Read Car_Nicobarese 2 TÖSALÒNIKĒ 1 Bible Online

2 TÖSALÒNIKĒ 1 - Car_Nicobarese bible

2 TÖSALÒNIKĒ 1

¹Pôl. Silvanös, Timòtī inrē, löö im māṅ yip aṅ Tösalònikē im Tēv ngam Yöng hī, ngam Mā inrē Yēsū Kristū;

²Inlōnti yēḵ in yīö, lanāmö inrē aṅ im Tēv Yöng, ngam Mā inrē Yēsū Kristū.

³Kahōlö, hòṅ örheūheu in ha-öiny ngam Tēv, pòkūö yīö, pò e angū-ö nö tölöök, pòn pōihöl sanīöpö ngam mikah yīö, pōyen inrē ngam hanāngenlōn yīö tö höö nö in yīö ṙòkhöre;

⁴Lökten in ineū-euṅv in yīö, el nup patī ngam Tēv, pò ngam manöiyö yīö, mikah yīö i nup taṙòkhöre ötinkôlò yīö, kanihngen inrē, nup kaheun yīö;

⁵Ngam inmeuktö lanöökö ngam inkaha tö ngam Tēv; hòṅ yīö min kaheuktu, töhōḵov im pūlngö ngam Tēv, ngam lökten yīö kihngen inrē;

⁶Yĕn ngatī, angū-ö nö tölöök nö im Tēv nö haṙënngen kanihngen nö in Cha yip mahakihten yīö,

⁷In yīö ap haneūheu, öi hol ih, yī-ö tökihngen, ip inmeuktö ngam Mā Yēsū, nö ṙā-ang el halīöngö nö holtö yip ma-ahānga, chöngö Ò inrē.

⁸Im töhūkūö tameūyö, kētö invahal nö in cha, yip töt akahakūö tö ngam Tēv, in cha inrē yip ma-ahôngen ngam tölöök inhangkö ngam Mā hī Yēsū:

⁹Yip töt hakôlöngṙô, im tö-örheūheu kinpaha, ṙā-ang i kūö ngam Mā, ṙā-ang im kanôlò ngam minhôiṅyö Ò.

¹⁰Hē ò min nö yih nö hapōilöngö nö i yip töhet Ò, ane inrē pinganghuvö nö in cha nö ṙòkhöre yip ṙamātö ellōnre pò yīö ṙātö ellōnre im aheūkö ih in yīö ip sakāmö angū-ö.

¹¹Angū-ö chööḵnyö ih inrē örheūheu vë-elkui yīö, hòṅ ngam Tēv hī min nö kaheukten yīö tö hōḵov im invëkö yīö, ane inrē hateungngö nup taṙòkhöre lōn ngam lanöökö, nup taṙòkhöre inrē la-en ngam mikah, holtö kanô-òṅ:

¹²Hòṅ ngam minë-eny ngam Mā hī Yēsū nö in yīö nö ineū-euṅv, in Ò yī-ö inrē, sā ngam inlōnti aṅ im Tēv hī, ngam Mā inrē Yēsū Kristū.