Read Car_Nicobarese YÔSUĀ 4 Bible Online

YÔSUĀ 4 - Car_Nicobarese bible

YÔSUĀ 4

¹Ngaich ngö inlahen angū-ö, hē ngam pumnāmö tarik nö ṙòkhöre nö hatngö nö ngaich vāngngö tö Yôtön, tö ngam Mā Tēv nö vë-ekūö Yôsuā, nö ngö ṙô,

²Nët sīön tak kahë man tö aṅ i yip tarik, hĕng tak tarik aṅ i töhĕng miyöngö,

³Tölṙô cha më-eṅ ngö ṙô, Kē ihong yin nëtsīön ṙā-ang ellōn Yôtön, ip chūök röön më kūönṙô nö köp nö sökhak, tayūkö u kum yīö havāngngöre, ngaich ṙātö u im chūök yīö iyöng, öp chūök yīö min iyöng i ngih hatööm.

⁴Ngaich Yôsuā nö havëtö yik tönëtsīön tak tarik yik halēnlö ò aṅ in yik kūön Israĕl, hĕng tak tarik i töhĕng miyöngö:

⁵Ngaich ngö ṙô Yôsuā tö cha, urēhĕkūö ngam kasòng chöngö ngam Tēv yīö ngam Mā Tēv, havāngngöre ellōn Yôtön, ngaich kö hēngö kahë yī-ö tö ihong nö tayūkö nö elranôṙö yīö, sā tum miyöngö yip kūön Israĕl.

⁶Hòṅ e min nö minkahngö nö in yīö, hòṅ e hē yip kūön yīö môkö nö hatön, nö ngö ṙô, Asuh manah ön në ihong?

⁷Ngaich ngö ṙô yī-ö min tö cha, Pò ngam mak Yôtön nö rökngöre nö i kūö ngam kasòng chöngö ngam Mā Tēv; hē ih havāngngö ël Yôtön, röki ngaich ngam mak Yôtön: ngaich në ihong min tö-örheūheu nö inköpkölōn in yip kūön Israĕl.

⁸Ngaich yik kūön Israĕl nö teūngen tö tinöölôre tö Yôsuā, ngaich chātlö ihong nëtsīön milôhò nö ṙā-ang ellōn Yôtön, sā ṙô ngam Mā Tēv nö in Yôsuā, sā tum miyöngö yik kūön Israĕl, ngaich tayūkö u cha-a nö kum chā nö havāngngöre ip chūökö chūök cha nö iyöng, ngaich ṙātö u nö umuh.

⁹Ngaich Yôsuā nö katöplö nup tönëtsīön ihong nö ellōn Yôtön, i chūök röön yik kūönṙô yik kameun ök kasòng chöngö: sökhak nup nö umuh, i ngih sakāmö.

¹⁰Pò yik kūönṙô yik kameun ök kasòng nö sökhaka nö ellōn Yôtön, hanöng saha kinheūten nuk tinöölô Yôsuā tö ngam Mā Tēv nö vë-ekūö yik tarik, nö sā tinöölô Yôsuā tö Môsös nö ṙòkhöre. Kurāten ngaich yik tarik nö havāngngöre.

¹¹Ngaich ngö inlahen angū-ö, hē yik tarik nö ngaich nö hatngö nö vāngngö, havāngngöre ngaich ngam kasòng ngam Mā Tēv, tö yik kūönṙô, nö i kūö yik tarik.

¹²Ngaich yik kūön Rūpen, tö yik kūön Kāt, ròngti inrē miyöngö Manasē, nö havāngngöre nö aṅhāṅvti nö urĕh tö yik kūön Israĕl, sā ṙô Môsös tö cha:

¹³Lohten yik nö fën anāi köny tölēn tö aṅtī re nö i kinyūngö urĕh tö ngam Mā Tēv nö havāngngöre nö im kinyūngö, i nup töṙa-akūö panam Yerikō.

¹⁴Im sakāmö angū-ö ngam Mā Tēv nö hapōilen Yôsuā nö i kūö yik Israĕl; ngaich cha-a nö pa-ekūö tö ò, sā pinhë-eṅkūö cha tö Môsös, i rô-òtö nuk sakāmö ò nö aṅ.

¹⁵Ngaich ngam Mā Tēv nö vë-ekūö Yôsuā, nö ngö ṙô,

¹⁶Tölṙô më kūönṙô më kameun ngam kasòng chöngö, hòṅ cha nö yôklö nö ṙā-ang el Yôtön.

¹⁷Lökten Yôsuā nö tölṙô yik kūönṙô, nö ngö ṙô, Yôklö yin ngaich ṙā-ang el Yôtön.

¹⁸Ngaich angū-ö nö ngö inlahen, hē yik kūönṙô yik kameun ök kasòng chöngö ngam Mā Tēv nö yôklö nö ṙā-ang ellōn Yôtön, ngaich nuk elröön yik kūönṙô nö talöhlöng ngaich i kui ök tönyô tumlat, havantöre ngaich ngam mak taṙēchlöng nö i kui e, sāre tö lā-urĕh.

¹⁹Ik sinömö sakāmö ök raneh chingëṅt më tarik nö yôklö nö ṙā-ang el Yôtön, ngaich iyöng i Kilkāl, lā chuhöt tö kūöngö Yerikō.

²⁰Ngaich i Kilkāl ang Yôsuā nö katöplö nuk tö nët sīön ihong, nuk kahëlö cha nö ṙā-ang el Yôtön.

²¹Ngaich vë-ekūö yik kūön Israĕl anga-aṅ, nö ngö ṙô, Yē yip kūön yīö min nö hatön yip yöngre môkö, nö ngö ṙô, Asuh ap manah në ihong?

²²Ngaich mikahtö lōn yip kūönre yī-ö, öi ngö ṙô, Havāngngö ngih Yôtön yik Israĕl misī nö lökngö el tönyôlö tumlat.

²³Pò ngam Tēv yīö ngam Mā Tēv nö hanyôngö ngam mak Yôtön nö i kūö yīö, hanöng saha yīö ngaich vāngngö, sā tī ngam Tēv yīö ngam Mā Tēv tö ngam Töngāṅv Mai ngam hanyôngö ò nö urēhĕkūö hī hanöng saha ih vāngngö:

²⁴Hòṅ vē tarik aṅ ngih tumlat nö akahakūö tö kël ngam Mā Tēv, tö e nö tökalēḵ: hòṅ cha nö örheūheu nö pa-ekūö tö ngam Tēv yīö ngam Mā Tēv.