Read Car_Nicobarese YÔSUĀ 3 Bible Online

YÔSUĀ 3 - Car_Nicobarese bible

YÔSUĀ 3

¹Kā-eūilökūö ngaich Yôsuā nö choholre tö peuheū, kē-ĕngre cha-a ngaich nö ṙā-ang sitim, ngaich yih nö i Yôtön, anga-aṅ tö yik kūön Israĕl inrē nö ṙòkhöre; ngaich iyöng umuh cha-a urēhĕkūö invāngngö cha.

²Ngaich ngö inlahen angū-ö unôichrit tölūöi sumkam, tö yik yöngṙen kumyung nö kiröön nö lök ellōn ök elyöngö;

³Ngaich cha-a nö tölṙô yik tarik, nö ngö ṙô, hē yīö meuk ngam kasòng chöngö ngam Tēv ngam Mā Tēv yīö, ngaich keūnö e yip kūönṙô yip Lēvī, ngaich yī-ö min ṙā-ang ngam chūökre, ngaich tömrit e.

⁴Hôyu min yī-ö ihôi yīö tö e, nët köiny sumkôngö kinlaha: un haröhtöre nö in e, hòṅ yīö akahalōn tö talöököre kiröönngöre; tön rö-ö yin ha-eh lök ngih talöökö.

⁵Ngaich ngö ṙô Yôsuā tö yik tarik, Ahetlöre yin; tön huṙöich an min ngam Mā Tēv nö la-evṙen tö pinngangkūö nö in yīö.

⁶Ngaich vë-ekūö yik kūönṙô ang Yôsuā, nö ngö ṙô, havāngngöre yin urēhĕkūö më tarik keun ngam kasòng chöngö. Keunlöre cha-a ngaich töm kasòng chöngö, kiröönngöre ngaich nö urēhĕkūö yik tarik.

⁷Ngaich ngö ṙô ngam Mā Tēv tö Yôsuā, Hapōilen meh chin min i ngih sakāmö i kūö Israĕl nö ṙòkhöre, hòṅ cha nö akahalōn, tö chu sāre misī in Môsös ngatī chū-ö min in meh.

⁸Tölṙô yip kūönṙô man yip kameun ngam kasòng chöngö, öm ngö ṙô, Yē yīö sölta el ap mak Yôtön ui halöinyköre.

⁹Ngaich Yôsuā nö ngö ṙô tö yik Israĕl, Yihtöre ihih, hangihtöre tö ṙô ngam Tēv yīö ngam Mā Tēv.

¹⁰Ngaich ngö ṙô Yôsuā, Ihih yin min akahalōn tö ngam tö-aṅ Tēv nö in yīö, tö ò inrē nö öthō nö ahōngen yip aṅ Kanā-an nö i kūö yīö, tö yip Hitait, Hivait, Përisait, Kirkes, Amôr, Yëpus inrē.

¹¹Yĕh meuk, ngam kasòng chöngö ngam Mā në taṙòkhöre panam nö urēhĕkūö yīö nö havāngngöre tö Yôtön.

¹²Lökten yin nëtsīön tak kahë tö tarik aṅ i yip miyöngö Israĕl, hĕng tak tarik i töhĕng miyöngö.

¹³Ngaich angū-ö min, hē nup elröön yip kūönṙô yip kameun ngam kasòng ngam Mā Tēv, ngam Mā taṙòkhöre panam, nö röönhak nö el ngam mak Yôtön, röki min ngaich ngam mak Yôtön ngam töhëmti nö löktö lātulöng; fônghak min angū-ö nö söktöheichṙen.

¹⁴Ngaich angū-ö min hē yip tarik nö kē-ĕngre nö ṙāngö nuk rūkuire, nö havangngöre tö Yôtön, ngaich yip kūönṙô yip kameunkö ngam kasòng chöngö nö lā-urĕh tö yip tarik;

¹⁵Ngaich hē cha yip kameunkö ngam kasòng nö sölta nö i Yôtön, kasumtöre röön inrē nö sölta nö i Yôtön, kasumtöre röön inrē yip kūönṙô nö el ngam mak yip kameunkö ngam kasòng, (Pò Yôtön nö taṙēichlöng kui i rô-òten inmūlö ṙòng sāiny,)

¹⁶Sökngöre ngam mak ngam töhëmti nö ṙā-ang latulöng, ngaich söktöhëich nö fônghaka, marôvat, i Ātöm, ök elpanam hol Sarētan: ngaich rökngöre nö keuheūtngöre öp töhëmti nö kū-ö tö el ap mai Arapā, ap Sāi Mai: ngaich yik tarik nö havāngngöre nö i Yerikō.

¹⁷Ngaich yik kūönṙô kameunkö ngam kasòng chöngö ngam Mā Tēv nö köpöröön nö sökhaka nö i kui tönyô tumlat ellōn Yôtön, ṙòkhöre ngaich yik Israĕl nö havāngngöre nö lökngö kui öp tönyô tumlat, hanöng saha ök pumnāmö tarik nö keuheūtlöre nö havāngngö kui Yôtön.