Read Car_Nicobarese 2 TIMÒTĪ 3 Bible Online

2 TIMÒTĪ 3 - Car_Nicobarese bible

2 TIMÒTĪ 3

¹Akahalōn pöri tö ngih tö nup kanihngen min nö yih i nup manā-aṅ sakāmö.

²Pò tarik min nöng töhāngen töre, töhāngen tö rupīö, ameū-eure, mahakeūṙöre, töchökhuṙô, maha-ôngen yöngre, töt maha-öiny kinë-eṅkūöre, töt het,

³Öt aṅhaṅv-in tö nehngenre hanāngenlōn, öt hanlāmten, vamë-eng nang, töt kô nö hayöngöre, tötainy, öttöhāngen tö tölöök.

⁴Mahachīl, kamahanglōnre, tölafööṙa, töhāngenlōn tö minyam, mötlö tö töhāngenlōn tö ngam Tēv;

⁵Ṙapkö töng insā lanöökö, ngaich harööḵngen ngam minhôiṅyö aṅ in e: havööngökūöre man inrē i töngatī.

⁶Tön aṅ in cha nun, yip ṙameulhötre nö el patī, ngaich kēḵ yip töt akaha kikānö nö hakövö, yip kameunkö tökööl, hachōḵoiṙen tö nup tö ṙōlkangen töchōich lōn,

⁷Tötṙākenre nö haköp, öt hētu nö kô nö sölta nö im inkaha kanô-en.

⁸Sā nā Yanes, nā Yamres inrē nö ahôngen Môsös, ngatī cha-a vē, nö ahôngen ngam kanô-en; tarik, mahachōichngen ellōnre, kamë-engre nö i tökööl, i inlaha ngam mikah.

⁹Öt vāngngöröönre pöri cha-a töm tölngöre: pò ngam ötmikah cha nö hameuknyu nö i taṙòkhöre tarik, sā nup aṅ in cha min.

¹⁰Ngaich man me-eṅ tömkö ngam inköphöti tö chu, inchōten, chööḵnyö, ṙinātö ellōn, rôta kanihngen, hanāngenlōn, manöiyö,

¹¹Öt inkôlò, kanihngen, nuk lāinyngen chu i Anti-òk, i Ikôni, Listra, i rôkö kaheun öich tö ötinkôlò: ṙānyen chu pöri ngam Tēv nö in u nö ṙòkhöre.

¹²Hôṅ, ṙòkhöre yip tö hòṅ löök nö i kūö Kristū Yēsū nö kihngen min tö öt inkôlò.

¹³Vē tötlöök pöri tarik, mahachīl, nö ṙūöngenre, hachīl, hĕnghöre hachīlö inrē.

¹⁴Haköpöre pöri me-eṅ i nup tö ngaich haköp meh;

¹⁵Ngaich man akahalōn tö ṙô nup töhet tökūichiyö hētentö nyinī-öṅ meh, nup tökô nö akaha tī tö meh nö im inyööken lökten im ṙinātö ellōnre in Kristū Yēsū.

¹⁶Ṙòkhöre nun në töhet līpöre nö tö uhômhötvö nö ellōn tö ngam Tēv, tö kôlò tī inrē nö inköphöti, vinëkö, inlööktö, chöngö nö im lanöökö:

¹⁷Hòṅ ngam tarik ngam Tēv nö öthāṅten, keuheūttöre aṅtī nö im tölöök la-en.