Read Car_Nicobarese HEPRĀI 12 Bible Online

HEPRĀI 12 - Car_Nicobarese bible

HEPRĀI 12

¹Lökten in ayī-ö inrē, ta-a, ṙā-ngö nup sanānngenre, ngam tökööl inrē tö lööṙen nö havīlen hī, öi meūköre havīlöngö tö tökiröngen taṙul, yip ameū-a, ngaich ta-a inrē, töi fal asōl, ngam insōlö töṙātu nö i kūö hī.

²Hatīönken Yēsū, ngam yöngṙen, mahateungngö ngam ṙinātö ellōn nö in hī, ngam kūö ngam ṙanāmölōn tö ṙātu nö i kūö Ò, keun ök töhakālö hayëḵngen ngam sinrōngkūö, ngaich ūichngöre nö lahāmö ngam kantēra ngam Tēv.

³Ngëichken Ò ngam kameun nup insahṙô vē tö köölö fālen nöng lā-alre cha-a, hòṅ yīö öt uhāngöreṙen, ngaich öt kalēḵngöreṙen i ellōnre.

⁴Öl yin kô-òiny mahām tī, öi lā-al ngam tökööl:

⁵Vaichngö yin tö ngam ṙinūöhöl alaha, vame-ekūö, nö sā kūönre ṙô; Kakūönö, uh man höhölōn tö ngam vinëköre aṅ im Mā Tēv, um rēhĕn uhā-en yē meh chöken tö Ò.

⁶Tön vëkö öp hanāngenlōnre An ngam Mā Tēv, ane inrē foh, ngòh nyīö ngòh töhōḵovö tö Ò.

⁷Kūö e angū-ö chinökṙen ngam kaheun yīö, sā tīre An ngam Tēv tö yīö, tö kūön; achīö ṙöng öp nyīö töt chöken tö yöngre?

⁸Yē yīö pöri öre öt chöken, ngam kahë yīö ngaich ṙòkhöre, hol kūöre, ngaich yī-ö öre höng töt yöngu tö kikōnyö, ngaich rö-ö kūön.

⁹Hēk inrē ayī-ö yöngu tö tarik nö chamökṙen hī, ngaich ayī-ö ṙung milēḵṙen tö cha: röh öi mötlö hòṅ hang chöngö ngam yöng ma-alaha, ngaich aṅ?

¹⁰Pò cha nö kôḵngen nöng haroh tum sumkam nö chökṙen hī, ip tölngö lōn cha; Anga-aṅ pöri kūö inkôlò hī, hòṅ hī hamòlkūö im hanëtö Ò.

¹¹Ṙòkhöre nup chinökṙen ing töngamuh nö öt ṙanāmölōn, chanökö pöri: unôichngöre pöri anū-ö nö ṙôngu tö lanāmö nö in cha, yip tö harūnö nö in e, öp ṙòng lanöökö.

¹²Lökten hachônglö minë kël tö kilölhaka, minë kinmônö inrē tölum;

¹³Hachip talöökö minë röön yīö, hòṅ ngam tö karòk nö öt patū-ui linkölngö, hòṅ ò pöri nö lööken.

¹⁴Lām i taṙòkhöre tarik, ane inrē tömkö ngam inhetlö, öt tarīku min mameuk ngam Mā, yĕn öt īnu tö e;

¹⁵Milēt mat hòn öt tarīku tö hāṅten tö ngam inlōnti aṅ im Tev, hòn öt sīöplö nup ṙĕh kumnyahṙen nö hakihten yīö, ngaich pōihangen tī tö töchōich;

¹⁶Hòn öt chamô-òkānuvö, hēk mahachōichngörevö tarik, tö sā Īsô, mi-inyihngö ngam mine-enyre, nö ṙāi töng töh nya-aṅkūö.

¹⁷Pò hī akahalōn, hē ò nö la-unôich, nö hòṅ amīnu tö ngam inkôlò, ngaich sōtuṙen anga-aṅ, pòn öt kôtökūö tö chūök invöötö ellōn, pòrô anga-aṅ nö kalēḵĕlōn nö chöhö e nö holtö makmat.

¹⁸Pò yīö öt yihtöre im rôngö tö lanūölken, töhūkūö tö tameūyö, im tösah, sinngūlö, tökalēḵ kuföt inrē.

¹⁹I ṙô öp fanöö nup ṙën ṙô inrē; ök ahang cha ṙën ṙô samôtö ngam ṙô nö hēk nö kakka nö in cha:

²⁰Pò cha nö öt kô-ò alaha tö ngam tö halēntu, Yĕn hĕng nòng öp töṙeūla samuhtöre nö im rôngö, kulehe kui ngaich anga-aṅ;

²¹Yöng ṙôkö pinhe-eṅ ngam mineūkö, tinkaknyô Môsös nö ngö, Pahe-ekūö takô chin, kichëyöre inrē:

²²Yihtöre pöri yī-ö im Rôngö Sīyôn im elpanam ngam tö-aṅ Tēv inrē, ngam Yerūsalem el halīöngö, in yip töt kanṙeūken ma-ahānga inrē,

²³Im manūlö ane inrē māṅ ngam lanòh, yip tö kūichi nö el halīöngö, im Tēv ngam kamhòkken taṙòkhöre, i yip ma-alaha yip tarik tövītu nö teungten,

²⁴In Yēsū inrē ngam ma-ahôitöre nö im tufömngöre kinlēḵngô, im tö kichënyö inrē mahām, töngö-al huneū-euṙô tö Āpĕl.

²⁵Meūkö e yin, ui sōḵen ngam tö takaka ṙô. Pò cha, yē cha nö kôḵòngvah, hē cha nö sōḵ tö ò, ngam mahatūitö elnang cha nö ing panam, kôḵòngvah min ayī-ö öi möthë, öi mahavööngö kūöre tö Ò ngam mahatūinyôre nö ṙā-ang elhalīöngö:

²⁶Ngam tökayīna ṙô min töng panam: ngaich pöri Anga-aṅ töngamuh nö kilēḵngôre nö ngö, Hĕngtöre heuh tī chin kiyin, öt höng ngih panam, tön ngam halīöngö inrē.

²⁷Ngaich ngih ṙô, Hĕngtöre heuh, tö ṙôtö kinëḵngö nup tö kiyīnö, nö sā u nö tö vītu, hòṅ u nöng ngöh nup töt kīyinka.

²⁸Lökten, sā hī ngaich teūngen tö ngam pūlngö töt kanyinken, ta-a töi ha-öiny, hòṅ hī kētö ngam la-en ṙanāmölōn ngam Tēv holtö ṙanāmölōn, pinhe-eṅkūö inrē;

²⁹Tön tameūyö an ngam Tēv nö töṙāpngökūö.