Read Car_Nicobarese YÔSUĀ 7 Bible Online

YÔSUĀ 7 - Car_Nicobarese bible

YÔSUĀ 7

¹Köölöfālen pöri yik kūön Israĕl nö i nuk tökētu chehen: pò Akān, ök kikōnyö kūön Karmi, ök kikōnyö kūön Sapti, ök kikōnyö Sērah, aṅ i miyöngö Yūta, nö kē aṅ i nuk tökētuvö chehen: ngaich ṙūölkūö ngam lanīnö ngam Mā Tēv nö in yik kūön Israĕl.

²Ngaich Yôsuā nö tīnngö tarik nö ṙā-ang Yerikō nö chuh Ai öp mi-i Petaven, lā chuhöt tö Pētĕl, ngaich vë-ekūö cha; nö ngö ṙô, Kuṙòh kiröönngöre hayuntö matre töm panam. Ngaich yik tarik nö kiröönngöre nö ulāitö matre tö Ai.

³Havantöre cha-a ngaich nö in Yôsuā, ngaich ngö ṙô tö ò, Uh yin më tarik nö ṙòkhöre nö kiröönngöre; höng hökngen yip tönët hēk lūöi köny pöri tarik nö kiröönngöre nö kiyūngö Ai; un ṙòkhöre yip tarik nö la-evṙen nö umuh; tön höng öt ṙôkenvö yip.

⁴Lökten nöng lūöi köny yik tarik chamuh in e; falngöre pöri cha-a ngaich nö i kūö yik tarik aṅ Ai.

⁵Lūöi anāi tafūöl tak pô yik tarik aṅ Ai tö cha: lū-u cha ngaich cha-a nö löktökūö ök inkūp söl Sīparim, ngaich ötkô-òtī tö cha nö ik paneūtī: ngaich paṙööyi nuk ellōn yik tarik, ngaich vītöre nöng sā mak.

⁶Tikachngö inyutre ngaich Yôsuā, ngaich fātngökūöre nö, afukngöre nö el tumlat nö i kūö ngam kasòng chöngö ngam Mā Tēv nö söl harap, anga-aṅ tö yik minṙöinylen Israĕl inrē, tūi el kui re inrē cha-a tö tumlat.

⁷Ngaich ngö ṙô Yôsuā, Aōla Ō Mā Tēv, kūöyòh ömeh havāngngö vē tarik nö i Yôtön, öm kēten hī eltī yip aṅ Amôr, öm hōten ih hatngö? Röh öi öre sòk höng kô-ònglōn iyöng lamuh tö Yôtön!

⁸Ō Mā, sitih ṙô öich min unôich tö Israĕl nö hapungtö ukre nö i kūö yip lā-alre!

⁹Pò yip aṅ Kanā-an tö yip aṅ në panam nö ṙòkhöre min nö hāngö e, ngaich havīlen ih min, ngaich rökngö minë-eny ih nö ṙā-ang i kūö ngih panam: ngaich sitih inlahen min më-eṅ tö ngam tökiröng minë-eny meh?

¹⁰Ngaich ngö ṙô ngam Mā Tēv tö Yôsuā, Choholre man; kūöyòh öm ngatī fāthakkūö afukngöre?

¹¹Köölö fālen an Israĕl; hôṅ, tôichngen yin tö ngam chöngö chu ngam tinöölô cha tö chu: hôṅ, kē nuk chehen yin nuk tökētu; ulāya yin inrē hanyatkö elmat inrē uroh yin nö ngaich nö chaphöt u nö i nup chehenre.

¹²Lökten yip kūön Israĕl nö ötkô nö sökhak nö i kūö yip lā-alre, hapungtö uk re pöri cha-a nö i kūö yip lā-al cha, pò chān ngaich nö vīngöre nö töt hakôlöngṙô: hö-ö chin ngaich ngöhöre in meh höng yēḵ yīö ahatngö nup tökētu chehen nö ṙā-ang in yīö.

¹³Choholre, ahetlö më tarik, ngö ṙô, Ahetlöre yin höng öp huṙöich: tön ngö ṙô an ngam Mā Tēv, ngam Tēv Israĕl, Tökētu nup umuh chehen elṙôngö meh, Ō Israĕl: ötkô man sökhak i kūö yip lā-al re, hanöng saha nup tökētu chehen nö kē-ĕyö nö ṙā-angin yīö.

¹⁴Lökten yin min ip peuheū öi haröhtu i miyöngö yīö: ngaich angū-ö min, töp miyöngö öp tökēlöre tö tī ngam Mā Tēv min nö haröhtöre nö i mupīhö; öp mupīhö inrē öp tökēlöre min tö tī ngam Mā Tēv nö haröhtöre nö i mitī-ire; ngaich öp mitī-i tökēlöre min tö tī ngam Mā Tēv nö haröhtöre hĕng hĕng tak tarik.

¹⁵Ngaich angū-ö min, töp tökôtī min nö holtö nup tökētu chehen nö föngi min nö i kūö tameūyö, anga-aṅ ṙòkhöre nup chehen ò inrē: pò ò nö köölö fālen nö im Mā Tēv, kūö ò inrē nö kulō-ov inlahen nö i Israĕl.

¹⁶Ka-euilökūö ngaich Yôsuā nö choholre tö peuheū, ngaich kēten Israĕl nö haröhtu nö i miyöngöre; ngaich kēlöre öp miyöngö Yūta:

¹⁷Ngaich kētö mupīhö Yūta anga-aṅ nö haröhtu; ngaich kē mupīhö Sēra anga-aṅ: ngaich kētö ök mupīhö Sērah nö haröhtu hĕng hĕng tak tarik; ngaich kēlöre ang Saptī:

¹⁸Ngaich haröhtö yik aṅ patī ò anga-aṅ hĕng hĕng tak tarik; ngaich Ākan nö kēlöre, ök kikōnyö kūön Karmi, ök kikōnyö kūön Saptī, aṅ miyöngö Yūta.

¹⁹Ngaich ang Yôsuā nö ngö ṙô tö Ākan, Kakūönö. Vë-ekūö meh chin, ha-öiny ngam Mā Tēv ngam Tēv Israĕl halööknyôre öm in ò; vë-enynang chu inrē tök la-en meh; un hayūni, angū-ö nö in chu.

²⁰Ngaich sap ṙô Yôsuā Ākan, nö ngö ṙô, Kô-en chin köölö fālen im Mā Tēv, ngam Tēv Israĕl, ngö inlahen chin:

²¹Hē chu meuk nuk tölöök i nuk tökē-ĕ chehen, kinṙum aṅ Pēpilön, nëtòng siköl rupīö, ngaich hĕng michūöṙö humlum taneūi anāi siköl lumngan, ngaich yikngen u chū-ö, ngaich kē-ĕ u; yĕh meuk, hayūni nup nö el tumlat el milūkö öp rūkui chu, lataṙeū öp rupīö tö e.

²²Ngaich Yôsuā nö tīnhanga, ngaich cha-a nö faltöre nö ik rūkui; ngaich meuk, hayūni anū-ö nö el ök rūkui ò, el katòh u inrē ök rupīö.

²³Ngaich cha-a nö kē-ĕ u nö ṙā-ang el milūkö ök rūkui, ngaich kētö u nö in Yôsuā, in yik kūön Israĕl inrē nö ṙòkhöre; ngaich ṙātö u cha-a nö i kūö ngam Mā Tēv.

²⁴Ngaich Yôsuā, ṙòkhöre inrē yik Israĕl hol ò, nö kē-ĕ Ākan ök kikōnyö kūön Sēra, tök rupīö, tök kinṙum, tök michūöṙö humlum, tö yik kikōnyö kūön ò, kikānö inrē tö nuk kōiny nuā ò, köttö ò, sīṅp ò, tök rūkui ò. Ṙòkhöre inrē nuk mi-in ò: ngaich kēnyu anū-ö tö cha nö el ök achāṙö Akōr.

²⁵Ngaich ngö ṙô Yôsuā, Kūö yòh öm hakihten hī? Hakihten meh an min ngam Mā Tēv i ngih sakāmö. Ṙòkhöre tī ngaich yik Israĕl nö kulehan tö ihong; föngngen cha ngaich nö i kūö tameūyö kulehe cha inrē tö ihong.

²⁶Ngaich cha-a nö afônglö kui ò tö yöng töfông ihong, söl i ngih sakāmö; ngaich ngam Mā Tēv nö havanrit ök tökiröng lanīnöre. Lökten ap chūökö nö kaheūkö, nö Achāṙö Akōr, söl i ngih sakāmö.