Read Car_Nicobarese TAITÖS 2 Bible Online

TAITÖS 2 - Car_Nicobarese bible

TAITÖS 2

¹Ṙô tö nup tölöökta pöri me-eṅ im tölöök inköphöti:

²Hòṅ yip tököiny tarik, nö öt saṙākiṙen öt tayāchaṙen, öt saṙākilōn, lööken im mikah, i hanāngenlōn, i manöiyö:

³Hòṅ yip tököiny kikānö nö ngatī nö milēḵṙen i inlahare, öt vë-engnang, öt lōmngö nö i tö yah ka-eūt, mahaköptö ngam tölöök;

⁴Hòṅ cha nö harun yip ṙālö kikānö nö hāngenlōn tö yip pihöre, hāngenlōn tö kūönre,

⁵Öt saṙākilōn, het, töla-evṙen nö el patī, tö-aheuk, öt ahôngen pihöre, hòn öt hachōichi ngam ṙô ngam Tēv:

⁶Ngatī inrē halēn yip ṙālö tarik nö un saṙākilōn:

⁷I tökeuheūttöre, hameuktöre me-eṅ inchōten tölöök la-en, i inköphöti tö meh; hameuktö tölöök, öt tinyāchen.

⁸Tölöök ṙô, nup tö löknyu vinëka fālen, hòṅ ò ngam ma-ahôhangen nö sirōngkūö, nö öt vahëḵnyu tö tötlöök aṅ in yīö.

⁹Halēn yip töhakövö mahalanṙen nö hang chöngö yip yöngṙenre: haṙamlōn cha i tökeuheūttöre;

¹⁰Öt kachötatī, hameuktö nup kanô-enre pöri; hòṅ cha nö hanyöṅt ngam inköphöti i tökeuheūttöre aṅ im Tēv Mahayööken.

¹¹Pò ngam inlōnti aṅ im Tēv nö ngaich nö meūkö, kumtö inyööken tarik nö ṙòkhöre,

¹²Haköpten hī, pòi hōtu harööḵngen ötlanöökö, nup lōn töyīki inrē aṅ panam, ngaich iyöng, öt sinṙaklen, chanīpen, lanöökö inrē, ing töngamuh panam:

¹³Hatīönkö ngam tökôlò mineūka, ngam tökôlò inrē mineūkö ngam Yöng Tēv hī, Mahayööken inrē Yēsū Kristū;

¹⁴Ngam kamëḵngöre tö pòkūö hī, nö hòṅ ṙānyen hī Anga-aṅ, nö ṙā-ang i nup tökööl nö ṙòkhöre, ngaich ahetlen hī nö in re öi tarik amin Ò, kalēḵĕlōn i tö löök la-en.

¹⁵Anū-ö në pöchö ṙô meh, halēn, vëḵa inrē, holtö chöngö. Un tarīku mahakeūngen meh.