Read Car_Nicobarese 2 TIMÒTĪ 4 Bible Online

2 TIMÒTĪ 4 - Car_Nicobarese bible

2 TIMÒTĪ 4

¹I kūö ngam Tēv chin, hameukhöti, i kūö Kristū Yēsū inrē, ngam kamhòkken tö aṅ, tö kapah inrē min, im mineūkö Ò, ngam pūlngö Ò inrē;

²Ahangkö ngam ṙô; hameuknyö, vëḵa, halēn, holtö manöiyö, inköphöti inrē.

³Tön yih öp min ṙētak, hē cha nö öt kô, nö kēḵ tölöök inköphöti; pòn kiteūnyö elnang, hamūllö mahaköptöre cha-a ngaich, tö tö sā nup lōnre;

⁴Havööngö elnangre ngaich nö ṙā-ang im tökô-en, ngaich havāngtöre nö i minônṙô.

⁵Ṙāpöre pöri me-eṅ i tökeuheūttöre, hakihtenre, la-evṙen tö la-en ma-ahānga, hateungngö ngam mineukṙen la-enre.

⁶Tön ngaich chin ha-ehangvah kētu, yih an nö ngaich ngam hēngörit chu.

⁷Ngaichö alaha chin kiyung im tölöök kinyūngö, sölngö röön chin ngaich fal, köptī chin tö ngam mikah:

⁸Töngamuhöten ap sapīöv lanöökö nö ṙātu hinöngken chu, tökētu min tö ngam Mā nö in chu ip sakāmö angū-ö; ngam töt atöltuṙen kamhôṅka; öt höng chū-ö, tön ṙòkhöre cha-a inrē, yip tö hāngenlōn ip mineūkö Ò.

⁹Pītnyöre man ka-eūyen yih in chu.

¹⁰Tön ṙāngen chu ök Tēmas nö ngaich, pòn hāngenlōn töng panam ngih töng töngamuh, ngaich ök nö chuh Tösalònikē: chuh Kalatī ang Krisen, chuh Talamatiā ang Taitös.

¹¹Höng Lūkös ön ngòh in chu. Kē-ĕ Makös, kumtentö ò nö hol meh: tön yanöölen chu ap nö i mineukṙen.

¹²Tīni ök Tikikös tö chu nö i Efisös,

¹³Kumtö ap tökiröng inyut tö ṙā-ai tö chu i Trô-as, nö in Karpös, kumtö e yĕm yih, tö nup līpöre inrē, möthëḵ tal tö nup uk chūök kinūichö.

¹⁴Pōyen tī ap Aleksantör, ap ramöm mās, tö töchōich nö in chu: kē-ĕkūö ò an min ngam Mā, tö tösā nuk la-en ò:

¹⁵Haṙēmngenre man me-eṅ inrē tö ò; pòn itölngöre anga-aṅ, nö harahkūö nuk ṙô hī.

¹⁶Ik raneh ṙô chu laklöre, öt hĕng tak lamā-in chū-ö, ṙòkngöre pöri nö ṙāngen chu: uh an yēḵ pöchö ngam fālen nö fukkui cha.

¹⁷Sökhaka pöri ngam Mā nö in chu, nö hangëken chu; pòn hōtu nö lökten in chu ngam inhānga nö keuheūtnyöre inhangnyö, pòn hōtu inrē yip Tahëng mihëṅṙö nö ṙòkhöre nö hang: ngaich ṙānyu chu-ö ṙā-ang elvāng ap lāyön.

¹⁸Ṙānyen chu an min ngam Mā, ṙā-ang i nup tötlöök la-en, ngaich hayöölen chu min inrē im pūlngö Ò el halīöngö: Kanôlò Ò yēḵ örheūheu. Āmen.

¹⁹Salāmö Priska, Akula inrē, yip aṅ patī Ònīsifòrös inrē.

²⁰Höngngöh ök Erastös nö i Kòrin: ṙā-ayö pöri Ròfimös nö vahavö nö i Militös.

²¹Pītnyöre man yih urēhĕkūö ngam laneūchö, Salāmö man tö Yupalös, Pūten, Līnös, Klòtiā, ṙòkhöre inrē vē Māṅ.

²²Holtöṙah ap ma-alaha meh an yēḵ ngam Mā. Inlōnti yēḵ in meh.