Read Car_Nicobarese 2 TÖSALÒNIKĒ 2 Bible Online

2 TÖSALÒNIKĒ 2 - Car_Nicobarese bible

2 TÖSALÒNIKĒ 2

¹Kahōlö, vë-ekūö yīö in i inlahen yanīhih ngam Mā hī Yēsū Kristū, öp inmūlö hī in Ò inrē,

²Hòṅ yīö öt ka-eūyen hanëmngö ellōn, hòṅ yīö inrē öt pa-ekūö, un rēhĕn kūö aṅ im ma-alaha, hēḵ kūö ṙô, hēk kūö ngam tökūichö līpöre, nö sā aṅ in ih, tön īhih an ngaich ngam sakāmö ngam Mā,

³Öp tö sitih, ui hökngenre halō-oikūö tö tarik: pò e nö öt ngatī min, höng urĕh tö yihih ngam ṙināngen, ngaich hameuktö ngam tarik aṅ i tökööl, ngam kūön öt inkôlò,

⁴Anga-aṅ ngam maharah, mahapōilöre nö la-al ngam töhavëka nö tēv, hēk ngam tösalāmö, pòn hòṅ ūichlöre anga-aṅ nö el ngam töhet chūök ngam Tēv, haūchlöre nö sā ngam Tēv.

⁵Öt köpölōn öyih, hē chu misī ṙòngmö in yīö, tö chu ngaich vë-enynang yīö tö u?

⁶Ngaich yin töngamuh akahalōn tö ngòh ma-asānhanga, pòn hōtu anga-aṅ nö hameuktu ip hēre.

⁷Pò ngam ötmikahakūö sin, ngam töt īnu tö chöngö, nö ngaich nö vahīkuṙen, höng hĕng taka ap töngamuh lamakhanga, hanöng saha ò min nö kē-ĕyö.

⁸Ngaich möl nö hameuktu min ngam töt īnu tö chöngö, ngam tö fëli min tö ngam Mā Yēsū, nö aṅtī tö ngam unhômö elvāngre, ngaich lökten i inmeuktö ngam yanīhih Ò, nö harööḵngen ò min;

⁹Ngam tö sā tī sātān yanīhih, nö holtö minhôiṅyö, minkahngö tö minyôiny pinngangkūö inrē.

¹⁰Nö holtö nup taṙòkhöre inchīlö, aṅ im michūṙen nö in cha yip tökeuheūtngöre nö ötkôlò, pò cha nö öt kēḵ ngam hanāngenlōn aṅ im kanô-en, hòṅ cha öre nö hayöökaṙen.

¹¹Angū-ö lökten An ngam Tēv nö tīntö ngam invāchö nö in cha, pòn hōtu cha-a nö ṙātö ellōnre nö i minyôiny:

¹²Pòn hōtu nö ṙòkhöre cha-a nö kahòkkaṙen yip töt ṙamātö ellōnre nö im kanô-en: tökuchīken pöri nö im michūṙen.

¹³Örheūheu pöri īhö ha-öiny ngam Tēv töpòkūö yīö, kahōlö, hanāngen ngam Mā, pò ngam Tēv nö atöllen yīö ik raneh im inyööken inhetlö aṅ im Töhet Fanöinylö, im ṙinātö ellōn inrē im kanô-en:

¹⁴Ngam chūök yīö havëtu tö Ò lökten im inhānga tö ih, hinôtö tö teūngen tö kanôlò ngam Mā hī Yēsū Kristū.

¹⁵Kahōlö, lökten haköpöre sökhak, ṙapngötīre inrē im inköptö yīö fālen, pòrô nö tö kôta nö ṙô, hēk līpöre nö kahūich ih.

¹⁶Ngaich an nö hakôtenre ngam Mā Yēsū Kristū, ngam Tēv Yöng hī inrē, ngam töhāngenlōn tö hī, nö kē-ĕkūö hī tö ngam tötchanūhuvṙen inṙamlōn, ngam tölöök mineūka inrē nö lökten im inlōnti,

¹⁷Haṙamlōn yīö, haköpö yīö inrē, i tölöök la-en, tölöök ṙô inrē.