Read Car_Nicobarese HEPRĀI 3 Bible Online

HEPRĀI 3 - Car_Nicobarese bible

HEPRĀI 3

¹Töhet kahōlö, hamòl im invëkö aṅ el halīöngö lökten ngëichken ngam tanīnöṙô ngam mākūö kūönṙô, ṙinātö ellōn hī inrē, Ang Yēsū;

²Ngam tökô-en nö in Ò, ngam tamölṙô, sā Môsös inrē misī nö el nup patī ngam Tēv:

³Pòn ngaich anga-aṅ nö kaheuktu nö tö hòṅ mötlö ineū-euṅ tö Môsös, nö sā ò ngam mamānlö ngam patī, nö mötlö ineū-euṅ tö ngam patī.

⁴Pòn kö hĕng tak mamānlö në patī töp yô-òv; ngam Tēv pöri vamī-iṅl në taṙòkhöre.

⁵Ngaich kô Môsös nö kô-en, i nup patī ngam Tēv, nö sā mahalanṙen, nö inmeuktö nuk tövënyu tö unôichngöre;

⁶Sā kūön pöri Kristū nö im patī ngam Tēv, ngam tö patī-ivö tö hī, yē hī haköptīre tö öt pinyū-uṙô im ineū-euṅ, ngam maheūṅkkö hī inrē, nö köp söl ip manā-aṅ.

⁷Lökten ṙô ngam Töhet Fanöinylö nö ngö, Yē yīö min hang ṙô Ò töngamuh,

⁸Uh yin hangëḵngö ellōnre, sā hē ök inrunnyö lanīnö, sā hē sakāmö ök kinlaha el inchōn,

⁹I chūök yik muvöhngö yīö nö kalaha Chu, nö kalahtenre nö in Chu. Ngaich fën anāi samyeūheu nö meuk la-en Chu,

¹⁰Lökten Chu kunyahaṅlōn i ngih tūmö, Öich ngö ṙô, örheūheu yin nö lō-ongkūö nö ellōnre: Rö-ö pöri cha-a nö akahakūö tö në talöökö Chu;

¹¹Im lanīnöre Chu-ö ngaich chūökuṙô, Tö cha nö öt ku- hēthötre nö im haneūheuṅ Chu.

¹²Kahōlö, haṙēmngenre yin, hòṅ e nö öt chūöku nö ellōn yīö ngam tötlöök ellōn, öt ṙinātö ellōnre, i pintūḵngöre ṙā-ang im Tö-aṅ Tēv:

¹³Halēnö höö pöri kaheuk sakāmö, i rô-òten e nö tötaheui; hòn öt hĕng tak tö yīö tö hangëḵeyö im inchīlö aṅ im tökööl:

¹⁴Tön hamòlkūöre in tö Kristū, yĕi köptī tö ngam raneh inyönglen hī, öi kiṙapngö tīre söl ip manā-aṅ:

¹⁵Isaha e nö ṙòngmö ngö, Yē yīö min hang ṙô Chu tönga- muh, Uh yin hangëḵngö el- lōnre, sā hē ök inrunnyö lanīnö.

¹⁶Achīö yik maharunnyö lanīnö, hē cha nö hang? Hö-ö, röh yik cha-a nö ṙòkhöre nö ṙā-ang Aikup tö tī Môsös?

¹⁷In chīö Anga nö fën anāi samyeūheu nö kunyahaṅlōn? Röh Ang nö in cha, yik tököölö fālen, yik tö hulalhak alaha nö elinchōn?

¹⁸In chīö Ang nö chūökuṙô, tö cha nö öt kuhēthötre nö im haneūheu Ò, tön höng in cha yik tö minôṙô?

¹⁹Ngaich meuk ayī-ö, tö cha nö ötkô nö kuhēthötre kūö öt ṙinātö ellōnre.