Read Car_Nicobarese YÔSUĀ 20 Bible Online

YÔSUĀ 20 - Car_Nicobarese bible

YÔSUĀ 20

¹Ngaich ngam Mā Tēv nö vë-ekūö Yôsuā, nö ngö ṙô,

²Vë-ekūö yip kūön Israĕl, ngö ṙô, Mikahngö nup elpanam chūök innyatlö, nup ṙô chu in yīö lökten in Môsös:

³Hòṅ öp famël tarik nö faltöre nö in e öp töt tamölngenre töt akahtenre inrē: ngaich anū-ö min nö in yīö nö innyatlö tö öp mahavahal vah mahām.

⁴Ngaich anga-aṅ min nö faltöre i töhĕng elpanam in u, ngaich sökhak anga-aṅ min nö ip lökhöt ip inkūp kinlōngö öp elpanam, ngaich vë-eny ngam löktenre nö elnang yip mā ngam elpanam; ngaich cha-a min nö kē an nö in cha nö elpanam, ngaich kētö chūök ò, hòṅ ò nö iyöng in cha.

⁵Ngaich yē öp mahavahalvah mahām nö lūḵ an, ngaich öt kēten ngam famël tarik cha-a min nö eltī ò; pò ò nö fëlngö ök holre nö amahaiṙen, öt tösumrīk inrē tö ò nö lāurĕh.

⁶Ngaich anga-aṅ min nö iyöng im elpanam, hanöng saha ò nö sökhak nö i kūö yip tömaṙôngö nö akaha fālen, hanöng saha kinpaha öp mākūö kūönṙô i nup sakāmö anū-ö: ngaich möl ngam famël tarik nö havan, nö yih nö elpanamre, nö i patīre, ip elpanam ṙeūngö ò nö falngöre.

⁷Ngaich cha-a nö haköhngen Kates i Kelelī ip rung panam Naftalī, Sīkem inrē ip rung panam Ifrēm, Kirīatarpā inrē (angū-ö an Hepròn), ip-rung panam Yūta.

⁸Lāmuh tö Yôtön inrē i Yērikō lā chūhöt, mikahngen Pēsĕr cha-a el tönyalnyi ip töṙā-akūö panam öp miyöngö Rūpön, Rēmòt inrē i Kilīöt aṅ i miyöngö Kāt kōlan inrē i Pasān aṅ i miyöngö Manasē.

⁹Anū-ö nun në elpanam tövīlöngö nö chööḵnyö tö yik kūön Israĕl yik aṅ tahëng inrē mi-iyöng in cha, hòṅ yip tö amahaiṙen nö kapahatī tö tarik nö faltöre nö umuh, ngaich öt kapah tö tī öp mahavahalvah mahām, hanöng saha ò nö sökhaka nö i kūö yip tömaṙôngö.