Read Car_Nicobarese YÔSUĀ 23 Bible Online

YÔSUĀ 23 - Car_Nicobarese bible

YÔSUĀ 23

¹Ngaich ngö inlahen angū-ö unôichrit töṙōl sumkam, hē ngam Mā Tēv nö kētö haneūheu yik Israĕl nö vinngö tī nö in yik lā-al cha, köiny ngaich ang Yôsuā sööḵlö inrē tö samyeūheu;

²Havëten yik Israĕl ngaich Yôsuā nö ṙòkhöre, yik minṙöinylen cha yik yöngkūö cha inrē, tö yik ma-akah fālen cha mākūö kumyung cha inrē, ngaich ngö ṙô tö cha, Köiny chin ngaich sööḵlö inrē i samyeūheu:

³Ngaich yī-ö meuk tī ngam Tēv yīö ngam Mā Tēv tö vē pumnāmö tarik nö ṙòkhöre tö pòkūö yīö; pò ngam Tēv yīö ngam Mā Tēv, anga-aṅ An kumyunglen yīö.

⁴Yĕh meuk, ngaich chin katölö yīö tö vē tö ōtren pumnāmö tarik, nö amin yip miyöngö yīö, löktökūö Yôtön, ṙòkhöre yip pumnāmö tarik törökiṙen tö chu, söl im Tökiröng Mai lā maneutti ngam tavūöi.

⁵Ngam Tēv yīö An ngam Mā Tēv, anga-aṅ an min kumringngen cha nö ṙā-ang i kūö yīö, ahōngen cha inrē nö ṙā-ang i kūö yīö; ngaich yī-ö min amīnu tö panam cha, sö ṙô ngam Tēv yīö ngam Mā Tēv nö in yīö.

⁶Lökten yin hangë-eṅre haköp la-evṙen inrē tö nup tökūchi i mat ngam līpöre chöngö Môsös, hòṅ yīö öt kānngöre tö e lāhāmö hēk lātavē;

⁷Hòṅ yīö öt yihtöre in vē pumnamö tarik, cha-a vē tö ōtren nö kakka minë-eny, un rēhĕn chūökṙôten tö u, un rēhĕn lök la-en u, un rēhĕn sōnngöre in u:

⁸Haköpngöre pöri im Tēv yīö ngam Mā Tēv, sā yīö ngaich söl i ngih sakāmö.

⁹Pò ngam Mā Tēv nö ahōngö tökiröng pumnāmö tarik tökalēḵ inrē nö ṙā-ang i kūö yīö: kūö yīö pöri nö öt hĕng tak tarik tösökhaka nö i kūö yīö söl i ngih sakāmö.

¹⁰Lūḵ töhĕng köny öp min töhĕng tak tarik in yīö: pò ngam Tēv ngam Mā Tēv, anga-aṅ an kumyunglen yīö, sā ṙô ò tö yīö.

¹¹Lökten yin haṙēmngenre, öi hāngenlōn tö ngam Tēv yīö ngam Mā Tēv.

¹²Yē yīö amahaiṙen havanritre, haköp ngöre inrē i vē chööḵṙen pumnāmö tarik, acha-a vē tö ōtren nö in yīö, pīhövö inrē in cha, kuhēthötre in cha inrē, ngatī cha-a nö in yīö inrē:

¹³Akahalōn takô yī-ö tö ngam Tēv yīö min ngam Mā Tēv nö öt ahōngö vē pumnāmö tarik nö ṙā-ang i kūö yīö; insuk yīö pöri min cha-a tinngöp yīö inrē, fanòh inrē nö i kaha yīö, lanòklöre el mat yīö inrē, hanöng sa yīö hatngö min ṙā-ang i kūö ngih tölöök panam ngam kahëtö ngam Tēv yīö ngam Mā Tēv nö in yīö.

¹⁴Yĕh meuk, ngaich chin kiröönngöre i ngih sakāmö i talöökö në panam nö ṙòkhöre: ngaich yī-ö akahalōn ellōn re i nômö yīö inrē, tö u nö öt hĕng tötteung nup tölöök ṙô ngam Tēv yīö ngam Mā Tēv i inlahen yīö; ṙòkhöre nun nö teungtökūö nö in yīö, öt hĕng tötteung tökūö.

¹⁵Ngaich angū-ö min, nö sā nup taṙòkhöre tölöök nö teunghö kui yīö nuk ṙô ngam Tēv yīö ngam Mā Tēv nö in yīö, ngatī min ngam Mā Tēv nö kētö kui yīö tö nup tötlöök, hanöng saha tī ò nö hatngö tī tö yīö ṙā-ang i kūö ngih tölöök panam ngam kahëtö ngam Tēv yīö ngam Mā Tēv nö in yīö.

¹⁶Yē yīö falālötī tö ngam chöngö ngam Tēv yīö ngam Mā Tēv, ngam tinöölô yīö tö ò, lök la-en tahëng tēv inrē, sōnngöre inrē in u; ngaich min ngam lanīnö ngam Mā Tēv nö tōttörekūö nö in yīö, ka-euingen yī-ö min ngaich lëlngö ṙā-ang i kūö ngam tölöök panam ngam kahëtö ò nö in yīö.