Read Car_Nicobarese 2 TÖSALÒNIKĒ 3 Bible Online

2 TÖSALÒNIKĒ 3 - Car_Nicobarese bible

2 TÖSALÒNIKĒ 3

¹Manā-aṅ, kahōlö, vë-elkui ih, ngam ṙô ngam Mā nö fal, nö hapōilöngö inrē nö sā e nö in yīö,

²Hòṅ hī inrē ṙānyuvö, ṙā-ang im tötchööḵnyu, yip tötlöök tarik inrē; pôi öt ṙòkhöre mikahavö.

³Tökô-en pöri ngam Mā, ngam mahaköpö yīö min, laklen yīö min inrē töm tötlöök.

⁴Nyanatluvö in im Mā, i inlaha yīö öi la-evṙen, hĕnghöre la-evṙen min inrē tö nup ṙô ih tölṙô yīö.

⁵Ane inrē ngam Mā, hachōtö ellōn yīö i hanāngen ngam Tēv, i manöiyö Kristū inrē.

⁶Kahōlö, tölṙô yīö in, i minë-eny ngam Mā hī Yēsū Kristū, tihōkngöre yin, ṙā-ang im hol ngam töt lēnöröön nö kiröönngöre, nö öt sā ngam fālen, ngam tö ngaich kahëḵ cha nö in ih.

⁷Akahalōn yin yī-ö töre öi hòṅ asīnken ih: pò ih ihö ngaich rö-ö ötlēnö inlaha in yīö;

⁸Öt rēhĕn in öt ṙāyukūö nyā i töng tarik, i la-en pöri kalēḵ alaha, hatööm sakāmö inrē öi vahī-ivṙen, pò ih sōḵ lumnganö yīö:

⁹Öt kūö ih öt huveū-en, vītöre pöri ihö inchōten yīö asīnken ih.

¹⁰Ngih ön chöngö ik hē ih in yīö, Un rēhĕn nö nyā ngòh töt hòṅ la-evṙen.

¹¹Pò ih hang yip rēvre lamök in yīö nö öt lēnö inlahen, yip töng rö-ö nö vahī-ivṙen, höng samöömkö ṙô.

¹²Cha-a yip pöchö yip töngatī, tahölṙô ih, halēn ih inrē im Mā Yēsū Kristū hòṅ cha nö holtö ṙanëmöre nö la-evṙen, ngaich kahngenre nö nyā nyā-aṅkūöre.

¹³Kahōlö, uh pöri yī-ö uhāngöreṙen i tölöök la-en.

¹⁴Yĕn tarīku maha-ôngen ṙô ih i ngih līpöre tökūichö, mikahngen ò anga-aṅ tarik, hòṅ ò nö öt nôlta nö in yīö, hòn sirōngkūö ang.

¹⁵Uh pöri nö sā tökunyahaṅ elmat tö yīö, halēnö ò pöri sā hol maneukre.

¹⁶Ngaich An ngam Mā lanāmö nö kē-ĕkūö yīö tö lanāmö, nöng örheūheu. In yīö an ngam Mā öi ṙòkhöre.

¹⁷Ngam sinlāmö tī chu chu-ö Pôl aṅtītö eltīre, ngam minkahngö i mat në tökūichö līpöre: ngatī tī chu-ö kūich.

¹⁸In yīö an yēḵ ṙòkhöre ngam inkôlò aṅ im Mā Yēsū Kristū.