Read Car_Nicobarese YÔSUĀ 24 Bible Online

YÔSUĀ 24 - Car_Nicobarese bible

YÔSUĀ 24

¹Ngaich Yôsuā nö hamūlten yik miyöngö Israĕl nö i Sīkem, havëtö yik minṙöinylen Israĕl inrē, tö yik yöngkūö cha, tö yik ma-akah fālen cha, yik mākūö kumyung cha inrē; yihtöre cha-a ngaich nö i kūö ngam Tēv.

²Ngaich ngö ṙô Yôsuā tö yik tarik nö ṙòkhöre, Ngö ṙô an ngamMā Tēv, ngam Tēv Israĕl, Iyöng lāmuh tö ngam Tahël yik muvöhngö yīö misī, ang Tīöram kikōnyö yöng Aprahām, kikōnyö yöng Nāhōr inrē: ngaich acha-a misī nö lök la-en tahëng tēv.

³Ngaich chū-ö kē ngam yöng yīö Aprahām ṙā-ang lāmuh tö ngam Tahël, ngaich hachōten ò nö lök im panam Kanā-an nö ṙòkhöre, ṙūölö ṙôken kūön ò inrē, ngaich kē-ĕkūö ò tö Isāk.

⁴Kē-ĕkūö Isāk chū-ö inrē tö Yāköp, Isô inrē: ngaich kē-ĕkūö Isô chū-ö töp rôngö Sēir, nö hayōmö e; ngaich Yāköp tö yik kūön ò inrē nö chuh Aikup.

⁵Ngaich tīnten Môsös chū-ö Āròn inrē, halëlngen Aikup chū-ö ngaich tö invah, sā nuk tī chu ellōn e: ngaich unôich chū-ö kēnyen yīö.

⁶Ngaich kēnyö yik muvöhngö yīö chū-ö nö ṙā-ang Aikup: ngaich yī-ö yihtöre ip mai; ngaich yik aṅ Aikup nö lūḵ yik mavöhngö yīö nö hol tö inröl i uk kōra inrē tarik söl im Töngāṅv Mai.

⁷Ngaich hē cha nö peunyhökūö ngam Mā Tēv, ngaich anga-aṅ nö vītö singūlö ihôi yīö tö yik aṅ Aikup, ngaich kētu ngam mai nö i kui,ngaich kahultö kui cha; meuk tī chu nun minë mat yīö tö Aikup: ngaich ṙōl sumkam yī-ö iyöng el tönyalnyi:

⁸Ngaich kēten yīö chū-ö im panam yip aṅ Amôr, yip mī-iyöng lāmuh tö Yôtön; ngaich kiyūngö yīö cha-a: ngaich kēten cha chū-ö nö eltī yīö, ngaich kē ngam panam cha; ngaich ahatngen cha chū-ö nö i kūö yīö.

⁹Ngaich Pēlak ök kikōnyö kūön Sīpōr, rācha aṅ Mô-āp, nö choholre nö lā-al Israĕl nö kiyung; ngaich tīnngö mahavëten Pēlam anga-aṅ ök kikōnyö kūön Pīôr nö öt hakôlò yīö;

¹⁰Hö-ö pöri chū-ö hang ṙô Pēlām; lökten anga-aṅ nö iṙūöhen nö hakôlò yīö: ṙānyen yīö chū-ö ngaich ṙā-ang eltī ò.

¹¹Ngaich havāngngö kui Yôtön yī-ö, sölta ngaich i Yerikō: ngaich yik tarik aṅ Yerikō nö lā-al yīö nö kiyung, tö yip aṅ Amôr, aṅ Përis, aṅ Kanā-an, yik Hitait, aṅ Kirkas, yik Hivait yik Yëpus inrē; ngaich kēten cha chū-ö nö eltī yīö.

¹²Ngaich urēhĕkūö yīö chū-ö tīntö kilamta-ō tösīnrōlu nup ma-ahōngen cha nö ṙā-ang i kūö yīö, cha-a nak tönët tak rācha aṅ Amôr; öt aṅtī sanët yīö, ötrēhĕh aṅtī tö linreny yīö.

¹³Kē-ĕkūö yīö chū-ö ngaich tö panam öp chūök yīö öt harëtnyö elmatre vahī-ivṙen, elpanam inrē nup töt vahīlö yīö, ngaich iyöng ël u yī-ö panô-òṅ vāin ngaich iyöng ël u yī-ö; panô-òṅ vāin ôliv inrē nup töttaheūich tö yīö nyā-aṅ u yī-ö.

¹⁴Yĕh lökten pa-ekūö tö ngam Mā Tēv, kô-en lök la-en ò im kanô-en inrē: kavalngö nup tēv nup lahök la-en yik muvöhngö yīö misī lāmuh tö ngam Tāhël, i Aikup inrē; ngaich lök la-en ngam Mā Tēv yī-ö.

¹⁵Yē e pöri nö töchōich nö in yīö ngam linökö la-en ngam Mā Tēv, töngamuh yih yĕh atöllö öp lahök la-en yīö: yĕn nup tēv nup lahök la-en yik muvöhngö yīö misī lāmuh tö ngam Tahël, hēk yĕn nup tēv aṅ Amôr, yip tö iyöngö panam tö yīö; chū-ö pöri tö yip aṅ patī chu inrē, lök la-en ngam Mā Tēv in īhö min.

¹⁶Ngaich yik tarik nö sapṙô nö ngö ṙô, Öt halöng An ngam Tēv tö ih ṙāngö ngam Mā Tēv, öi lök la-en tahëng tēv;

¹⁷Pò ngam Tēv hī ngam Mā Tēv, anga-aṅ an kamënyen hī tö yik muvöhngö hī ṙāngö ap panam Aikup, ṙā-ang el ap patī inkövö, anga-aṅ inrē tötī-iv tö nuk tökiröng minkahngö nö i kūö hī aṅten hī inrē el nup talöökö lahök ël hī kiröönngöre, in yip tarik inrē tö chöö-öi elṙôngö tö hī:

¹⁸Ahōngö yik tarik inrē ngam Mā Tēv nö ṙā-ang i kūö hī, yip aṅ Amôr yip mī-iyöng im panam lökten in inrē hòṅ lök la-en ngam Mā Tēv; pòn anga-aṅ Tēv hī.

¹⁹Ngaich Yôsuā nö ngö ṙô tö yik tarik, Ötkô yin lök la-en ngam Mā Tēv; pò ò nö töhet nö Tēv; öt töhanrānyngen an nö Tēv; ötaṙē-ĕl tanôichngen yīö an min öt rēhĕn tö nup tökööl yīö.

²⁰Yē yīö ṙāngö ngam Mā Tēv, lök la-en tötohtöre inrē tēv, ngaich havööngökūöre min anga-aṅ tī tö tötlöök inrē nö in yīö, ngaich ahatngen yīö, unôichrit öp tölöök tīre nö in yīö.

²¹Ngaich ngö ṙô yik tarik tö Yôsuā, Hö-ö; lök la-en ngam Mā Tēv in īhö min.

²²Ngaich ngö ṙô Yôsuā tö yik tarik, Yī-ö yin mameuk öi höng lā-alre tö yīö ngaich atöllö ngam Mā Tēv, öi lök la-en ò. Ngaich ngö ṙô cha-a, Ihö in mahameuktö e.

²³Yĕh lökten, ngö ṙô anga-aṅ, Kavalngö nup tötohtöre tēv in yīö, harôntö ellōnre inrē im Mā Tēv, ngam Tēv Israĕl.

²⁴Ngaich yik tarik nö ngö ṙô tö Yôsuā, Lök la-en ngam Tēv re in min ngam Mā Tēv, anga-aṅ inrē min ahang ṙô ih.

²⁵Vī kinlēḵngô yik tarik ang Yôsuā ik sakāmö angū-ö ngaich vītö chöngö nö in cha inlēnö inrē i Sīkem.

²⁶Ngaich Yôsuā nö kūich në ṙô i mat līpöre ngam chöngö ngam Mā Tēv; kēḵ tökiröng inrē anga-aṅ ihong, ngaich asöklen ò nö elkatòh ök ōk chōn ök mī-i ök töhet chūök ngam Mā Tēv.

²⁷Ngaich Yôsuā nö ngö ṙô tö yik tarik nö ṙòkhöre, yĕh meuk lā-al yīö ön min ngòh ihong nö hameukhöti; pò ò nö hang nuk ṙô ngam Mā Tēv nö vë-ekūö hī: lökten an min nö lā-al yīö nö mameuk hòṅ yīö öt mahngö ngam Tēv yīö,

²⁸Tīnngörit yik tarik ngaich Yôsuā, kö chuh i aminre ngaich yik tarik.

²⁹Ngaich ngö inlahen angū-ö unôichrit në, tö Yôsuā ök kikōnyö kūön Nön ök tarik ngam Mā Tēv, nö kapah, ngaich nö hēngòng söm samyeūheu ṙēti.

³⁰Lāpngen ò cha-a ngaich nö in öp kūöngö ök amin ò i Timnatsērah, öp mī-in öp rung panam Ifrēm, lā kapā öp rôngö Kā-as.

³¹Lök la-en ngam Mā Tēv ang Israĕl i rô-òtö sakāmö Yôsuā, i rô-òtö sakāmö yik minṙöinylen inrē yik tö-ōtren nö aṅ unôichrit Yôsuā, tö-akahalōn tö nuk la-en ngam Mā Tēv, nuk tī ò tö pòkūö Israĕl.

³²Ngaich nuk tangëḵ Yôsĕf, nuk kum yik kūön Israĕl nö ṙā-ang Aikup, nö i Sīkem nö lāpi tö cha, ip tumlat havah Yāköp nö in yik kikōnyö kūön Hamôr ök kikōnyö yöng Sīkem nö töhĕnghötṙòng tö rupīö: ngaich anū-ö nö amin yik kūön Yôsĕf.

³³Ngaich kapah inrē Ēlīēsör ök kikōnyö kūön Āròn; ngaich lāpngen ò cha-a i kui ap rung Finehas ök kikōnyö kūön ò, lāpngen ò cha-a nö i kui ap Rung panam Ifrēm.