Read Car_Nicobarese YÔSUĀ 5 Bible Online

YÔSUĀ 5 - Car_Nicobarese bible

YÔSUĀ 5

¹Ngaich ngö inlahen angū-ö, hē yik rācha aṅ Amôr, yik lāmuh tö Yôtön lā sung, ṙòkhöre yik rācha aṅ Kanā-an, yik lā kūö mai, nö hang tī ngam Mā Tēv nö hanyôngö ök mak Yôtön nö i kūö yik Israĕl, hanöng saha cha nö vāngngö, ngaich cha-a nö paṙööyi ellōn, öt rēhĕn cha-a nö ōtre ma-alaha nö in re, tökūö yik kūön Israĕl.

²Hē e ngam Mā Tēv nö ngö ṙô tö Yôsuā, Vī sakūre man tö flin (töngëṅ ihong), tunyinyngö më kūön Israĕl hēk nö innët heuh.

³Ngaich Yôsuā nö vī sakūre tö flin (töngëṅ ihong), ngaich tunyinyngö yik kūön Israĕl nö ip rung mininykūö.

⁴Angū-ö ön ngih chööḵnyö lökten Yôsuā nö tunyinyhanga: Ṙòkhöre yik tarik yik yamih nö ṙā-ang Aikup, yik kikōnyö, ṙòkhöre yik tarik kumyung, nö kapah nö el tönyalnyi el talöökö, unôichrit yanīhi cha nö ṙā-ang Aikup.

⁵Pòn ṙòkhöre yik tarik yamih nö tötunyīnyi: yik tarik pöri tökayônyu nö el tönyalnyi nö el talöökö tök yanihih cha nö ṙā-ang Aikup, nö öt tunyīnyi tö cha.

⁶Pò yik kūön Israĕl nö el tönyalnyi nö kiröön tö fën anāi samyeūheu, hanöng saha yik tarik, yik tarik kumyung yik yamih nö ṙā-ang Aikup, nö keuheūtngörevah, pò cha nö öt hang ṙô ngam Mā Tēv: cha-a yik chūök ṙô ngam Mā Tēv: nö kilēḵngôre tö ò nö öt halöngten cha nö meuk ngam panam, ngam ṙô ngam Mā Tēv nö kilēḵngôre nö in yik muvöhngö cha nö kētö e nö in hī, panam töhëmö aṅkūö tö aṅteh hönī inrē.

⁷Ngaich yik kūön cha, yik hachohol ò nö ṙënngen cha, acha-a tö tunyīnyi tö Yôsuā: pò cha nö öt tunyīnyi, pò cha nö öt tunyinyngen cha nö el talöökö.

⁸Ngaich angū-ö nö ngö inlahen, hē cha nö keuheūtötī nö tunyinyngö yik tarik nö ṙòkhöre, ngaich cha-a nö höngngöh nö i nuk chūök cha elyöngö, hanöng saha cha nö lööken.

⁹Ngaich ngö ṙô Ngam Mā Tēv tö Yôsuā, Pilönngö ngam sinrōngkūö chin aṅ Aikup nö ṙā-ang in yīö i ngih sakāmö. Lökten ök chūökö nö kaheūkö minë-eny nö Kilkāl, söl i ngih sakāmö.

¹⁰Ngaich yik kūön Israĕl nö iyöngtöre nö i Kilkāl; ngaich cha-a nö haköpken öp Paska ik finënsīön sakāmö ngam chingëṅt tö harap el nup töṙa-ākūö panam Yerikō.

¹¹Ngaich cha-a nö nyā nuk tököiny sāiny aṅkūö ngam panam im huṙöich unôichrit ngam Paska, töt aföhlöng kēk töhanyôṙö sāiny inrē, im töng angū-ö sakāmö.

¹²Ṙā-aiṙen ngam manna im huṙöich, tö kinheūtö kūö cha nö nyā tököiny sāiny ngam panam; öt rēhĕn yik kūön Israĕl nö ōtre in tö manna; nyā nup ṙòng ngam panam Kanā-an pöri cha-a ik samyeūheu angū-ö.

¹³Ngaich ngö inlahen angū-ö, hē Yôsuā nö röhta nö i Yerikō, ngëicha anga-aṅ nö chingôhòlkūöre, ngaich meuk ök tarik hĕng tak i kūö ò tö-aṅhāṅv eltī tö sanët: ngaich chuh in ò Yôsuā ngaich ngö ṙô tö ò, Lamā in ih ömeh, hēk lā-al ih ṙöng?

¹⁴Ngaich ngö ṙô anga-aṅ, Hö-ö; yöngkūö yip tömaṙôngö pöri aṅ im Mā Tēv öich yih töngamuh. Ngaich Yôsuā nö afukngöre fāthakkūö nö el tumlat, ngaich salām, ngö ṙô inrē tö ò, Suh ap ṙô ngam Mā chu nö in ngòh tarik ò?

¹⁵Ngaich ök yöngkūö yik tömaṙôngö aṅ im Mā Tēv nö ngö ṙô tö Yôsuā, Kē-ĕng ngam kunröpöre man nö ṙā-ang i röön meh, tön töhet an ngam chūökö ngam chūök meh sökhaka Ngaich ngatī ang Yôsuā.