Read Car_Nicobarese HEPRĀI 2 Bible Online

HEPRĀI 2 - Car_Nicobarese bible

HEPRĀI 2

¹Lökten in hòṅ mötlö kumlēḵlōn, öi hakūötö kūöre tö nuk tö ngaich ahangre, hòṅ hī öt amahaiṙen hëmngö ṙā-ang in u.

²Yē ngam ṙô nö ṙônyu nö lökten i ma-ahānga, nö hameuktu nö köp, kö teūngen, ngaich tö raneushöre tökööl fālen, minôṙô inrē, tö tölöökö ṙēti ṙënngen;

³Sitih öt kanô-òngvah öi min ayī-ö, yē hī öt kūöngenre tö töngatī ṙôken inyööken? Nuk tö ngaich nö urĕh sin misī nö lökten im Mā, nö ṙônyu ngaich hameuktu nö kô-en nö in hī tö cha yip hamang.

⁴Hol cha inrē ngam Tēv nö eū-a, lökten i minkahngö, pinngangkūö inrē, lökten i tö ṙōlkangen minhôiṅyö inrē, lökten i nup inlōnti tī ngam Töhet Fanöinylö inrē, nö sā ap kanahang lōn Ò.

⁵Pòn öt i ma-ahānga tī Anga-aṅ nö hakēhöt ngam yamih panam, ngam ṙô hī.

⁶Hĕng tak pöri öp tö yô-òv chūök ṙô nö hameukhöti, nö ngö, Asuh ang ngòh tarik, tö Meh urōholōn tö ò, ngòh kūön tarik inrē tö Meh meukṙen ò?

⁷Pò Meh vīlen ò nö lataṙeū hö-ö tö më ma-ahānga; hanyöṅtan Man ngaich tö kanôlò, vītu An tö Meh, nö hayöng në la-en minë kuntī Meh:

⁸Kēhötvö nun në taṙòkhöre chehen nö elkatòh Ò tö Meh. Pòn in e Anga-aṅ nö hayönghöt taṙòkhöre chehen nö elkatòh Ò, öt hēngö ṙahāngö anga-aṅ tö töt hayönghötvö nö elkatòh Ò. Öl pöri ayī-ö töngamuh meuk nup taṙòkhöre nö hayönghötvö nö in Ò.

⁹Ngaich pöri ayī-ö meūkö Ò, ngam tövītu misī nö lātaṙūḵ hö-ö tö më ma-ahānga, Ang Yēsū, tö kanôlò, ineū-euṅ inrē, pòn hōtu nö lökten im inlōnti aṅ im Tēv, Anga-aṅ nö kalah kinpaha, nö pòkūö tarik.

¹⁰Pò e nö tölöök nö in Ò, ngam tö amīnu tö taṙòkhöre, ngam löklen në taṙòkhöre inrē, nö kētö kūön nö maṙôngö nö im kanôlò, nö vītö ngam mahachöngten inyööken cha nö teungten nö lökten i kanihngen.

¹¹Pò cha nyöre tö ngam ma-ahethölö, tö cha inrē yip tö ahetlöngö nö ṙòkhöre no hĕng; angū-ö an lökten Ò nö öt sirōngkūö nö kisānuvö ṙô tö cha,

¹²Nö ngö ṙô Vënyö ngam mine-eny meh chin min i yip kisānöre. Elṙôngö ngam māṅ chin min tikökṙôre tö nöinyö Meh.

¹³Hēk inrē, Hòṅ hayönylenre chin in Ò. Hēk inrē, yĕh meūkö chu, tö vē nyīö vē kahëtö ngam Tēv nö in chu.

¹⁴Pòn ngaich më nyīö nö nôlta nö im alaha, mahām inrē, ngaich ngatī Anga-aṅ inrē nö nôlta nö in e; pòn hòṅ lökten im kinpaha, nö harāinyngen ò ngam tö minhôiṅyuvö tö kinpaha, anga-aṅ ngam sī-ö;

¹⁵Ngaich ṙānyen cha nö ṙòkhöre më töpa-ekūö tö kinpaha, më tö hakövö nö i rô-òtö nômöre.

¹⁶Pòn kô Anga-aṅ nö öt kētöre nö i ma-ahānga, kētöre pöri Anga-aṅ nö kūön Aprahām.

¹⁷Lökten e nö löök nö in Ò nö i tökeuheūttöre, nö vītu nö sā yip kisānöre, hòṅ Ò nö tö-aṙē-ĕlōn, tökô-en inrē nö mākūö kūönṙô nö lök i nup im Tēv, nö vītö inlāmö nup tökööl yip tarik.

¹⁸Pòn ngaich Anga-aṅ nö kihngen nö in e, kalaha, ngaich Anga-aṅ nö mihôiṅ nö holṙen cha, yip tö kalaha.