Read Car_Nicobarese FILIMÒN 1 Bible Online

FILIMÒN 1 - Car_Nicobarese bible

FILIMÒN 1

¹Töhakövö an Pôl, Timòtī inrē hol hī, tö Kristū Yēsū. Löö in Filimòn ap hanāngen ih, hamòl alaha ih la-evṙen inrē,

²In Afīa ap kanānö hī, in Arkipös inrē, ap kumyung nö hol alaha hī, löö ip Māṅ inrē i patī meh:

³Inlōnti yēḵ in yīö lanāmö inrē aṅ im Tēv yöng hī, aṅ im Mā Tēv Kristū inrē.

⁴Örheūheu chin ha-öiny ngam Tēvre, kakken meh i vinë-eṅkūötēv tö chu,

⁵I elnangre hang ngam hanāngenlōn meh, ngam in meh lā im Mā Yēsū, lā i yip töhet inrē nö ṙòkhöre;

⁶Hòṅ ngam innôlò aṅ im mikah, nö sā lōn taneungngö, i inkaha nup tölöök nö in Kristū mi-in meh.

⁷Pò chu īnu ngaich tö ṙanāmölōn nö pōyen, inṙamlōn inrē im hanāngenlōn meh, pò nup ellōn yip töhet nö lökten in meh nö kalēḵlöre.

⁸Lökten, pòrô öich īnu tö pinhë-eṅkūö lā in Kristū öich tölṙô meh, tö ngam tölööken,

⁹Kūö hanāngenlōnre chin chu-ö tököiny Pôl, öich hòṅ aṙētuṙô, öich töhakövö inrē töngamuh tö Kristū Yēsū:

¹⁰Hòṅ aṙētuṙô chin tö kūö ap kūönre Onīsimös, ap kayôḵnyö chu ing inkövö chu,

¹¹Ap töt kanôluṙô tī sin tö meh misī, ngaich pöri töngamuh nö kôlòtī tö meh tö chu inrē:

¹²Ngam tahīntö chu nö in meh hēk nö hakôtöre, ellōn chu takô an anga-aṅ.

¹³Ngam yahikngö chu öich hôṅ ma-iṅhan nö in chu, hòṅ ò nö ṙënngen meh nö meukṙen chu im inkövö aṅ im tölöök inhānga:

¹⁴Öthuveū-en pöri chu-ö, höng kahngenre yĕm öt chöngu: hòṅ ngam tölöök lōn meh nö öt hupītö, ap kanahanglōn pöri.

¹⁵Pòn lohten anga-aṅ nö köhngen tö meh nö rahëichhangkūö, pò meh hōtu ngaich örheūheu īnu tö ò;

¹⁶Nö öt sāre nö töhakövö, mötlö pöri tö töhakövö, hanāngen nö mak alaha, hönlöre nö in chu, ngaich sitih hanönlöre nö in meh, im alaha hĕnghöre im Mā inrē.

¹⁷Yē chu kaheuktu tö meh tö amīnu hol meh, hōḵen ò nö tö sā chu.

¹⁸Yē ò nö inlahav tö töchōichen nö in meh, hēk yē ò nö hötṙehev nö in meh, in chu tī tö e.

¹⁹Hakôtö tīre chin chu-ö Pôl kūichö e, chu-ö chin min kamëtö e: rö-ö chin ṙô tö nup höteh meh in chu, nö holten meh.

²⁰Hôṅ, kahōlö, hökngen chu man ṙāmölōn in meh im Mā: hangëḵlö ellōn chu in Kristū.

²¹Kūichhöti chin in meh, īnu tö nyanatlöre i öt minôṙô meh, akahalōn tö meh min siṙākkūö alahare tö minë ṙô chu.

²²Ane pöchö inrē halēnkö chūök chu, tön lökten i vinë-elkuire chin tö meh, tölōnre, öich kētu min in meh.

²³Salāmö meh ön Epafarös hol inkövö chu in Kristū Yēsū;

²⁴Aristakös, Tēmas, Lūkös, vē hol alaha chu la-evṙen tö Mākös inrē.

²⁵Ngam inkôlò aṅ im Mā hī Yēsū Kristū, holtöṙah mā-alaha yīö yēḵ. Āmen.