Yôtön nö söl i nuk lökngö invāngngö: höng feushë cha-a nö elkahôiyö yik lamū-u cha, ngaich öptö kūö ök inkūp kinlōngö cha-a.

⁸Ngaich öölu cha-a nö ṙōlngöre, yòhlö anga-aṅ ngaich nö in cha nö i kui patī;

⁹Ngaich ngö ṙô ök kikānö tö nak tarik, Akahalōn chin tö ngam Mā Tēv nö kētö ngih panam nö in yīö, ngaich ngam pinhë-ekūö ih tö yīö inrē nö fuk kui ih, ngaich ṙòkhöre inrē vē aṅ ngih panam nö yëngö nö i kūö yīö.

¹⁰Pò ih ngaich hang tī ngam Mā Tēv nö hanyôngö mak ngam Töngāṅv Mai nö i kūö yīö, hē yīö ṙā-ang Ai-kup; tö tī yīö inrē tö nak tönët tak rācha aṅ Amôr, nak lamuh tö Yôtön, Sihòṅ, Ôk inrē nak töhatngö tö tī yīö.

¹¹Höng hangtöre īhö tö e, paṙöyi ellōn īhö ngaich, öt rēhĕn nö ōtre ma-alaha nö i tarik, tökūö yīö: pò ngam Tēv yīö ngam Mā Tēv, anga-aṅ an Tēv latulöng töm halīöngö, lataṙeū inrē töng tumlat.

¹²Lökten, vë-ekūö yīö chin, im Mā Tēv ṙô yin kilēḵngôre in chu, sā chu chū-ö ngaich aheūkölōn tö yīö hòṅ yīö yī-ö inrē aheūkölōn tö patī öp yöng chu kikōnyö, kē-ĕkūö chu inrē tö tökô-en minkahngö;

¹³Hòṅ yīö min inrē hayööken ap kikōnyö yöng chu nö aṅ, tap kikānö yöng chu nö aṅ, tap kikānö yöng chu, tö yip kanônyö chu, tö yip kanānö chu, tö nup chehen cha inrē ngaich ṙānyö nômö ih min ṙā-ang im kinpaha.

¹⁴Ngaich ngö ṙô nak tarik tö ò, Ṙënngen yīö ön ngih nômö ai, yē yīö öt rahëchyen ṙô tö ngih la-en ai; ngaich angū-ö min, hē ngam Mā Tēv nö kētö ngih panam nö in ih, ngaich ihö mīnö aṙē-ĕlōn kô-en inrē in meh.

¹⁵Ngaich anga-aṅ nö hōten cha nö i kūö tö kuvāha nö löktökūö inkūp kuföt: pò ök patī ò nö i kui ök kinlonglö el panam, i yöng kui ök kinlōngö anga-aṅ inrē.

¹⁶Ngaich ngö ṙô anga-aṅ tö cha, Chu im rôngö nan, hòṅ nāṅ öt kô-òngvah tö tī yip lamū-ure; lūöi sumkam an hayunngöre umuh, hanöng saha yip lamūḵ nö havantöre ngaich unôich an kiröönngöre el talöökö re.

¹⁷Ngaich ngö ṙô nak tarik tök kikānö, Öt fāluṙen in min īhö i ngih töchūöku kinlēḵngô meh hinôtö ih kilēḵngôre tö meh.

¹⁸Yĕh meuk, hē ih min yih i ngih panam, kapòklö ngih pömchö tökuvāha töngāṅv ta-īö im inkup ngam löknyö ai hôtu tö meh: ngaich hamūltöre yī-ö el patī ap yöng meh, tö yip kanônyö meh, ṙòkhöre inrē yip aṅ patī ap kikōnyö yöng meh.

¹⁹Ngaich angū-ö min, yē öp töng kumnyī-inyre nö löknyö nup inkūp ap patī meh nö el tökiröönö, i kui ò min ap mahām ò, ngaich hö-ö īhö fālūṙen; öp töng mī-in meh min el patī, i kui ih min ap mahām ò, yē öp lamūöltö tīre nö in ò.

²⁰Yē meh pöri vënyö ngih la-en ih, ngaich öt fāluṙen īhö min im töchūöku kinlēḵngô ngam hinôtö ih kilēḵngôre ngam hinôtö ih kilēḵngôre tö meh.

²¹Ngaich ngö ṙô ngam kikānö ngatī an yĕh ngaich, sā minë ṙô nāṅ. Ngaich tīnngen cha anga-aṅ, kiröönngöre cha-a ngaich: ngaich anga-aṅ nö kapòklö ök töngāṅv tökuvāha nö ik inkūp kuföt.

²²Kiröönngöre cha-a ngaich, ngaich sölta nö ik rôngö, ngaich lūöi sumkam nö höngngöh nö umuh, hanöng saha yik lamūḵ nö havantöre; chöhö cha yik lamūḵ nö keuheūt nö el talöökö, öt kôtökūö pöri tö cha.

²³Havantöre ngaich nak tarik, ngaich peūtöre nö ṙā-ang kui ök rôngö, havangngöre ngaich, ngaich yihtöre nö in Yôsuā ök kikōnyö kūön Nön: ngaich cha-a nö vë-eny nang ò nö keuheūtnyö ṙôre tö lānyngenre.

²⁴Ngaich ngö ṙô cha-a tö Yôsuā, Kô-en an ngam Mā Tēv nö kētö në panam nö eltī hī; hēk inrē yip aṅ në panam nö yëngö nö i kūö hī.