Read Car_Nicobarese 1 TIMÒTĪ 1 Bible Online

1 TIMÒTĪ 1 - Car_Nicobarese bible

1 TIMÒTĪ 1

¹Pôl, tanīnöṙô Kristū Yēsū, sā chöngö ngam Tēv mahayööken hī, Kristū Yēsū inrē maheūṅkkö hī;

²Löö in Tamòtī, kūön chu tökô-en im mikah: Inlōnti, neūkölōn, lanāmö inrē aṅ im Tēv Yöng, ngam Mā hī inrē Kristū Yēsū.

³Ngaich chin halēnngen meh öm höngngöh i Efisös, ik hē chu chuh Makētòni, pò meh hōtu vëkö öp tö hĕng tak tarik nö un haköptö tahëng inköphöti,

⁴Un rēhĕn nö hangihtöre tö nup töng vītu inchōḵoṙô, nup töt rītu inrē kinṙeuk tumkölchap, ngaich chööḵnyö intönö, nö mööḵlö tö ngam aṅ im Tēv inyōmö, ngam aṅ im mikah; ngatī chin chu-ö töngamuh.

⁵Ngam hanāngenlōn pöri manā-angrit ngam chöngö nö löknyö öp töhet ellōn lanöökö el kuilōn inrē ngam mikah inrē töt höng töl:

⁶Ngam lökngen yip rēvre nö vaich, ngaich kānngöre nö im töt kô-en ṙô;

⁷Hòṅ mahaköptö ngam chöngö, pòrô nöng öt akaha elnang tö ṙôre cha-a, öt rēhĕn töp löktenre nö nyatölōn tö kanô-en.

⁸Akahalōn pöri ayī-ö tö ngam chöngö nö tölöök, yē tarik nö halöök tīre nö kēken e,

⁹Sā ngih nö akaha, tö ngam chöngö nö öt pòkūö tarik nö vīlöngö, tön pòkūö yip töt aṅhav-in tö chöngö, töt kô-en inrē, pòkūö yip tötlöök, tököölö fālen inrē, pòkūö yip töt het mahachōichhanga inrē, pòkūö yip kumpah yöngre tö kikōnyö, kikānö inrē, pòkūö yip famël tarik.

¹⁰Pòkūö yip chamô-òṅkānö, pòkūö yip kikōnyö chamô-òṅ kikānö, pòkūö mū-ulāingö tarik, pòkūö yip töchūökuṙô nö minôinyaṅ, nup tö ōtngöre inrē tö harīkngöre tö ngam tölöök inköphöti;

¹¹Sā ngam tölöök inhānga, kanôlò ngam tökôlò Tēv, ngam tökētū nö in chu.

¹²Ha-öinyö Ò chin ngam kamëtö kanô-òṅ chu, ngam Mā hī Kristū Yēsū, pòn kaheukten chu Anga-aṅ tökô-en, nö vīlen chu ing la-en Ò;

¹³Pòrô öich lā-urĕh sin töt lamëkôre, töt mahakôlò, töchökhuṙen inrē: teūngen pöri chu-ö tö neūkölōn pò chu ngatī tī tö e i öt mikahre, öt ṙinātö ellōn inrē;

¹⁴Ngaich ngam inlōnti aṅ im Mā hī nö saṙaklöng kūö nö pōyen holtö mikah, hanāngen inrē ngam mi-in Kristū Yēsū.

¹⁵Tökô-en ön ngih nö ṙô, töt ṙanāngen kinë-eṅ tö taṙòkhöre tarik, tö Kristū Yēsū nö yih nö ing panam nö mahayööken tökööl tarik; öich chū-ö yöngkūö:

¹⁶Kūö e pöri chū-ö teūngen tö neūkölōn, hòn in chu öich yöngkūö, ang Yēsū Kristū nö hameuktö nup kanihngenre nö inchōten cha yip mū-unôich min nö ṙātö ellōnre nö in ò im nômö tö örheūheu-aṅ.

¹⁷I ngam Rācha tö örheūheu-aṅ, töt chahū-uyö, töt maneūken, töng hĕng nö Tēv, ineū-euṅ, kanôlò yēḵ örheūheu. Āmen.

¹⁸Kētö ngih chin chöngö in meh, me-eṅ kūön chu Timòtī, sā nup kinlēḵngô mū-urĕh nö i kui meh nö ngaich, hòṅ meh lökten in u kiyung im tölöök kinyūngö;

¹⁹Kiṙapkö ngam mikah, tö ngam lanöökö el kuilōn; ngam tö kurīngi tö yip rēvre, ngaich sayöḵötī nö im mikah:

²⁰Aṅ in cha nap nāṅ Himenīös, Aleksantör inrē; nap tökētu tö chu nö in Sātān, hòṅ cha nö haköptu nö un ötlēkôre.