Read Car_Nicobarese 1 TIMÒTĪ 5 Bible Online

1 TIMÒTĪ 5 - Car_Nicobarese bible

1 TIMÒTĪ 5

¹Un hakes tököiny, halēnö ò pöri sāre tö yöng: vē manāngö tarik, ngaich sāre tö kahëm:

²Yip tököiny kikānö sā ṙētö yöng; yip manāngö sā ṙētö kanānö, ṙòkhöre nö i hanëtö.

³Milēḵṙen tö tafīösi kikānö yip tökô-en nö tafīösi.

⁴Ngaich yĕn tafīösivö tökūönu, hēk yōmu, hökngen cha nö urĕh nö haköptöre, nö hameuktö pinheṅ-eṅ kūöre tö ngam Tēv nö i yip mak alahare, ngaich havanhöti nö i yip yöngre: tön töhōḵov an angū-ö nö i kūö ngam Tēv.

⁵Anga-aṅ ngòh tö kô-òngrit nö tafiösi kikānö, tötkôlò inrē, töönglö mikahre anga-aṅ im Tēv, ngaich Iṙuöhen im vinë-elkūi taṙòkhöre, peuheū harap inrē nö im vinë-eṅkūötēv.

⁶Anga-aṅ pöri, ngòh töng kumchikngenre, tökapah nö ṙòngmöng aṅ.

⁷Anū-ö në tö ngatī chöngö meh inrē, hòṅ cha nö öt vineḵkuvö.

⁸Yē tarik pöri nö rö-öv nö meukṙenre, möthë tal yip aṅ patī ò, mahayëḵngen ngam mikah an anga-aṅ, ngaich nö höichngen tö tötṙamātö ellōnre.

⁹Un kaheuktu nö tafīösi kikānö yip tö taṙeūḵ, ṙēti tö tö sat anāi samyeūheu, pihö tö hĕng kikōnyö,

¹⁰Tölöökö ineūka nö i tölöök la-en; yē ò nö haruklö nyīö, yē ò nö haṙūötken aṅ tahëng, yē ò nö söichröön yip töhet, yē ò nö meukṙen tökihngen, yē ò nö ṙūöten nö tömken tölöök la-en.

¹¹Sōḵngen yip tö-ayal pöri tafīösi kikānö: pò cha yĕn ṙūölöre tötlööklōn, nö lā-al Kristū, ngaich hòṅ hapihö cha-a;

¹²Ngaich öt inkôlòvö, pò cha nö ngaich nö sōḵo ngam raneh mikahre.

¹³Ngaich inrē cha-a nö haruntenre nö ṙahata, keuheūt patī nö kuvāna; öt höng tö ṙahata, tön ameūkö töng yô-òv inrē, tamūölngö ṙô, kahòkkö nup töt ṙô cha öre.

¹⁴Lökten chin hōtö tö-ayal tafīösi kikānö nö, hapihö, hakūöntö nyīö, hayöng patī, un kētu löknyö ngam tökunyahaṅ elmat nö sumrōngngökūö;

¹⁵Tön ngaich yip rīkre nö havāngtöre nö lā rit Sātān.

¹⁶Yĕn kikānu, yip ṙamātö ellōnre, tö aṅhaṅv-in tö tafīösi kikānö, hökngen ò nö meukṙen yip tökô-òngrit kikānö tafīösi.

¹⁷Hökngen yip mahaköphöti, yip tölööken nö hayöng nö kaheuktu i tö nët ineū-euṅ, möthë cha-a tö yip tövahī-ivṙen nö im ṙô, i inköphöti inrē.

¹⁸Pò ngam töhet līpöre nö ngö ṙô, Uh man hīötkūö ngam kōiny nuā yē ò nö röönnyö ṙòng sāny. Ane inrē, Tö hòṅ ṙëhevö ön ngòh tö vahī-ivṙen.

¹⁹Un kē-ĕ nup vine-eny fālen mahaköphöti, höng yĕn löknyö elvāng tö nët tak, hēk lūöi tak mameuk.

²⁰Cha-a yip tököölö fālen, vëken cha i kūö tömaṙôngö, hòn pa-ekūö yip inrē.

²¹Tölṙô meh chin i kūö ngam Tēv, Kristū Yēsū inrē, yip tökatöllöng ma-ahānga inrē, öm haköp nö öm um chanöku; öt kahëkuṙen tö intölten.

²²Un kurāten ṙēptötīre i kui tarik, un hanôltöre i tökööl tarik: haköpöre me-eṅ het.

²³Uh man ngöhörekūö òk mak, rahëichvat pöri tö vāin öm chööḵnyö tö öp ellōnre, ap töng ötkumlēḵen meh inrē.

²⁴Rīkre yip tarik töngāṅlnyi tökööl, chuh i kūö kinṙôka, rīkre yip tarik tö tömörit tö u nö unôich.

²⁵Ngatī nup inrē tölöök la-en töngāṅlnyi; ngaich öt hōḵ nup töngati nö nyatngö.