Read Car_Nicobarese 2 TIMÒTĪ 2 Bible Online

2 TIMÒTĪ 2 - Car_Nicobarese bible

2 TIMÒTĪ 2

¹Lökten man, me-eṅ kūön chu, hangëḵeṅre im inlōnti ngam aṅ in Kristū Yēsū.

²Nup ahang meh aṅ in chu, i kūö yip tömaṙôngö mameuk, kētö u me-eṅ i yip tökô-en tarik, yip tö kô-òren min nö haköptö tahëng inrē.

³Holṙen chu im kanihngen sā tö-akaha kumyunglen Kristū Yēsū.

⁴Öt kumyūngu lamök ngam la-en, ma-asānngenre nö i la-en ngih nômö, pò ò nö hòṅ haṙamlōn ò ngam kamūichtö minë-eny ò nö kumyung.

⁵Ane inrē, yē öp hĕng tak öre tarik nö kalahare nö i nup minyam, öt sumpīövlöng anga-aṅ, höng yē ò nö löökö inlahen nö kalahare.

⁶Ngòh yōm panô-òṅ, ngòh tövahī-envö, anga-aṅ tö hòṅ urēhĕl kūö tö nup ṙòng.

⁷Fēkö minë ṙô chu; kētö mikah meh an min ngam Mā i tökeuheūttöre.

⁸Köpölōn tö Yēsū Kristū, nö choholre nö ṙā-ang i yip tökapah, nö tanūöl yip kūön Tāvit, sā ngam tölöök ahangkö chu,

⁹Ngam chūök chu kihngen i inkövö, sā tötlöökö la-en, hö-ö pöri ngam ṙô ngam Tēv nö hakövö.

¹⁰Lökten chin keūnö u nö kanihngen kūö yip tökatöllöngö, hòṅ cha nö teūngen tö ngam in yööken aṅ in Kristū Yēsūs nö hol tö ngam töt chanūhuv kanôlò.

¹¹Tökô-en an nö ṙô; Pò hī, yē hī kapah anòngngen Ò, hol Ò ayī-ö min inrē aṅ:

¹²Yē hī keun kanihngen, ngaich ayī-ö min hayöng hol Ò: yē hī min mahngen Ò, mahngen hī min Anga-aṅ:

¹³Yē hī ayī-ö öt köpö kanô-en, köp Anga-aṅ nö kô-en! pòn ötkô Anga-aṅ nö mahangre.

¹⁴Chaphöt u man anū-ö në, nö kanöpölōn cha, i kūö ngam Tēv, tölṙô cha, hòṅ cha nö öt lā-alkūöre nö chööḵnyö tö nup ṙô, nö hòṅ halō-ongkūö cha, yip hamang.

¹⁵Haṙēmngenre man öm kētöre töhōḵov im Tēv, öm töla-evṙen töt hōḵ sirōngkūö, hachip tīre tö ngam ṙô kanô-en.

¹⁶Kē-ĕngre pöri i nup töchōich, ṙô tötakaha; tön kiröönökūöre yip min nö im ötlanöökö,

¹⁷Ngaich nup ṙô cha min nö yeūinyhötkūö, sā kūö töchahū-ui vah: cha-a yip hēḵ Hamenās, Filetös inrē:

¹⁸Tarik tö lō-ongkūö tö ngam tökô-en, vënyö ngam invanlö tökapah nö ngaichngen, ngaich tiṙōlngö mikah yip rīkre.

¹⁹Köp pöri nö sökhak ngam rööntö machööḵlö ngam Tēv, kintāntu aṅ in tö ngih, Akahakūö an ngam Mā tö cha yip tarik Ò: ane inrē, Hökngen cha nö kē-ĕngre nö ṙā-ang im ötlanöökö,

²⁰I ël öp hĕng öre tökiröng patī öt höng humlum nup ël e chehen, rupīö inrē, tön hĕnghöre chōn, tumlat inrē; rēvre nup hanāngen, rēvre nup töthanāngen.

²¹Lökten yē ngòh tarik nö halööklöre nö ṙā-ang i në, ngaich anga-aṅ min nö hanāngen nö chehen, tö ahetlöngö, ngaich chūökṙen ngam Mā nö kô-òren, tö halēnö nö i nup tölöök la-en.

²²Ṙuhöngre pöri tö yinikngö, në lōn ṙālö, tömkörit lanöökö, mikah, hanāngenlōn, lanāmö, nö löklö öp töhet ellōn, in cha yip mahavëkö minë-eny ngam Mā.

²³Sōḵngen nup kumlō-ov, nup ṙô töt akaha intönö inrē, akahalōn tö u nö löknyö linā-alkūö.

²⁴Ngòh mahalanṙen ngam Mā, un lamā-alkūö, ṙēm pöri nö i taṙòkhöre, haköphöti, ṙap,

²⁵Holtö inyāichngö halöök tö talöökö yip mahaṙahngöre; hòn amahtuṙen ngam Tēv nö kētö invöötö ellōn cha, nö inkaha ngam tökô-en,

²⁶Hòṅ cha nö havannyöre nö ṙā-ang el ngam tinngöp ngam sī-ö, ngaich kē-ĕ nö aṅ tö yip mahalanṙen ngam Mā, nö kētu i lōn ngam Tēv.