Read Car_Nicobarese YÔSUĀ 22 Bible Online

YÔSUĀ 22 - Car_Nicobarese bible

YÔSUĀ 22

¹Ngaich Yôsuā nö havëtö yik Rūpön tö yik Kāt inrē, tök töròngti miyöngö Manāsē,

²Ngaich ngö ṙô tö cha, Köp yin tö nuk ṙô Môsös nö tölṙô yīö ök tarik ngam Mā Tēv, hang ṙô chu inrē tö nup tinölô yīö tö chu:

³Hö-ö yin ṙāngö yip holre i në töṙōl sakāmö söl i ngih sakāmö, köp pöri tö ngam chöngö aṅ im Tēv yīö ngam Mā Tēv.

⁴Ngaich an ngam Tēv yīö töngamuh ngam Mā Tēv nö kētö haneūheu yip hol yīö, sā ṙô ò nö in cha: lökten yin ngaich havöökūöre, chuh el nup rūkuire inrē, ip panam ap amin yīö, öp kahëtö Môsös ök tarik ngam Mā Tēv nö in yīö lāmuh tö Yôtön.

⁵Höng haṙēmngenre pöri öi la-evṙen tö ngam inchöngten tö ngam chöngö inrē, ngam tinöölô yīö tö Môsös ngam tarik ngam Mā Tēv, öi hāngenlōn tö ngam Mā Tēv ngam Tēv yīö, lök el në talöökö ò inrē, haköp në chöngö ò inrē, haköpngöre inrē in ò, lök la-en ò inrē keuheūttö ellōnre keuheūttö nômöre inrē.

⁶Hakôlò cha ngaich Yôsuā, ngaich tīnngö rit cha: ngaich chuh el rūkuire cha-a.

⁷Ngaich ròngti miyöngö yik Manāsē tökētu amin tö Môsös nö i Pasān: yik tahëng pöri töròngti kē-ĕvkūö cha-a tö Yôsuā nö in yik hol cha lāmuh tö Yôtön lā sūng, hē Yôsuā inrē nö tīnngörit cha nö chuh el rūkuire, hakôlò cha anga-aṅ,

⁸Vë-ekūö cha inrē, nö ngö ṙô Kumtö töpōyen yin ngaich kanôlò havantöre el rūkuire, kumtö töpōyen inrē nuā, kumtö rupīö, kumtö humlum, kumtö mās, kumtö vët, pōyen kum inrē tö hilā: michööḵ yip holre tö nup taneūngen yīö in yip lā-al yīö.

⁹Ngaich yik kūön Rūpön tö yik kūön Kāt inrē tök töròngti miyöngö Manāsē nö havan, kiröönngöre ngaich nö ṙā-ang in yik kūön Israĕl nö ṙā-ang Sailō, öp panam i Kanā-an, nö kiröönngöre nö chuh im panam Kilīöt, ip panama min cha, öp tö ngaich nö kē-ĕ tö cha, sā chöngö ngam Mā Tēv nö lökten in Môsös.

¹⁰Chalôhë cha-a nö i chīṙö Yôtön, nö ip panam Kanā-an ngaich yik kūön Rūpön tö yik kūön Kāt tö ök tö ròngti miyöngö Manāsē inrē nö vīlö tahāklö nö i Yôtön, tökiröngö mineūkö tahāklö.

¹¹Ngaich yik kūön Israĕl nö hang tö ngö ṙô, Yĕh meuk yip kūön Rūpön tö yip kūön Kāt töp töròngtī inrē miyöngö Manānsē nö vīlö tahāklö nö lākūö öp panam Kanā-an, i chīṙö Yôtön lā ip kūön Israĕl.

¹²Ngaich hē yik kūön Israĕl nö hāngö e, ṙòkhöre ngaich yik tömaṙôngö kūön Israĕl nö hamūlöre nö i Sailō, nö hòṅ kiröönngöre nö lā-al cha nö kiyung.

¹³Tīnhanga ngaich yik kūön Israĕl tö Finehas ök kikōnyö kūön Ēliēsör ök kūönṙô nö in yik kūön Rūpön, in yik kūön Kāt inrē, in ök töròngti miyöngö Manāsē inrē, nö im panam Kiliöt;

¹⁴Söm tak yik kūön rācha hol ò, hĕng tak kūön rācha i töhĕng miyöngö in yik Israĕl; kö mākūö mitī-i yöngre cha-a nö i mupīhö Israĕl.

¹⁵Ngaich yih cha-a nö in yik kūön Rūpön, in yik kūön Kāt inrē,in öp töròngti inrē miyöngö Manāsē, ip panam Kilīöt, ngaich vë-ekūö cha achā-a, nö ngö ṙô,

¹⁶Ngö ṙô yip tömaṙôngö aṅ im Mā Tēv, Asuh öng ngih fālen yīö im Tēv Israĕl öi havööngö kūöre i ngih sakāmö i tinömörit ngam Mā Tēv, i inlahen yīö vīlö tanööngö, öi ahôngen ngam Mā Tēv i ngih sakāmö?

¹⁷Tökūönen öng angū-ö tökööl Pīôr nö in hī, öi höng öl ayī-ö hetlö ṙā-ang in e i ngih sakāmö, pòrô ök tölëlngö kūö invah nö teunghökui yip tömaṙôngö aṅ im Mā Tēv,

¹⁸Töp lökten yīö havööngökūöre i ngih sakāmö ṙā-ang i tinömörit ngam Mā Tēv? ngatī an min, yĕh meuk tö yīö ngaich ahôngen ngam Mā Tēv töngamuh, ngaich huṙöich anga-aṅ min nö tainy nö in vē tömaṙôngö in Israĕl.

¹⁹Yē ngam panam yīö pöri nö töthet ngam amin yīö, ngaich tā-a havāngtöre yī-ö im panam amin ngam Mā Tēv, ngam elyöngö ngam inrūkui ngam Mā Tēv, ngaich hol ih öi amīnu: uh pöri ahôngen ngam Mā Tēv. Uh rēhĕn ahôngen ngam Mā Tēv, uh rēhĕn ahôngen ih, öi vīlö tanööngöre nö hol ngam tanööngö ngam Tēv hī ngam Mā Tēv.

²⁰Röh ök Akān ök kikōnyö kūön Sērah nö köölö fālen i nuk chehen tö kētu, ngaich fuk kui yik tömṙôngö in Israĕl? Ngaich öt höng hĕng tak ök tarik anga-aṅ nö tölëlngö nö ik tökööl fālen re.

²¹Ngaich yik kūön Rūpön tö yik kūön Kāt inrē tö yik töròngti inrē miyöngö Manāsē nö sap ṙô ngaich vë-ekūö yik mākūö mupīhö Israĕl,

²²Ngam töng Hĕng Tömihôiṅ, Tēv, Mā Tēv! Akahalōn An, akahalōn min inrē Israĕl; yē e nö inhôngen, hēk yē e nö tökööl fālen nö im Mā Tēv, (uh in yēk hayöökaṙen tö yīö i ngih sakāmö,)

²³Pò ih vīlö tanööngö nö invööngökūö tö tinömörit ngam Mā Tēv; hēk chūök töföngö tökētu hēk nyā-aṅ tökētu, hēk yĕn chūök inlāmö tökētuvö, hökngen ngam Mā Tēv yēḵ nö hōḵo e;

²⁴Ngaich yē ih höng kūö öt milēḵṙenre vī-i e, chööḵnyuvö inrē, öi ngö ṙô, ip ṙētak môkö nö yih nö ngö ṙô yip kūön yīö min tö yip kūön ih, Suāp lā-en yīö im Mā Tēv, ngam Tēv Israĕl?

²⁵Pò ngam Mā Tēv nö vīten Yôtön nö kūöngö ihôi ih tö yīö, yī-ö kūön Rūpön kūön Kāt inrē; hö-ö yin minchöḵövö im Mā Tēv: pò yip kūön yīö min nö vīten yip kūön ih nö ṙāngö pinhë-eṅkūöre tö ngam Mā Tēv.

²⁶Lökten ih ngö ṙô, Tā-a töi halēn vinīlö öp tanööngö öt chūök töföngö tökētu, öt rēhĕn nö chūök tökētu:

²⁷Mahameukhöti pöri min angū-ö nö ihôi ih tö yīö ihôi yip tumköl chap hī yip unôichrit hī, öi i la-en ngam Mā Tēv i kūö ò holtö në töföngö tökētu tö ih, holtö në tökētu tö ih, holtö në tökētu tö ih inlāmö; hòṅ yip kūön yīö nö ötngö ṙô môkö, Hö-ö yin yī-ö minchöḵöv im Mā Tēv.

²⁸Lökten in ngö ṙô, ngaich angū-ö min, hē cha nö ngö ṙô tö ih hēk tö yip tumköl chap ih môkö ngaich ngö ṙô īhö min, Yĕh meuk ngam insā ngam tanööngö ngam Mā Tēv, vahī yik muvöhngö ih, öt chūök töföngö tökētuvö, ötrēhĕn nö chūök tökētu; mahameukhöti pöri angū-ö nö ihôi ih tö yīö.

²⁹Öthalöng an ngam Tēv tö ih ahôngen ngam Tēv öi havööngökūöre i ngih sakāmö ṙā-ang i tinömörit ngam Mā Tēv, öi vīlö tanööngö chūök töföngö tökētu, chūök nyā-aṅ tökētu, hēk chūök tökētu, nö hol ngam tanööngö ngam Tēv hī ngam Mā Tēv ngam mi-ikūö ngam inrūkui ò.

³⁰Ngaich hē Finehas ök kūönṙô, tö yik kūön rācha aṅ i yik tömaṙôngö yik yöngkūö yik mupīhö Israĕl yik hol ò, nö hang në ṙô yik kūön Rūpön, kūön Kāt, kūön Manasē inrē, ṙāmölōn cha-a ngaich tö e.

³¹Ngaich Finehas ök kikōnyö kūön Ĕliēsör ök kūönṙô nö ngö ṙô tö yik kūön Rūpön, kūön Kāt inrē, tö yik kūön Manasē, Akahalōn in ngaich töngamuh tö ngam Mā Tēv nö elṙôngö hī, pò yīö öt köölö fālen im Mā Tēv: ngaich yin töngamuh ṙānyö vē kūön Israĕl ṙā-ang eltī ngam Mā Tēv.

³²Ngaich Finehas ök kūönṙô ök kikōnyö kūön Ēlīēsör tö yik kūön rācha, nö havantöre nö ṙā-ang in yik kūön Rūpön, ṙā-ang in yik kūön Kāt inrē, nö ṙā-ang ip panam Kilīöt, nö chuh ip panam Kanā-an, nö in yik kūön Israĕl, ngaich kumtö ṙô nö in cha hēk.

³³Ṙāmölōn ngaich yik kūön Israĕl nö in e; hakôlò ngam Tēv ngaich yik kūön Israĕl, ngaich öt kakkö kinröönngöre nö kiyung nö lā-al cha, nö halëlngö ngam panam ngam chūök yik kūön Rūpön tö yik kūön Kāt inrē nö iyöng.

³⁴Ngaich yik kūön Rūpön tö yik kūön Kāt nö kaheuk ök tanööngö nö Mameuk: Pòn ngö ṙô cha-a, mameuk an angū-ö ihôi hī tö ngam Mā Tēv nö Tēv.