Read Car_Nicobarese HEPRĀI 1 Bible Online

HEPRĀI 1 - Car_Nicobarese bible

HEPRĀI 1

¹Ṙōlkangen inlaha, ṙōlheuh inrē, ngam Tēv misī nö ve-ekūö yik muvöhngö hī, lökten i yik pròfĕt;

²Ngaich ve-ekūö hī, i manā-aṅ në sakāmö, nö lökten im Kūön Ò, ngam tī Ò nö tö-amīnuvö tö në taṙòkhöre. Anga-aṅ talöökö tī Ò nö vīlö në panam.

³Pòn Anga-aṅ yanëichö ngam kanôlò, kintān tö ngam Tēv takô inrē; kumṙapkö në taṙòkhöre chehen, lökten im minhôiṅyö ṙôre: keuheūtheṙen nö söichngö në tökööl ngaich ūichngöre nö lahāmö ngam kanôlò lātulöng.

⁴Ngaich yih nö mötlö tö më ma-ahānga, pò Ò nö amīnuvö tö tömööḵlö lanöökö mine-eny tö cha.

⁵Öpyòh ṙöng öp ṙung ma-ahānga, ṙô Ò nö ngö ṙô, Me-eṅ man Kūön Chu: i ngih sakāmö man Öm lökngörit Chu, ngaich hēk, Yöng Ò Chin min; kūön Chu min anga-aṅ inrē.

⁶Ngaich hēk hē Ò nö kēhöt ngam lanòh nö ing panam, ngö ṙô Anga-aṅ, Hökngen vē taṙòkhöre ma-ahānga ngam Tēv nö afukngöre nö i kūö Ò.

⁷Ngö ṙô Anga-aṅ tö yip ma-ahanga, Ngam vamītö yip ma-ahānga nö kuföt, yip mahalanṙen Ò inrē nö hanūkūö tameūyö.

⁸Ngö ṙô pöri Anga-aṅ töm Kūön, Höng tö örheūheu an ngam kantēra Meh, Ō Tēv; ngam tinkung ngam lanöökö an, tinkung ngam pūlngö Meh.

⁹Töhāngenlōn man tö tölöök, surīkhö tötlöök pöri, lökten ngam Tēv, ngam Tēv Meh, nö fòh elkui Meh tö ngam tavī-i ṙanāmölōn, möthë tö yip hol Meh.

¹⁰Hēk nö ngö ṙô, Me-eṅ, Mā, vamīlö ngih panam ik raneh, la-en minë kuntī Meh an ngam halīöngö.

¹¹Chuh nun min anū-ö;

¹²Lömngö u min Me-eṅ, sā tīre tö kinṙum, haṙī-iyö min anū-ö, nö sā hilā. Höng hĕngren pöri Me-eṅ, öt chanūhuvṙen në samyeūheu Meh.

¹³Achīö öp pöri tö yip ma-ahānga ṙô Ò nö hĕng heuh ṙô nö ngö, Ūichngöre man lahāmö chu, hanöng sahatī chu vītö yip tö kunyahaṅ elmat tö meh nö ṙanöönö röön meh?

¹⁴Röh yip cha-a nö ṙòkhöre nö mameukṙen ngam Tēv, tīntu nö tö la-evṙen tö pòkūö cha yip tö amīnu min tö inyööken?