Read Car_Nicobarese HEPRĀI 11 Bible Online

HEPRĀI 11 - Car_Nicobarese bible

HEPRĀI 11

¹Ngam ṙinātö ellōn an mahameuktö nup tö meūkka, mahameuktö nup töt meūkö.

²Pòn in e cha-a yik mā misī nö kumtö ineūkö nö in cha.

³Lökten im ṙinātö ellōn in akahalōn, tö në panam nö kūö ṙô ngam Tēv nö vīlöngö, lökten ngam tömeūkö, nö öt tö vīlöngövö nö aṅ i nup tömeūkö.

⁴Lökten i ṙinātö ellōn ang Āpĕl nö kētö töngö-al lanöökö tökētu nö im Tēv, tö Kēn, öt löktö ök ineūkö ò nö tölöök, eūkö ngam tī ò tökētu inrē ngam Tēv: Ngaich lökten in e anga-aṅ nö pòrô nö kapah, sönen nö ṙô-òv.

⁵Lökten i ṙinātö ellōn ang Enòk nö kēḵlöngö, nö sōtu nö meuk kinpaha; ngaich ötkôti anga-aṅ; pò ngam Tēv nö kēḵlen ò: pòn urēhĕkūö ngam kinëḵlö ò, nö eūka anga-aṅ nö ṙanāmölōn ngam Tēv:

⁶Ötkô angū-ö nö ṙanāmölōn nö in Ò, yĕn öt īnu tö ngam ṙinātö ellōn: pò ò ngòh yamihtöre nö im Tēv nö hòṅ ṙātö ellōnre tö Ò nö töngatī, tö Ò inrē nö rameushen cha yip chamöhan.

⁷Lökten i ṙinātö ellōn ang Nō-a, nö hatūinyu elnang töm Tēv tö nuk tö-öl nö meūkö, lökten im tölöök pinhe-eṅkūö nö akahaiṙen, halēn ök chōng nö inyöölen yik aṅ patī ò; lökten in e anga-aṅ nö ve-eny ngih panam nö ötkôlò, ngaich vītu nö tö-amīnu tö ngam lanöökö ngam tö sā ngam ṙinātö ellōn.

⁸Lökten i ṙinātö ellōn ang Aprahām nö hang, hē ò nö havëtu, nö chuh ik töhĕng chūökö, ök kahëḵ ò nö amin ò; kiröönngöre anga-aṅ ngaich, nöng öt akahakūö tö kū-öre.

⁹Lökten i ṙinātö ellōn anga-aṅ nö vītu nöng rahëichtaṙen nö iyöng im panam kinlēḵngô, sāre nö i töt panam ò, iyöng el inrūkui, holten Isak, Yāköp inrē, nak tö amīnu nö holkūö ò tö e angū-ö kinlēḵngô:

¹⁰Pò ò nö chöh öp elpanam öp tö chūöku rööntö machööḵlö, öp tö mamānlu tö ngam Tēv ane inrē vahīlö ngam Tēv.

¹¹Lökten i ṙinātö ellōn ang Sërah nö kētu kumlēḵ nö pirūkö nyīö, hē ò nö ngaich nö chööḵngö ṙētöre, pò ò nö akahalōn tö Ò nö kô-en, ngam kumlēḵngôre:

¹²Lökten inrē nö lökten im tö hĕng tak, nö ngaich anga-aṅ nö ṙētö kupah, sā ṙôken taneūsömat ngam halīöngö tö ṙôngöre, sā kuyāyö inrē, nup i kūö mai, öt kanṙeūken.

¹³Im ṙinātö ellōn cha-a vē nö ṙòkhöre nö kapah, öl nö teūngen tö minë kinlēḵngô, ngaich pöri nö meūkö u, ha-öinyö u inrē nö marôvat, ngaich inrē nö halööknyôre tö cha nö aṅ tahëng, chamöh töhet inrē nö ing panam.

¹⁴Pò cha cha-a tö ngatī ṙô nö vīten e nö hameuktu, tö cha nö chöh öp kanahngenre panam.

¹⁵Yē cha nö kô-en nö lōn tö ap panam öp ṙahāngö cha, ngaich öre cha-a nö öt löktu nö havantöre.

¹⁶Ngaich pöri cha-a tö ngamuh nö lōn tö öp töngö-al panam, ngam aṅ el halīöngö: lökten ngam Tēv nö öt sirōngkūö tö cha, nö Tēv cha invëka: pòn halēnken tö hĕng Anga-aṅ elpanam cha.

¹⁷Lökten i ṙinātö ellōn ang Aprahām nö kalaha, kēḵngen Īsak ngaich: hôṅ, anga-aṅ tö ṙāmölōn nö kēḵ, minë kinlēḵngô, ngaich nö kēḵngö ök töng hĕng maneuk kūönre kikōnyö;

¹⁸Anga-aṅ ngam tö ngö elnang, In Īsak ap min kūön meh nö havëka:

¹⁹Ṙātö ellōnre tö ngam Tēv nö kô nö hachohol tö pòrô nö aṅ i kupah; ṙeū-eung in e inchōḵoṙô, nö havānan nö hēk.

²⁰Lökten i ṙinātö ellōn ang Īsak nö hakôlò Yāköp, Īsô inrē, i inlahen nuk mu-unôich tö yihih.

²¹Lökten i ṙinātö ellōn ang Yāköp, hē ò nö hòṅ kapah, nö kö hakôlò nak kūön Yôsĕf; samöllöre nö i kui ök kinchīṙöre nö salām.

²²Lökten i ṙinātö ellōn ang Yôsĕf, hē ök manāngen ò nö röhta, nö kakkö chanuhu yik kūön Israĕl, ngaich halēn hangen tö inlahen nuk tangëḵre.

²³Lökten i ṙinātö ellōn ang Môsös, hē ò nö fötnyu, nö lūöi chumngëṅtö nö hayūni tö nak yöngre, pò cha nö meūkan nö tavai nö nyīö; ngaich cha-a nö öt pa-ekūö tö chöngö ök rācha.

²⁴Lökten i ṙinātö ellōn ang Môsös, hē ò ngaich nö pōyö, nö sōḵ nö havëka nö kūön ök kūön Fërō kikānö;

²⁵Atöllöre nö lahë nö ötlēkaṙen nö anòngngen yik tarik ngam Tēv, ĕhten tö ngam kunchikngenre nö i tökööl nö rĕh rô-òten;

²⁶Ṙātö el lōnre tö ngam sinrōngkūö Kristū nö tömötlö nö kanôlò tö nup töpōiṙāi kanôlò aṅ Aikup: pò ò nö ngëichngöre tö gnam invahal raneushö.

²⁷Lökten i ṙinātö ellōn anga-aṅ nö ṙā-ang Aikup, öt pa-ekūö tö tanāinyö ök rācha: pòn haköpöre anga-aṅ, nö sā mameuk ngam töt maneūken.

²⁸Lökten i ṙinātö ellōn anga-aṅ nö haköpkö ngam Paska, ngam kinchenytö mahām inrē, hòṅ ngam mahalëlngö yik lanòh nö öt lūölken cha.

²⁹Lökten i ṙinātö ellōn cha-a, nö chööḵngö kui ap mai Ētöm nö lök el tanyô: kalahtenre lang yik aṅ Aikup ngaich pökngö.

³⁰Lökten i ṙinātö ellōn nö taṙöli nuk kinlōngö Yerikō, unôichrit invīṙö u nö sat sumkam.

³¹Lökten i ṙinātö ellōn ang Rāhap, ök mi-inyihköre, nö öt anòngngövah yik töminôṙô nö ötkôlò, pòn i lanāmen nö hōḵ-o yik mahayun.

³²Iṙôktöre ṙô öich min? Keuheūtö ṙētak chin min, yē chu vënyen Kītīön, Pārök, Sëmsön, Yefta; Tāvit, Samuĕl inrē, tö yik pròfĕt inrē:

³³Yik tö mihôiṅ tö pūlngö lökten i ṙinātö ellōn re, öt atöltuṙen i kinṙôka, teūngen tö kinlēḵngô, haköpngö kūö elvāng lāyön,

³⁴Hanyangngökūö tameūyö, öt kô-òngvah tö kūö sanët, vītu nö kalēḵ lökten im ötkumlēḵen, kalēḵlöre nö i kinyūngö, pāngötī tö yip aṅ tahëng kumyung,

³⁵Kapah kikānö, ngaich hachohlöngö, kumpaha nö fōhoh yip tahëng, öthōḵ nö ṙānyuvö, pò cha nö hòṅ teūngen, tö tölöök invanlö tökapah:

³⁶Ha-āchiṙen yip tahëng nö kalaha, fòho inrē, hôṅ, hēk inrē nö nyëkö, kalonghötvö inrē:

³⁷Kulehe cha-a, tökngö cha-a nö ṙātö tö ṙanat, kalaha cha-a, sāpi cha-a tö sanët: atēṙa cha-a nö inyuttö uk pököre; kapöiyaṙen, hachökö, ötlēḵaṙen.

³⁸Cha-a tö sōḵovö töng panam, karööna nö el tönyaṅlnyi, i kui rôngö inrē, el kinluhu, el në ṙeūvö ngih panam inrē.

³⁹Ngaich cha-a vē nö ṙòkhöre, nö lökten i ṙinātö ellōn, nö kētö inmeuktö, öl nö teūngen tö ngam kinlēḵngô.

⁴⁰Meukṙen hī an ngam Tēv tö tölöök tīre nö in hī, öl yip cha-a nö teungten, pò hī ayī-ö ṙòngmö köhngen.